NSS - ဇူလိုင် ၁၈

CDM မလုပ်သည့် မြစ်ငယ်မြို့ မြန်မာ့မီးရထားဆေးရုံမှ ဆေးရုံအုပ်ကြီးအား လုပ်ကြံသတ်ဖြတ်ခဲ့သည့် မြစ်ငယ် PDF အဖွဲ့ဝင်များအား ဖမ်းဆီးရမိကြောင်း နစကမှ ထုတ်ပြန်ထားသည်။

နစကမှ ဇူလိုင် ၁၇ ရက်နေ့ ညပိုင်းတွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

လုံခြုံရေးတပ်ဖွဲ့ဝင်များအနေဖြင့် ပြည်သူများ၏ လျှို့ဝှက်သတင်းပေးတိုင်ကြားမှုအရ ဇူလိုင်(၁၅)ရက်နေ့၊ နေ့လယ်ပိုင်းတွင် အမရပူရမြို့နယ်၊ ဝက်ကုန်းတမာတန်းရပ်ကွက်တွင် မြစ်ငယ် PDF အဖွဲ့မှ သီဟဇော်ထွေးအား ဖမ်းဆီးရမိခဲ့ကြောင်း သိရသည်။

သီဟဇော်ထွေးအား Sig Sauer ပစ္စတို တစ်လက်၊ ၎င်းကျည်အိမ် နှစ်ခု၊ ၎င်းကျည် ၁၀ တောင့်၊ လက်ပစ်ဗုံး နှစ်လုံးတို့နှင့်အတူ ဖမ်းဆီးရမိခဲ့ကြောင်း နစကမှ ဆိုထားသည်။

ထို့နောက် ၎င်း၏ထွက်ဆိုချက်အရ အမရပူရမြို့နယ်၊ ရန်ကုန်- မန္တလေးလမ်းဟောင်းရှိ စွယ်တော်ဘုရားရှေ့တွင် မြစ်ငယ် PDF အဖွဲ့ဝင်များဖြစ်သည့် အောင်ဘိုဘိုသန်း နှင့် လုရီတို့ကိုလည်းကောင်း၊ မြစ်ငယ်လမ်းဆုံ၌ မင်းမင်းဟိန်းကို လည်းကောင်း အသီးသီးထပ်မံဖမ်းဆီးရမိခဲ့ကြောင်း သိရသည်။

ဖမ်းဆီးရမိသူများ၏ ထွက်ဆိုချက်အရ သီဟဇော်ထွေးနှင့် မင်းမင်းဟိန်းတို့သည် ၂၀၂၂ ခုနှစ်၊ အောက်တိုဘာလတွင် မြောင်မြို့နယ်၊ နဂါးပေါက်ကျေးရွာအနီး မြစ်ငယ် PDF အကြမ်းဖက်စခန်း၌ အကြမ်းဖက်ဖောက်ခွဲရေးသင်တန်းအား တက်ရောက်ခဲ့ကြောင်း သိရသည်။

ထို့နောက် ဖမ်းဆီးရန်ကျန်ရှိသည့် ဝင်းထွန်းခေါင်းဆောင်၍ ၎င်းတို့လေးဦးအပါအဝင် စုစုပေါင်း (၁၅)ဦးဖြင့် မြစ်ငယ် PDF အကြမ်းဖက်အဖွဲ့အား ဖွဲ့စည်းခဲ့ကြောင်း ထွက်ဆိုချက်များအရသိရသည်။

ဖမ်းဆီးရမိသူ သီဟဇော်ထွေး၏ ထွက်ဆိုချက်အရ ၂၀၂၃ ခုနှစ်၊ မေလပထမပတ်တွင် အကြမ်းဖက်အုပ်စုအဖြစ်ကြေညာထားသော NUG မှ ဒေါက်တာဇော်ဝေစိုးက မန္တလေးတိုင်း၊ မြစ်ငယ်မြို့ မြန်မာ့မီးရထားဆေးရုံမှ ဆေးရုံအုပ် ဒေါက်တာဒေါ်တင်ချိုချိုသည် CDM မလုပ်သည့်အပြင် CDM လုပ်သွားသည့် ကျန်းမာရေးဝန်ထမ်းများကို ပြန်လည်စည်းရုံးခေါ်ယူနေခြင်းကြောင့် လုပ်ကြံသတ်ဖြတ်ရန် ခိုင်းစေခဲ့ကြောင်း သိရသည်။

အဆိုပါ ခိုင်းစေမှုကြောင့် မေလ(၁၅)ရက်နေ့တွင် မန္တလေးတိုင်း၊ ပလိပ်မြို့၊ ဈေးသစ်ရပ်ကွက်ရှိ “ချို”ဆေးခန်း၌ မြစ်ငယ်မြို့ မြန်မာ့မီးရထားဆေးရုံမှ ဆေးရုံအုပ် ဒေါက်တာဒေါ်တင်ချိုချိုကိုအား ပစ္စတိုသေနတ်ဖြင့် လုပ်ကြံသတ်ဖြတ်ခဲ့ကြောင်း ဖော်ထုတ်သိရှိရသည်။

ထို့ပြင် ဖမ်းဆီးရမိသူများ၏ ဆက်လက်ထွက်ဆိုချက်အရ NUG မှ ဒေါက်တာဇော်ဝေစိုးနှင့် ဝင်းထွန်းတို့၏ စေခိုင်းမှုဖြင့် စဉ့်ကိုင်မြို့အတွင်း အပြစ်မဲ့ပြည်သူများအား လုပ်ကြံသတ်ဖြတ်မှု နှစ်ကြိမ်နှင့် ဖောက်ခွဲမှု တစ်ကြိမ်ကျူးလွန်ခဲ့ကြောင်း သိရသည်။

အထက်ပါဖမ်းဆီးရမိခဲ့သူများအား ဥပဒေအရ ထိရောက်စွာအရေးယူနိုင်‌ရေး ဆက်လက်ဆောင်ရွက်သွားမည်ဖြစ်ကြောင်း နစကမှ ထုတ်ပြန်ထား သည်။