မျိုးကြီး (NSS) - သြဂုတ် ၁၀

တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)နှင့်ပတ်သက်၍ လိုက်နာစရာအကြောင်းမရှိတော့ကြောင်း KNU အထွေထွေအတွင်းရေးမှူးက ပြောသည်။

ယနေ့(သြဂုတ်လ ၁၀ ရက်)တွင် ပြုလုပ်သည့် ကရင်အမျိုးသားအစည်းအရုံး(KNU)၏ သတင်းစာရှင်း လင်းပွဲ၌ အထွေထွေအတွင်းရေးမှူး ပဒိုစောတာဒိုမှူးက အထက်ပါကဲ့သို့ ထည့်သွင်းပြောကြားခဲ့ခြင်းဖြစ်သည်။

တပ်မတော်က နိုင်ငံတော်အာဏာရယူခဲ့မှုကြောင့် NCA စာချုပ်သည်လည်း ပျက်ပြယ်သွားပြီဖြစ်ကြောင်း ပဒိုစောတာဒိုမှူးက ပြောသည်။

“NCA နဲ့ပတ်သက်လို့ ကျွန်တော်တို့ လိုက်နာစရာအကြောင်း မရှိတော့ပါဘူး။ ဘာကြောင့်လဲဆိုတော့ NCA ရဲ့ နှလုံးသားဖြစ်တဲ့ အခန်း(၁)အခြေခံမူကို နင်းချေဖျက်ဆီးလိုက်တာက စစ်တပ်ဖြစ်ပါတယ်။ အဲဒီအတွက်ကြောင့် ဒီ NCA ရဲ့ အခန်း (၁)က NCA တစ်ခုလုံးရဲ့ နှလုံးသားဖြစ်ပါတယ်။ အဲဒီနှလုံးသားကို ဖျက်ဆီးလိုက်ပြီးဖြစ်တဲ့အတွက်ကြောင့် ဒီ NCA က မရှိတော့ဘူး။ အဲဒီအတွက်ကြောင့် ဒီ NCA ကို အသုံး ပြုပြီးတော့ နိုင်ငံတကာကို လှည့်စားခြင်းသော်လည်းကောင်း၊ ပြည်သူလူထုကို လှည့်စားခြင်းသော် လည်းကောင်း လုပ်တဲ့ကိစ္စမှာ ကျွန်တော်တို့နဲ့ ဘာမှမသက်ဆိုင်ပါဘူး”ဟု ၎င်းက ပြောကြားသည်။

KNU အပါအဝင် တိုင်းရင်းသားလက်နက်ကိုင် (၁၀)ဖွဲ့သည် သမ္မတဦးသိန်းစိန် အစိုးရလက်ထက်နှင့် NLD အစိုးရလက်ထက်တို့တွင် NCA သဘောတူစာချုပ်ကို လက်မှတ်ရေးထိုးခဲ့ကြသည်။

NCA ကို လက်မှတ်ရေးထိုးထားသည့်အဖွဲ့များမှာ KNU၊ CNF၊ ABSDF၊ PNLO၊ LDU၊ ALP၊ KNU/KNLA-PC၊ DKBA၊ NMSP နှင့် RCSS တို့ဖြစ်သည်။

လက်ရှိတွင် PNLO၊ LDU၊ ALP၊ KNU/KNLA-PC၊ DKBA၊ NMSP နှင့် RCSS လက်နက်ကိုင်အဖွဲ့တို့သည် NCA ၏အနှစ်သာရကို အခြေခံကာ ၂၀၂၁ ခုနှစ် ဖေဖော်ဝါရီလမှစ၍ နိုင်ငံတော်အာဏာရယူခဲ့သော နစကအစိုးရနှင့် ငြိမ်းချမ်းရေးဆွေးနွေးလျက်ရှိသည်။

သို့သော် KNU၊ CNF နှင့် ABSDF တို့သည် နစကဥက္ကဋ္ဌဗိုလ်ချုပ်မှူးကြီးမင်းအောင်လှိုင် ဖိတ်ခေါ်သော ငြိမ်းချမ်းရေးဆွေးနွေးပွဲသို့ တက်ရောက်ခဲ့ခြင်းမရှိသည့်အပြင် တပ်မတော်နှင့်လည်း တိုက်ပွဲများ ဖြစ်ပွားလျက်ရှိနေသည်။

နိုင်ငံတော်၏ ပကတိအနှစ်သာရဖြစ်သော ပြည်တွင်းငြိမ်းချမ်းရေးနှင့် ရရှိထားသည့် ပြည်တွင်းငြိမ်းချမ်းရေးရလဒ်များ တည်ငြိမ်မှုရှိစေရေးအတွက် NCA ပါသဘောတူညီချက်များအတိုင်း ဖြစ်နိုင်သမျှ အလေး ထားလုပ်ဆောင်သွားမည်ဟု နစကမှ ရှေ့လုပ်ငန်းစဉ်အဖြစ် ချမှတ်ထားသည်။

အလားတူ နစကဥက္ကဋ္ဌဗိုလ်ချုပ်မှူးကြီးမင်းအောင်လှိုင်သည်လည်း ပြည်တွင်းငြိမ်းချမ်းရေးကို NCA လမ်း ကြောင်းအတိုင်း ဆက်လက်ဆောင်ရွက်သွားမည်ဟု အသိပေးပြောကြားထားဖူးသည်။