ဂျန်ဇက် (NSS) - သြဂုတ် ၂၈

ထိုင်းရွေးကောက်ပွဲမှာ မဲအများဆုံးအနိုင်ရခဲ့တဲ့ Move Forward  ပါတီခေါင်းဆောင် ပီတလင်ဂျာရိုအမ်ရက်ဟာ သြဂုတ် ၂၆ ရက်က ဘန်ကောက်မြို့ Wat Phraya Suren ကျောင်းမှာ ကျင်းပခဲ့တဲ့ ကရင်တိုင်းရင်းသား ရိုးရာပွဲ တစ်ခုဖြစ်တဲ့ လက်ချည်ပွဲအခမ်းနားကို တက်ရောက်ခဲ့ကြောင်း သိရပါတယ်။ 

နှစ်စဉ်ကျင်းပတဲ့ အဆိုပါအခမ်းအနားကို ပီတလင်ဂျာရိုအမ်ရက်အပြင် Move Forward ပါတီရဲ့လွှတ်တော် ကိုယ်စားလှယ်တွေဖြစ်တဲ့ Manop Keereepuwadol နဲ့ Pimkarn Kiratiwirapakorn တို့လည်း တက်ရောက်ခဲ့ ကြောင်း သိရပါတယ်။ ပီတလင်ဂျာရိုအမ်ရက်က ထိုင်းနိုင်ငံရှိ လူနည်းစုတိုင်းရင်းသားများအတွက် တန်းတူညီမျှ အခွင့်အရေးရရှိအောင် ကြိုးပမ်းမှုတွေ ဆက်လက်လုပ်ဆောင်သွားမယ်လို့ ပြောပါတယ်။

ပီတလင်ဂျာရိုအမ်ရက်က ၎င်းအနေနဲ့ ထိုင်းနိုင်ငံသားများနဲ့ လူနည်းစု တိုင်းရင်းသားအခွင့်အရေးတိုးမြှင့်ပေးနိုင်မယ့် ဥပဒေမူကြမ်းကို လုပ်ဆောင်လျက်ရှိနေကြောင်း ပြောပါတယ်။ Cross Cultural Foundation ရဲ့ ဥက္ကဋ္ဌဖြစ်သူ Surapong Kongchantuk က ထိုင်းဝန်ကြီးချုပ်အသစ်မဲပေးရွေးချယ်ပွဲမှာ ပီတလင်ဂျာရိုအမ်ရက် ရှုံးနိမ့်ခဲ့ခြင်းဟာ ထိုင်းနိုင်ငံရှိ တိုင်းရင်းသားလူမျိုးများကြား စိတ်ပျက်စရာဖြစ်လာစေခဲ့ကြောင်း၊ ပီတလင်ဂျာရိုအမ်ရက် ဦးဆောင် နေတဲ့ Move Forward ပါတီ ရေးဆွဲနေတဲ့ဥပဒေမူကြမ်းဟာ အစိုးရအသစ် လက်ထက်မှာ တိုင်းရင်းသားအခွင့် အရေးများ တိုးမြှင့်ရရှိအောင် ကူညီပေးနိုင်မယ်လို့ မျှော်လင့်ယုံကြည်ကြောင်း ပြောပါတယ်။

ကမ္ဘာတဝန်းရှိ ကရင်တိုင်းရင်းသားများဟာ နှစ်စဉ်နှစ်တိုင်း လက်ချည်ပွဲအခမ်းနားကို ကျင်းပနေပြီး ကံဆိုးမှုနဲ့ နတ်ဆိုးတွေ ရန်ကနေ ကာကွယ်ဖို့ ရည်ရွယ်ပြုလုပ်ခြင်းမျိုးဖြစ်ကြောင်း သိရပါတယ်။ ကရင်တိုင်းရင်းသားများဟာ လက်ချည်ပွဲအခမ်းအနားကို ကိုယ်တိုင်တက်ရောက်လာခဲ့တဲ့ ပီတလင်ဂျာရိုအမ်ရက်က ကရင်ရိုးရာဝတ်စုံကို လက်ဆောင်ပေးခဲ့ပြီး ပီတလင်ဂျာရိုအမ်ရက်ဟာ ကရင်ရိုးရာဝတ်စုံကို ဝတ်ဆင်ခဲ့ကြောင်း သိရပါတယ်။