မြူနစ် (NSS) - သြဂုတ် ၂ဝ

အာရှလမ်း၌ လမ်းပြုပြင်ရေးစက်ယန္တရားများ တင်ဆောင်လာသည့်ကား ပစ်ခတ်ခံ၍ လူထိခိုက်မှုများ ရှိခဲ့ကြောင်း သတင်းရရှိသည်။

ဖြစ်စဉ်မှာ ယနေ့(သြဂုတ် ၂ဝ ရက်) နံနက် ၉ နာရီကျော်အချိန်တွင် ကရင်ပြည်နယ်၊ မြဝတီ-ကော့ကရိတ်အာရှလမ်း၊ သင်္ဃန်းညီနောင်ဘက်ခြမ်းရှိ ကွင်းကလေးတံတားအနီးတွင် ပစ်ခတ်မှုဖြစ်ပွားခဲ့ကြောင်း ဒေသခံလူမှုကူညီရေး အသင်းအဖွဲ့တစ်ခုက NP News ကို ပြောသည်။

အာရှလမ်း၊ ကွင်းကလေးတံတားအနီးတွင် လမ်းပြုပြင်ရေးစက်ယန္တရားများ တင်ဆောင်လာသည့်ကား ပစ်ခတ် ခံနေရစဉ်အချိန် ခရီးသည်တင်ကားတစ်စီးမှာ ဖြတ်သန်းမောင်းနှင်ခဲ့၍ ခရီးသည်အချို့ ထိခိုက်ဒဏ်ရာများရရှိခဲ့ ကြောင်း သိရသည်။

“ကော့ကရိတ်ဘက်ကလာရင် ကွမ်းသီးခြံအဆင်း ကွင်းကလေးတံတားမရောက်ခင်လေးမှာပေါ့။ ဘက်ဟိုးတွေ ပြန်တင်လာတဲ့ ကားကို ပစ်တာ။ ကားတစ်စီးကတော့ မောင်းမရတော့ဘူး။ အဲဒီမှာ ကားပေါ်ကသူတွေက ခုန်ချတော့ ဘာမှမဖြစ်ဘူး။ အဲဒီအချိန်မှာ အန်ဇာတုံးခရီးသည်ကားက မောင်းလာတာပေါ့။ အဲဒီမှာ ထိပြီးတော့ ခရီးသည်(၄)ယောက် ဒဏ်ရာရသွားတယ်။ ခရီးသည်(၄)ယောက်က ခြေတောက်တွေ မှန်တယ်။ ပါးတွေကို ရှပ်မှန်တာတွေလည်း ရှိတယ်” ဟု ဒေသခံလူမှုကူညီရေးအဖွဲ့မှ တာဝန်ရှိသူတစ်ဦးက ပြောသည်။

ထိုသို့ ပစ်ခတ်ခံရမှုကြောင့် ထိခိုက်ဒဏ်ရာရရှိခဲ့သော ခရီးသည်(၄)ဦးအား မြဝတီခရိုင်ပြည်သူ့ဆေးရုံသို့ ပို့ဆောင်ပေးထားကြောင်း သိရသည်။

အဆိုပါပစ်ခတ်မှုကို အာရှလမ်းပြုပြင်နေမှုအပေါ် မလိုလားသည့် KNLA၊ PDF ပူးပေါင်းအဖွဲ့က လုပ်ဆောင်ခြင်း ဖြစ်ကြောင်း ဒေသခံများက ပြောဆိုထားသော်လည်း NP News အနေဖြင့် သီးခြားအတည်ပြုနိုင်ခြင်း မရှိသေးပေ။

မြဝတီ-ကော့ကရိတ်အာရှလမ်း၊ တောနော်ရေတံခွန်အနီးရှိ ကားလမ်းပိုင်းသည် ပြီးခဲ့သော သြဂုတ် ၇ ရက်တွင် မိုးသည်းထန်စွာရွာသွန်းမှုကြောင့် မြေပြိုကျမှုဖြစ်ပေါ်ခဲ့သည်။

