စော (NSS) - ဇူလိုင် ၃၁

ရန်ကုန်တိုင်း၊ မရမ်းကုန်းမြို့နယ်၊ သမိုင်းမုဒိတာအိမ်ရာရှိ (၄)လွှာတိုက်ပေါ်မှ အသက် (၂၅)နှစ်အရွယ် အမျိုးသားတစ်ဦး ခုန်ချခဲ့ကြောင်း သိရသည်။

ဖြစ်စဥ်မှာ ယမန်နေ့(ဇူလိုင်လ ၃၀ ရက်)၊ ညနေ (၆)နာရီခွဲဝန်းကျင်အချိန်တွင် မရမ်းကုန်းမြို့နယ်၊ အမှတ် (၂)ရပ်ကွက်၊ သမိုင်းမုဒိတာအိမ်ရာ (၁)ရှိ (B)အဆောင်တွင် ဖြစ်ပွားခဲ့ကြောင်း ရွှေရောင်သမိုင်း အရေးပေါ်ကယ်ဆယ်ရေးနှင့် လူမှုအထောက်အကူပြုဖွံ့ဖြိုးရေးအသင်းထံမှ သိရသည်။

“ခုန်ချရတဲ့အကြောင်းအရင်းကတော့ မသိပါဘူး။ နောက်ဖေးပြတင်းပေါက်ကနေ အမျိုးသားတစ်ဦး ခုန်ချတယ်။ သုံးလွှာပေါ်က အခန်း sunshade ကတစ်ဆင့် အောက်ပြုတ်ကျတယ်ဆိုပြီး ကျွန်တော်တို့ဆီကိုဖုန်းဆက်လာတာပါ”ဟု ရွှေရောင်သမိုင်း အရေးပေါ်ကယ်ဆယ်ရေးနှင့် လူမှုအထောက်အကူပြုဖွံ့ဖြိုးရေးအသင်းမှ တာဝန်ရှိသူတစ်ဦးက NSS ကိုပြောသည်။

အဆိုပါအမျိုးသားသည် အသက် (၂၅)နှစ်အရွယ်ရှိပြီး လက်ရှိအချိန်တွင် စိုးရိမ်စရာမရှိသော်လည်း အင်းစိန်ဆေးရုံ၌ ဆေးကုသမှုဆက်လက်ခံယူနေကြောင်း  သိရသည်။

အလားတူ ပြီးခဲ့သည့် ဇူလိုင်လ (၂၆)ရက်၊ နံနက် (၁၀)နာရီခွဲအချိန်တွင်  ဗိုလ်တထောင်မြို့နယ်တွင် တိုက်ခန်း(၈)လွှာမှ အမျိုးသားတစ်ဦး ပြုတ်ကျခဲ့ကြောင်း သိရသည်။