Pika (NP News) - ဖေဖော်ဝါရီ ၅ 

ရုရှားကို တိုက်ရာတွင် အသုံးပြုရန်အတွက် ယူကရိန်းကို တာဝေးပစ်ဒုံးကျည်များ ထောက်ပံ့ပေးမည့် အမေရိကန်၏ ဆုံးဖြတ်ချက်သည် ပဋိပက္ခကို ပိုမိုတင်းမာလာအောင်လုပ်ဆောင်နေခြင်းဖြစ်ကြောင်း ရုရှားသမ္မတဟောင်း မက်ဗီဒက်က ထုတ်ဖော်ပြောဆိုခဲ့သည်၊၊

ထို့အပြင် အမေရိကန်သည် ယူကရိန်းပဋိပက္ခကို မပြီးဆုံးစေချင်သောကြောင့် ယခုကဲ့သို့ လုပ်ဆောင်နေခြင်းဖြစ်နိုင် ကြောင်း ၎င်းက ထပ်မံပြောကြားခဲ့သည်။ ယူကရိန်းသည် ခရိုင်းမီးယားကျွန်းဆွယ်ကို တိုက်ခိုက်ပြီး ငြိမ်းချမ်းရေး ဆွေးနွေးမှုများ ပြုလုပ်ရန်အတွက် ရုရှားကိုတွန်းအားပေးရန် မဖြစ်နိုင်ကြောင်း မက်ဗီဒက်က အင်တာဗျူးတစ်ခုတွင် ပြောကြားခဲ့သည်။ 

မက်ဗီဒက် က "ရလဒ်ကတော့ ဆန့်ကျင်ဖက်ပါပဲ၊၊ ဒီလိုကိစ္စမျိုးမှာ ဆွေးနွေးပွဲဆိုတာ မရှိပါဘူး၊၊ လက်တုံ့ပြန် တိုက်ခိုက်တာမျိုးပဲ ရှိပါလိမ့်မယ်။ ငြိမ်းချမ်းရေးရချင်တယ်ဆိုရင် အမေရိကန်ဟာ ယူကရိန်းကို ရုရှားနဲ့ဆွေးနွေးဖို့ တိုက်တွန်းရမှာပါ။ ဒါပေမယ့် အမေရိကန်အစိုးရနဲ့ ကွန်ဂရက်လွှတ်တော်တွေက အဲဒီလိုမျိုးတိုက်တွန်းဖို့ကို စိတ်တောင်မဝင်စားတဲ့ပုံပါပဲ" ဟု ပြောဆိုခဲ့သည်။

ယူကရိန်းတပ်ဖွဲ့များသည် ခရိုင်းမီးယားကျွန်းဆွယ် (သို့မဟုတ်) ရုရှားပိုင်နက်နယ်မြေများကို ပစ်မှတ်ထား တိုက်ခိုက်မည်ဆိုပါက ဖြစ်နိုင်သမျှနည်းလမ်းအားလုံးနှင့် လက်တုံ့ပြန်သွားမည်ဖြစ်ကြောင်း မက်ဗီဒက်က သတိပေးပြောဆိုခဲ့သည်။ မက်ဗီဒက်က "ခြိမ်းခြောက်မှုတွေရဲ့သဘောသဘာဝပေါ်မူတည်ပြီး ကန့်သတ်ချက်တွေ သတ်မှတ်ထားတာမျိုး မရှိပါဘူး၊၊ လက်နက်အမျိုးအစားအားလုံးကို အသုံးပြုသွားဖို့ အဆင်သင့်ရှိနေပါတယ်။ ခြိမ်းခြောက်မှုတွေလုပ်မယ်ဆိုရင် တုံ့ပြန်မှုတွေက ပြင်းထန်ပြီး လျင်လျင်မြန်မြန်ပဲဖြစ်သွားမယ်ဆိုတာ အာမခံ ပြောရဲပါတယ်" ဟု ပြောဆိုခဲ့သည်။

ယူကရိန်းသို့ လက်နက်ပေးပို့မှုများ အပါအဝင် ထောက်ခံအားပေးနေသော ဥရောပခေါင်းဆောင်များသည် ၎င်းတို့၏ ပြည်သူများကို ထိခိုက်နစ်နာစေအောင် လုပ်ဆောင်နေခြင်းဖြစ်ကြောင်း မက်ဗီဒက်က ပြစ်တင်ဝေဖန်ခဲ့သည်။ အမေရိကန်စစ်ဌာနချုပ်သည် အကွာအဝေး(၁၅ဝ)ကီလိုမီတာအထိ ရောက်ရှိနိုင်သော  (GLSDB) ဒုံးကျည်များ ယူကရိန်းသို့ ထောက်ပံ့ပေးမည်ဟု ကြေညာခဲ့ပြီးနောက် တစ်ရက်အကြာတွင် ရုရှားသမ္မတဟောင်း မက်ဗီဒက် က ယင်းကဲ့သို့ မှတ်ချက်ပြုပြောဆိုခဲ့ခြင်းဖြစ်ကြောင်း သိရသည်။ 

ယူကရိန်းသို့ စစ်လက်နက်ပစ္စည်းများ ထောက်ပံ့ပေးခြင်းသည် အမေရိကန်နှင့် ၎င်း၏ မဟာမိတ်အုပ်စုများ ပဋိပက္ခ တွင် တိုက်ရိုက်ပါဝင်ပတ်သက်နေခြင်းဖြစ်ကြောင်း ရုရှား နှင့် နေတိုးအဖွဲ့ကြားတွင် စစ်ရေးအရတင်းမာမှုများ ဖြစ်လာနိုင်ဖွယ်ရှိကြောင်း ရုရှားဖက်က အကြိမ်ကြိမ်သတိပေး ပြောဆိုခဲ့သည်။