စော (NSS) - ဇူလိုင် ၉

ရန်ကုန်တိုင်း၊ ဗိုလ်တစ်ထောင်မြို့နယ်ရှိ မဟာဗန္ဓုလတံတားပေါ်၌ အရက်မူးနေသူ မောင်းနှင်လာသည့် တွဲကားတစ်စီး ယာဉ်မတော်တဆမှုဖြစ်ပွားခဲ့ရာ အမျိုးသားတစ်ဦး ထိခိုက်ဒဏ်ရာရရှိခဲ့ကြောင်း သိရသည်။

ဖြစ်စဉ်မှာ ယမန်နေ့(ဇူလိုင်လ ၈ ရက်)၊ ညနေ(၃)နာရီခွဲဝန်းကျင်အချိန်တွင် မဟာဗန္ဓုလတံတား၌ အထက်ပါကဲ့သို့ဖြစ်ပွားခဲ့ကြောင်းသိရသည်။

“ယာဉ်မောင်းရော ၊ ယာဉ်အကူရော အရက်တွေသောက်ထားကြတာပါ။ မိုးကလည်းရွာနေတယ်။ ဘရိတ်အုပ်လိုက်တော့ စလစ်ဖြစ်ပြီးနောက်ကတွဲက ခေါင်းကိုပြန်ရိုက်တာပါ။ တံတားဘောင်တော့ တိုက်မိပြီး ကျိုးသွားတယ်”ဟု ရှင်သန်ရေးလူမှုကူညီရေးအသင်းမှ တာဝန်ရှိသူတစ်ဦးက NPNews ကို ပြော သည်။

ယာဉ်မတော်တဆမှုကြောင့် အသက် (၂၃)ဝန်းကျင်အရွယ် စပါယ်ယာအမျိုးသား ထိခိုက်ဒဏ်ရာရရှိခဲ့ပြီး ၎င်းအား ရန်ကုန်ဆေးရုံကြီးသို့ ပို့ဆောင်ထားကြောင်း သိရသည်။