မျိုးကြီး (NSS) - သြဂုတ် ၈

အာရှလမ်းမ၌ မြေပြိုမှုကြောင့် ပျက်စီးခဲ့သော လမ်းပိုင်းအား ပြုပြင်ရန် သွားသည့်အဖွဲ့ ပစ်ခတ်ခံခဲ့ရပြီး ၎င်းလမ်းပိုင်းကို အမြန်ဆုံးပြုပြင်နိုင်ရေး လုံခြုံရေးလိုအပ်နေကြောင်း သတင်းရရှိသည်။

ကရင်ပြည်နယ်၊ မြဝတီ-ကော့ကရိတ် အာရှလမ်းမပေါ် တောနော်ရေတံခွန်းအနီးရှိ ကားလမ်းပိုင်းသည် မိုးသည်းထန်စွာရွာသွန်းခဲ့ပြီး တောင်ကျချောင်းရေစီးဆင်းမှုကြောင့် ယမန်နေ့(သြဂုတ်လ ၇ ရက်) နံနက်ပိုင်းတွင် မြေပြိုကျကာ ပျက်စီးသွားခဲ့သည်။

အလားတူ မြဝတီ-ကော့ကရိတ်သို့ ဆက်သွယ်ထားသည့် အခြားလမ်းကြောင်းတစ်ခုဖြစ်သော ထို့ကော်ကိုးလမ်းသည်လည်း တောင်ကျချောင်းရေများစီးဆင်းမှုကြောင့် ပျက်စီးမှုများ ဖြစ်ပေါ်နေကာ ယာဉ်အသွားအလာများ ရပ်တန့်နေကြောင်း ဒေသခံလူမှုကူညီရေးအသင်းများက ပြောသည်။

လက်ရှိတွင် မြေပြိုမှုကြောင့် ပျက်စီးခဲ့သော မြဝတီ-ကော့ကရိတ်အာရှလမ်းပေါ်ရှိ လမ်းပိုင်းကို အမြန်ဆုံးပြုပြင်နိုင်ရေး လုပ်ဆောင်နေကြောင်း ဆောက်လုပ်ရေးဝန်ကြီးဌာန၊ လမ်းဦးစီးဌာနမှ တာဝန်ရှိသူတစ်ဦးက NSS ကိုပြောသည်။

အဆိုပါလမ်းပိုင်းကို ပြုပြင်နိုင်ရန်အတွက် ကရင်ပြည်နယ်အစိုးရအဖွဲ့မှ တာဝန်ရှိသူများသွားရောက်စစ် ဆေးစဉ်အချိန် ယမန်နေ့ညနေပိုင်းတွင် အကြမ်းဖက်အဖွဲ့၏ ပစ်ခတ်တိုက်ခိုက်ခြင်းကို ခံခဲ့ရကြောင်း ၎င်းက ဆက်လက်ပြောသည်။

“လက်ရှိမှာတော့ လိုအပ်တဲ့ပစ္စည်းတွေ စုဆောင်းနေတယ်။ နယ်မြေအခြေအနေကတော့ နည်းနည်းလေး လုံခြုံရေးလိုအပ်တယ်လေ။ မနေ့က ကျွန်တော်တို့ဆီက တိုင်းညွှန်မှူးနဲ့အဖွဲ့တွေ အဲဒီကိုသွားတယ်။ သွားတဲ့အချိန်မှာ ဟိုဘက်က ပစ်ခတ်တဲ့အနေအထားတွေဖြစ်တော့ လုံခြုံရေးအခြေအနေပေးမှပဲ ကျွန်တော်တို့ ဆောင်ရွက်လို့ရပါမှာ”ဟု လမ်းဦးစီးဌာနမှ တာဝန်ရှိသူက ပြောသည်။

အများပြည်သူအကျိုးအတွက် လမ်းပိုင်းပျက်စီးမှုများအား ပြုပြင်မည့်အဖွဲ့ကို ပစ်ခတ်တိုက်ခိုက်ခြင်းသည် မဖြစ်သင့်ကြောင့်လည်း ၎င်းက သုံးသပ်ပြောကြားသည်။

“နယ်မြေမအေးချမ်းရင်တော့ ဘာမှလုပ်လို့မရဘူး။ ဒါလည်း ပူးပေါင်းပြီးတော့ လုပ်ကြရမှာပေါ့။ လုံခြုံ ရေးအဖွဲ့တွေနဲ့ သက်ဆိုင်ရာနယ်မြေခံအစိုးရအဖွဲ့တွေနဲ့ ကျွန်တော်တို့ ရောက်တာနဲ့ ညှိနှိုင်းပြီး ဆောင် ရွက်ဖို့ ရှိပါတယ်။ သူတို့အခြေအနေပေးမှပဲ ကျွန်တော်တို့ဘက်က ဝန်ထမ်းတွေက ဆက်လက်ဆောင် ရွက်ရမှာပေါ့” ဟု လမ်းဦးစီးဌာနမှ တာဝန်ရှိသူက ထပ်မံပြောကြားသည်။

ယမန်နေ့ ညနေပိုင်းတွင် မြေပြိုပျက်စီးခဲ့သော အာရှလမ်းမ တောနော်ရေတံခွန်အနီးတွင် လက်နက်ကြီး၊ လက်နက်ငယ်များဖြင့် ပစ်ခတ်သံများကြားခဲ့ရကြောင်း ကော့ကရိတ်ဒေသခံတစ်ဦးက NSS ကိုပြောသည်။

“မနေ့ကတော့ ပစ်ခတ်သံတွေကြားတယ်။ ဒီဘက်ကလည်း လက်နက်ကြီးတွေနဲ့ အဲဒီဘက်ကို ပစ်ခတ်တယ်လို့လည်း သိရတယ်။ တိုက်ပွဲဖြစ်တာပေါ့။ ဒီနေ့လည်း ပစ်ခတ်ပြီးတော့ အသိပေးတာတွေရှိတယ်။ မြေပြိုပြီး လမ်းပိုင်းပျက်စီးသွားတဲ့ နေရာတွေ ဖြစ်နေတာပေါ့” ဟု အထက်ပါဒေသခံက ဆက်လက်ပြောသည်။

အလားတူ ယနေ့(သြဂုတ်လ ၈ ရက်) နံနက်ပိုင်းတွင် မြေပြိုကျမှုကြောင့် ပျက်စီးခဲ့သော လမ်းပိုင်းအား သွားရောက်ကြည့်ရှုသူများကိုလည်း ခြောက်လှန့်ပစ်ခတ်မှုများရှိခဲ့ကြောင်း ဒေသခံများက ပြောသည်။

လက်ရှိတွင် ကုန်စည်စီးဆင်းမှုအတွက် အရေးပါသည့် လမ်းကြောင်းဖြစ်သော မြဝတီ-ကော့ကရိတ်အာရှလမ်းသည် ယာဉ်အသွားအလာများရပ်တန့်မှုနှင့်အတူ ကုန်စည်စီးဆင်းမှုများ ရပ်တန့်လျက်ရှိပြီး ကုန် ဈေးနှုန်းများသည်လည်း ကြီးမြင့်လာကြောင်း ဒေသခံများက ပြောသည်။