NSS - ဩဂုတ် ၂၈

မန္တလေးတိုင်း၊ ပြင်ဦးလွင်မြို့နယ်၊ မန္တလေး-ပြင်ဦးလွင် အတက်လမ်းတွင် အိမ်စီးကားတစ်စီး မီးလောင်မှုဖြစ်ပွားခဲ့ကြောင်း သိရသည်။

ဖြစ်စဉ်မှာ ယနေ့(ဩဂုတ်လ ၂၈ရက်)၊ နံနက် (၁၀)နာရီဝန်းကျင်အချိန်တွင် မန္တလေး-ပြင်ဦးလွင် အတက်လမ်း၊ (၁၇)မိုင်၌ အထက်ပါကဲ့သို့ဖြစ်ပွားခဲ့ခြင်းဖြစ်ကြောင်း စေတနာမွန်လူမှုကူညီရေးအသင်း (အုန်းချော)ထံမှ သိရသည်။

“ဘာကြောင့် မီးလောင်တာလဲတော့ မသိရဘူး။ ကားကတော့ ကားသေးလေးမို့ အိမ်စီးကားဖြစ်ဖို့များပါတယ်။ လူနာတော့ မရှိပါဘူး။ ကားပဲတွေ့ခဲ့တာပေါ့။ ကားပေါ်မှာဘယ်နှစ်ယောက်ပါလဲ မသိလိုက်ရပါဘူး”ဟု စေတနာမွန်လူမှုကူညီ‌ရေးအသင်း(အုန်းချော)မှ တာဝန်ရှိသူတစ်ဦးက NSS ကိုပြောသည်။

ကားမီးလောင်မှုကြောင့် ယာဉ်ပေါ်တွင် လိုက်ပါလာသူများ ထိခိုက်ဒဏ်ရာရရှိသူမရှိခဲ့ကြောင်း သိရသည်။

အလားတူ ယနေ့(ဩဂုတ်လ ၂၈ ရက်)၊ နံနက် (၅)နာရီဝန်းကျင်အချိန်တွင် ရန်ကုန်တိုင်း၊ လှိုင်သာယာ (အရှေ့ပိုင်း) မြို့နယ်တွင် နာရေးကူညီမှုကားတစ်စီး မီးလောင်မှုဖြစ်ပွားခဲ့ခြင်းဖြစ်ကြောင်း သိရသည်။

အဆိုပါ ကားမီးလောင်မှုကြောင့် ယာဉ်ပေါ်ပါ လူ(၇)ဦးအနက် ပရဟိတအသင်းသားတစ်ဦး ထိခိုက်ဒဏ်ရာရရှိသွားသော်လည်း မစိုးရိမ်ရကြောင်း သိရသည်။