လက်ရှိတွင် မြေပြိုပျက်စီးခဲ့သော အာရှလမ်းကာလမ်းပိုင်းအား ဘေလီတံတားဖြင့် အစားထိုးပြုပြင်နိုင်ရေး ဆောင်ရွက်လျက်ရှိပြီး ကားအသေးများကိုလည်း မြေသားလမ်းမှတစ်ဆင့် အချိန်ပိုင်းအလိုက် ဖြတ်သန်းသွားလာ ခွင့်ပေးထားကြောင်း သိရသည်။

ထိုသို့ ပြုပြင်နေစဉ်အချိန်တွင် လမ်းပြုပြင်ရေးအဖွဲ့များမှာ မကြာခဏ ပစ်ခတ်ခံနေရမှုများရှိကြောင်း ဆောက်လုပ် ရေးဝန်ကြီးဌာန၊ လမ်းဦးစီးဌာနမှ ညွှန်ချုပ်ဦးလှထွန်းဦးက NP News ကို ပြောသည်။

“နယ်မြေမှာ ပစ်ခတ်နေတာနဲ့ပဲ အလုပ်တွေက မတွင်ဘူး။ ဟိုတစ်နေ့ကလည်း လောင်ချာကြီးကျလာတယ်လေ။ နောက်ပြီးတော့ စက်တွေလည်း စနိုက်ပါတွေနဲ့ အပစ်ခံရတယ်။ ဆိုတော့ အလုပ်တော့ကောင်းကောင်း လုပ်လို့ မရဘူးပေါ့။ ဒါပေမယ့် လုပ်လို့ရမယ့်နည်းလမ်းကို ကျွန်တော်တို့ ရှာကြံနေပါတယ်။ ပစ်ခတ်မှုဖြစ်တဲ့အချိန် ဆိုရင်တော့ လုပ်ငန်းခွင်က ရပ်ရတာပေါ့။ ပြီးတော့ အခြေအနေကြည့် ပြန်လုပ်ပေါ့။ သူတို့ကလည်း အလုပ်မဖြစ်ရ အောင် နှောင့်ယှက်နေတာပေါ့” ဟု ဦးလှထွန်းဦး က ဆိုသည်။

ယင်းကဲ့သို့ နေ့စဉ်နီးပါး ပစ်ခတ်ခံနေရသည့်အတွက် မြေပြိုပျက်စီးခဲ့သော အာရှလမ်းပိုင်းပြုပြင်ရေးသည် လုပ်ငန်း ပြီးစီးမှုနည်းပါးနေကြောင်း သိရသည်။

“အကြိမ်ရေတော့ များတယ်။ ပစ်နေတာကတော့ တစ်နေ့ကို ၄၊ ၅ ကြိမ်လောက်ဖြစ်နေတာ။ လူတော့ ထိခိုက် ဒဏ်ရာရတာမျိုး မရှိဘူးဗျ။ အဝေးကနေလာပစ်တော့ ကျည်ဆံကျတယ်။ ဗုံးကျတယ်။ လူတွေ ထိခိုက်တာတော့ မရှိပါဘူး။ အဲဒီလိုပဲ အဝေးကနေ လှမ်းခြောက်တာပေါ့။ အလုပ်ပျက်အောင်ပေါ့ဗျာ။ ဆိုလိုတာက လူကလည်း အသက်နဲ့ဆိုတော့ အောက်ခြေက စက်မောင်း၊ ယာဉ်မောင်းတွေလည်း သူတို့လည်း ကိုယ့်အသက်ကို စိုးရိမ်တာပေါ့။ အဲဒါကြောင့် လုပ်ရကိုင်ရတာ အခက်အခဲတွေ ရှိတာပေါ့” ဟု ၎င်းက ဆက်လက်ပြောသည်။

မြဝတီ-ကော့ကရိတ်အာရှလမ်းသည် မြန်မာ-ထိုင်းကုန်သည်မှုပြုလုပ်ရာတွင် အရေးပါးသည့်လမ်းကြောင်း ဖြစ်သည့်အတွက် အမြန်ဆုံးပြီးမြောက်ရေး အားထုတ်လုပ်ဆောင်နေသည်ဟု ဦးလှထွန်းဦးက ဆိုသည်။