မျိုးကြီး (NSS) - စက်တင်ဘာ ၂၉

နစကအဖွဲ့၌ တပ်မတော်အရာရှိကြီးများနှင့် အခြားပုဂ္ဂိုလ်များကို ယုံကြည်စွာတာဝန်ပေးအပ်ခဲ့သော်လည်း အဖွဲ့ဝင်အချို့မှာ ရာထူးနှင့်လုပ်ပိုင်ခွင့်ကိုအသုံးပြုကာ စီးပွားရှာနေ၍ ထိရောက်စွာအရေးယူမည်ဟု နစကဥက္ကဋ္ဌက ထုတ်ဖော်အသိပေးလိုက်သည်။

နစကဥက္ကဋ္ဌဗိုလ်ချုပ်မှူးကြီးမင်းအောင်လှိုင်က ယမန်နေ့(စက်တင်ဘာ ၂၈ ရက်)တွင် နေပြည်တော်ရှိ နစကဥက္ကဋ္ဌ ရုံး၌ ပြုလုပ်သော နိုင်ငံတော်စီမံအုပ်ချုပ်ရေးကောင်စီအစည်းအဝေးတွင် အထက်ပါကဲ့သို့ ထည့်သွင်းပြောဆိုခဲ့ခြင်းဖြစ်သည်။

နိုင်ငံတော်စီမံအုပ်ချုပ်ရေးကောင်စီဝင်များကို တာဝန်ပေးအပ်ရာတွင် ယခင်က နိုင်ငံတော်၏ တာဝန်ထမ်းဆောင်ခဲ့ မှု၊ လုပ်ငန်းတာဝန်လုပ်ဆောင်မှုနှင့် ဖြတ်သန်းခဲ့မှုများကိုကြည့်ရှုကာ တပ်မတော်ပိုင်းဆိုင်ရာအရာရှိကြီးများ၊ နယ်ဘက်ဆိုင်ရာပုဂ္ဂိုလ်များကို ယုံကြည်မှုဖြင့် တာဝန်ပေးအပ်ခဲ့ခြင်းဖြစ်သည်ဟု နစကဥက္ကဋ္ဌက ပြောသည်။

ထိုသို့ ယုံကြည်စွာတာဝန်ပေးအပ်ရာတွင် ရာထူးနှင့်လုပ်ပိုင်ခွင့်ကို အသုံးပြု၍ ကိုယ်ကျိုးစီးပွားပြုလုပ်မှုကြောင့် အဖွဲ့ဝင်အချို့ကို အနားပေးခြင်း၊ ထိရောက်သည့်အရေးယူခြင်းများကို ပြုလုပ်သွားမည်ဖြစ်ကြောင်း ဗိုလ်ချုပ်မှူးကြီးမင်းအောင်လှိုင်က ထုတ်ဖော်အသိပေးလိုက်သည်။

လက်ရှိတွင် ဗိုလ်ချုပ်မှူးကြီးမင်းအောင်လှိုင်သည် ကောင်စီဝင်များအား သက်ဆိုင်ရာဒေသအလိုက် ခွဲဝေကာ လုပ်ငန်းတာဝန်များကို ဆောင်ရွက်ရန်အတွက် တာဝန်များပေးအပ်ထားကြောင်း သိရသည်။

“ဒီလိုသွားခြင်းအားဖြင့် တစ်အချက် ကျွန်တော်လည်းဒေသရဲ့အခြေအနေမှန်ကို သိချင်တယ်။ ပြည်သူလူထုရဲ့ သဘောထားအမှန်ကို သိချင်တယ်။ စိတ်နေစိတ်ထားလိုအပ်ချက်ကို သိချင်တယ်။ ဒါကြောင့် ကျွန်တော်တို့အနေနဲ့ လည်း တာဝန်ခွဲ ဝေပေးပြီးတော့မှသွားကြပါလို့ ပြောခဲ့ခြင်းဖြစ်ပါတယ်။ သွားတဲ့အတွက်ကြောင့်လည်း အခြေအနေ ကို အရင်ထက်စာရင် ပိုပြီးတော့သိလာရတာပေါ့” ဟု ဗိုလ်ချုပ်မှူးကြီးမင်းအောင်လှိုင်က ပြောသည်။

ပြီးခဲ့သော ရက်ပိုင်းအတွင်း၌ ဗိုလ်ချုပ်မှူးကြီးသည် နစကအဖွဲ့ဝင်များဖြစ်သည် ဒုတိယဗိုလ်ချုပ်ကြီးမိုးမြင့်ထွန်းနှင့် ဒုတိယဗိုလ်ချုပ်ကြီးစိုးထွဋ်တို့၏ နေရာတွင် ဗိုလ်ချုပ်ကြီးမောင်မောင်အေး၊ ဒုတိယဗိုလ်ချုပ်ကြီးညိုစောတို့ဖြင့် အစားထိုးကာ ပြင်ဆင်ဖွဲ့စည်းခဲ့သည်။

ပြည်ထဲရေးဝန်ကြီးဟောင်း ဒုတိယဗိုလ်ချုပ်ကြီးစိုးထွဋ်အား နစကဥက္ကဋ္ဌက မူလစစ်ဘက်တာဝန်များကို ပြန်လည် ထမ်းဆောင်စေရန် ခွင့်ပြုပေးခဲ့ကြောင်း သိရသည်။

ဗိုလ်ချုပ်မှူးကြီးမင်းအောင်လှိုင်၏ လူယုံတစ်ဦးဟု လူသိများသော နစကအဖွဲ့ဝင်၊ MIC ဥက္ကဋ္ဌ၊ နိုင်ငံခြားသုံး ကြီးကြပ်မှုကော်မတီဥက္ကဋ္ဌ ဒုတိယဗိုလ်ချုပ်ကြီးမိုးမြင့်ထွန်းသည် ပြီးခဲ့သောကာလများအတွင်း၌ ခေါ်ယူစစ်ဆေး ခြင်းခံနေရသည်ဟု သတင်းများ ကျယ်ကျယ်လောင်လောင်ထွက်ပေါ်ခဲ့ဖူးသည်။

ယင်းကဲ့သို့ သတင်းများထွက်ပေါ်ခဲ့ပြီးနောက်ပိုင်းတွင် ဒုတိယဗိုလ်ချုပ်ကြီးမိုးမြင့်ထွန်းသည် ၎င်းတာဝန်ယူခဲ့သော ဥက္ကဋ္ဌတာဝန်များ အပါအဝင် နစကအဖွဲ့ဝင်အဖြစ်မှ အစားထိုးခံခဲ့ရသည်။

အလားတူ ပြီးခဲ့သောရက်ပိုင်းအတွင်း ခေါ်ယူစစ်ဆေးခံနေရသည်ဟု သတင်းထွက်ပေါ်ခဲ့ဖူးသော စီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ဒုဝန်ကြီးဦးညွန့်အောင်သည်လည်း အနားပေးခြင်းခံခဲ့ရသည်။

လက်ရှိ ဗိုလ်ချုပ်မှူးကြီးမင်းအောင်လှိုင် ဦးဆောင်သော နစကအစိုးရလက်ထက်တွင် ရန်ကုန်တိုင်းဝန်ကြီးချုပ် ဟောင်းဦးလှစိုး၊ စီးပွားရေးရာဝန်ကြီးဟောင်း ဦးအောင်သန်းဦးနှင့် တိုင်းအတွင်းရေးမှူးဦးစိုးစိုးဇော်တို့အား အဂတိလိုက်စားမှုဖြင့် အရေးယူခဲ့သော ဖြစ်စဉ်ရှိခဲ့ဖူးသည်။