Pika (NSS) - သြဂုတ် ၂၃

BRICS အဖွဲ့ဝင်နိုင်ငံများက တည်ထောင်ထားသော New Development Bank(NDB) သည် အဖွဲ့ဝင်ဖြစ်ခွင့်ရရန် တောင်းဆိုထားသော နိုင်ငံပေါင်း(၁၅)နိုင်ငံ၏ လျှောက်ထားမှုများကို စဉ်းစားနေကြောင်း NDB ဘဏ်အကြီးအကဲ Dilma Rousseff က ပြောကြားခဲ့သည်။ 

(NDB) သည် အဖွဲ့ဝင်သစ် လေးနိုင်ငံ (သို့မဟုတ်) ငါးနိုင်ငံ၏ ဝင်ခွင့်ကို လက်ခံကာ အတည်ပြုနိုင်ဖွယ်ရှိနေကြောင်း ဘရာဇီးသမ္မတဟောင်းဖြစ်သလို ရှန်ဟိုင်းအခြေစိုက် ငွေချေးလုပ်ငန်း(NDB)ကို ဦးဆောင်နေသည့် Dilma Rousseff  က ပြောကြားခဲ့သည်။

သို့သော်လည်း အဆိုပါအဖွဲ့ဝင်အသစ်များမှာ မည်သည့်နိုင်ငံများဖြစ်သည်ဆိုသည့်အချက်ကို Dilma Rousseff  က ထုတ်ဖော်ပြောဆိုခဲ့ခြင်းမျိုး မရှိကြောင်း သိရသည်။ ၎င်းက "ဒီနှစ်အတွင်းမှာ အမေရိကန်ဒေါ်လာ(၈)ဘီလျံကနေ (၁ဝ) ဘီလျံကြား ချေးငွေထုတ်ပေးဖို့ မျှော်လင့်ထားပါတယ်။ ကျွန်မတို့ရဲ့ရည်ရွယ်ချက်မှာ ချေးငွေတွေအားလုံးရဲ့ (၃ဝ)ရာခိုင်နှုန်းခန့်ကို ပြည်တွင်းသုံးငွေကြေးနဲ့ ထုတ်ချေးနိုင်ဖို့ဖြစ်ပါတယ်" ဟု ပြောခဲ့သည်။

(NDB)သည် အမေရိကန်ဒေါ်လာအပေါ်မှီခိုအားထားမှုများကို လျှော့ချရန် ကြိုးပမ်းမှုတစ်စိတ်တစ်ပိုင်းအဖြစ် တောင်အာဖရိကနိုင်ငံသုံးငွေကြေးနှင့် ဘရာဇီးနိုင်ငံသုံးငွေကြေးတို့ဖြင့် ငွေချေးရန်စီစဉ်နေကြောင်း ၎င်းက ထပ်မံပြောကြားခဲ့သည်။ 

(NDB)သည် တောင်အာဖရိကတွင် ချေးငွေထုတ်ပေးရန်အတွက် တောင်အာဖရိကနိုင်ငံသုံးငွေကြေးကို အသုံးပြု မည်ဖြစ်ပြီး ဘရာဇီးတွင်လည်း ဘရာဇီးနိုင်ငံသုံးငွေကြေးဖြင့် ချေးငွေထုတ်ပေးသွားမည်ဖြစ်ကြောင်း Dilma Rousseff ၏ အဆိုအရ သိရသည်။ ၎င်းက "ကျွန်မတို့ဟာ အမေရိကန်ဒေါ်လာ မဟုတ်ဘဲ နိုင်ငံသုံးငွေကြေးတွေနဲ့ ငွေကြေးလဲလှယ်ဖို့ (သို့မဟုတ်) ချေးငွေထုတ်ပေးနိုင်ဖို့ ကြိုးပမ်းသွားမှာပါ။ ရူပီးနဲ့လည်း အဲဒီလိုပဲ လုပ်သွားမှာပါ" ဟု ပြောခဲ့သည်။

ဘရာဇီး၊ ရုရှား၊ အိန္ဒိယ၊ တရုတ် နှင့် တောင်အာဖရိကတို့ပါဝင်သော BRICS အဖွဲ့သည် အခြေခံအဆောက်အဦးများ နှင့် ဖွံ့ဖြိုးတိုးတက်ရေးဆိုင်ရာ ပရောဂျက်များအတွက် ရန်ပုံငွေပံ့ပိုးပေးရန် ရည်ရွယ်ချက်ဖြင့် ၂ဝ၁၄ ခုနှစ်တွင် NDB ဘဏ်ကို စတင်တည်ထောင်ခဲ့ခြင်းဖြစ်ကြောင်း သိရသည်။ NDBဘဏ်ကို ၂ဝ၁၅ ခုနှစ်တွင် တရားဝင် စတင်ဖွင့်လှစ် ခဲ့ပြီး  ဘင်္ဂလားဒေ့ရှ်၊ ယူအေအီး၊ အီဂျစ် နှင့် ဥရုဂွေးတို့က နောက်ပိုင်းတွင် ပါဝင် ပူးပေါင်းခဲ့ကြောင်း သိရသည်။ NDBဘဏ်ကို IMF နှင့် World Bank တို့ ကဲ့သို့သော အမေရိကန်ကြီးစိုးသည့် ငွေကြေးအဖွဲ့အစည်းများအတွက် အစားထိုးဘဏ်တစ်ခုအဖြစ် တည်ထောင်ခဲ့ခြင်းဖြစ်ကြောင်း သိရသည်။