Pika (NSS) - အောက်တိုဘာ ၅ 

မန်စီးတီးအသင်းနည်းပြဂွါဒီယိုလာ သည် အောက်တိုဘာလ(၄)ရက် ညတွင် ၎င်း၏ ချန်ပီယံလိဂ်နိုင်ပွဲ (၁ဝ၃)ပွဲမြောက်ကို ရယူနိုင်ခဲ့ပြီးနောက် မန်ယူနည်းပြဟောင်းဖာဂူဆန်၏ ချန်ပီယံလိဂ်နိုင်ပွဲစံချိန်ကို ချိုးဖျက်ခဲ့ကြောင်း သိရသည်။

မန်စီးတီးအသင်းသည် RB Leipzig အသင်းနှင့်ကစားခဲ့သော ချန်ပီယံလိဂ်ပွဲတွင် (၃)ဂိုး-(၁)ဂိုးဖြင့် အနိုင်ရရှိခဲ့ခြင်းဖြစ်သည်။ RB Leipzig အသင်းနှင့်ကစားခဲ့သော ပွဲတွင် မန်စီးတီးကွင်းလယ်ကစားသမား ဖိုဒန်သည် ပွဲချိန် (၂၅) မိနစ်တွင် အသင်းအတွက် အဖွင့်ဂိုးကို သွင်းယူပေးနိုင်ခဲ့ပြီး တိုက်စစ်မှူးအဲလ်ဗာရက်ဇ်က ပွဲချိန်(၈၄)မိနစ်တွင် တစ်ဂိုး ထပ်မံသွင်းယူပေးနိုင်ခဲ့သည်။ 

ထို့အပြင် မန်စီးတီးတောင်ပံကစားသမားဒိုကု သည် အချိန်ပိုတွင် တစ်ဂိုး ထပ်မံသွင်းယူပေးနိုင်ခဲ့ကြောင်းလည်း သိရသည်။ မန်စီးတီးအသင်းနှင့် ကစားခဲ့သည့်ပွဲတွင် RB Leipzig အသင်းဖက်က ချေပဂိုး တစ်ဂိုးသာ ပြန်လည် သွင်းယူပေးနိုင်ခဲ့ကြောင်း သိရသည်။

မန်စီးတီးနည်းပြဂွါဒီယိုလာ သည် ချန်ပီယံလိဂ်နိုင်ပွဲ(၁ဝ၃)ပွဲမြောက်ကို ရယူနိုင်ခဲ့ပြီးနောက် ချန်ပီယံလိဂ်နိုင်ပွဲ (၁ဝ၂) ပွဲ ရှိခဲ့သည့် မန်ယူနည်းပြဟောင်း ဖာဂူဆန်ကို ကျော်တက်သွားခဲ့ခြင်းဖြစ်သည်။ သို့သော်လည်း ဂွါဒီယိုလာသည် ချန်ပီယံလိဂ်နိုင်ပွဲ(၁ဝ၈)ပွဲ ရရှိထားသော ရီးရဲလ်မက်ဒရစ်နည်းပြဟောင်း အန်ဆယ်လော့တီ၏ နောက်တွင် ရှိနေဆဲဖြစ်ကြောင်း သိရသည်။

ဂွါဒီယိုလာ က "တကယ်ကို ကောင်းပါတယ်။ ကျွန်တော်တို့ အကောင်းဆုံးပွဲတစ်ပွဲကို ကစားခဲ့တာပါ။ ကစားသမားတိုင်းက ခြေစွမ်းပြကစားနိုင်ခဲ့ပါတယ်။ ပွဲမစခင်ကတည်းက ကစားသမားတွေအားလုံးဟာ တက်တက်ကြွကြွနဲ့ ကွင်းထဲကို ဝင်လာခဲ့ကြတာပါ" ဟု ပြောခဲ့သည်။