ဂျန်ဇက် (NSS) - ဩဂုတ် ၃၁

ဂျပန်ဝန်ကြီးချုပ် ဖူမီအိုကီရှီဒါဟာ ဓါတ်ပေါင်းဖိုကရေဒီယိုသတ္တိကြွရေဆိုးတွေ စွန့်ပစ်မှုကြောင့် ရေထွက် ပစ္စည်းများ ဘေးအန္တရာယ်မရှိဘဲ ဘေးကင်းမှုရှိကြောင်း သက်သေပြနိုင်ဖို့ရေဆိုးတွေ စွန့်ပစ်ထားတဲ့ ပစိဖိတ်သမုဒ္ဒရာအတွင်းရှိ ရေထွက်ပစ္စည်းများကို လက်တွေ့စားသုံးပြခဲ့ကြောင်း သိရပါတယ်။

ဂျပန်နိုင်ငံဟာ ဖူကူရှီးမား နျူကလီးယား ဓါတ်ပေါင်းဖိုကထွက်ရှိတဲ့  ရေဒီယိုသတ္တိကြွရေဆိုးတွေကို ပစိဖိတ်သမုဒ္ဒရာကို စွန့်ပစ်ခဲ့ရာတရုတ်နိုင်ငံက ဝေဖန်ပြစ်တင်ခဲ့ပြီး ရေဆိုးများစွန့်ပစ်မှုကြောင့် ရေထွက် ပစ္စည်းများ ဘေးအန္တရာယ်ဖြစ်လာနိုင်ကြောင်း စွပ်စွဲပြောဆိုခဲ့ပါတယ်။ ဒါပေမယ့် တရုတ်နိုင်ငံဟာ ဂျပန်နိုင်ငံက တင်သွင်းတဲ့ ရေထွက်ပစ္စည်းများ ဝယ်ယူနေခြင်းတွေကိုလည်း ပိတ်ပင်ခဲ့ကြောင်းသိရပါတယ်။

ဂျပန်ဝန်ကြီးချုပ် နဲ့ အခြားဝန်ကြီးသုံးဦးဟာ သြဂုတ်လ ၃၀ ရက်က ဖူကူရှီးမား ကမ်းရိုးတန်း အလွန်က ဖမ်းမိထားတဲ့ ပင်လယ်စာများ၊ ရေဘဝဲ အပါအဝင်ရေထွက်ပစ္စည်းများကို နေလည်စာအဖြစ် စားသုံးပြခဲ့ကြောင်း ဂျပန်မီဒီယာတွေကဖော်ပြထားပါတယ်။ ဂျပန်ဝန်ကြီးချုပ် ကီရှီဒါက " စား‌သောက်ရတာအလွန် ကောင်းပါတယ်။ ဘေးကင်းမှုရှိပြီး အရသာလည်းရှိပါတယ်"လို့ပြောပါတယ်။

ဂျပန်နိုင်ငံဟာ ပြီးခဲ့တဲ့သီတင်းပတ်က ဖူကူရှီးမား နျူကလီးယား ဓါတ်ပေါင်းဖိုက ထွက်ရှိတဲ့ရေဆိုးတွေကို သမုဒ္ဒရာထဲကို စွန့်ပစ်မှုနဲ့ပတ်သက်ပြီး တောင်ကိုရီးယား၊ မြောက်ကိုရီးယား၊ တရုတ်နိုင်ငံတို့နဲ့ တင်းမာမှုတွေရှိနေခဲ့ကြောင်းသိရပါတယ်။ တရုတ်အစိုးရက ဂျပန်နိုင်ငံအနေနဲ့ ရေဒီယိုသတ္တိကြွပစ္စည်းများ ပါဝင်နေတဲ့ ရေဆိုးတွေ စွန့်ပစ်ခြင်းနဲ့ပတ်သက်ပြီး သမုဒ္ဒရာထဲရှိရေများဘေးကင်းမှုရှိကြောင်း သက်သေပြဖို့ ပျက်ကွက်နေကြောင်း မကြာသေးမီက ဝေဖန်ပြစ်တင်ခဲ့ဖူးပါတယ်။

ဒါ့ပြင်တရုတ်အစိုးရက ဂျပန်နိုင်ငံအနေနဲ့ ရေဒီယိုသတ္တိကြွရေဆိုးတွေ ပါဝင်နေတဲ့ ရေတွေ ဘေးကင်းမှုရှိမယ်ဆိုရင်တောင် ပြည်တွင်းအတွက်သာအသုံးပြုသင့်ကြောင်း ပြောဆိုထားပါတယ်။ ဖူကူရှီးမားနျူက လီးယားဓါတ်ပေါင်းဖို စက်ရုံကနေထွက်ရှိတဲ့ ရေဆိုးတွေကို ပစိဖိတ်သမုဒ္ဒရာထဲကို ဂျပန်နိုင်ငံက စွန့်ပစ်ခဲ့ပြီးနောက် တရုတ်နိုင်ငံအပြင် ဟောင်ကောင်၊ မာကာအိုတို့ဟာ ဂျပန်နိုင်ငံကရေထွက်ပစ္စည်းများတင်သွင်းနေခြင်းကို ပိတ်ပင်ခဲ့ကြောင်းသိရပါတယ်။ ဒါ့ပြင်တောင်ကိုရီးယားနိုင်ငံကလည်း ဂျပန်နိုင်ငံက ရေထွက်ပစ္စည်းများ၊ ပင်လယ်စာများတင်သွင်းနေခြင်းကို ကန့်သတ်ခဲ့ကြောင်းသိရပါတယ်။