စော (NSS) - ဇွန် ၃ဝ

တနင်္သာရီတိုင်း၊ မြိတ်မြို့တွင် အုတ်များသယ်ဆောင်လာသည့်ကားမှ ဘရိတ်ပေါက်ပြီး ခရီးသည်ကားနှင့်ဘေးတွဲဆိုင်ကယ်အား ဝင်တိုက်မိရာ လူ(၁၂)ဦး ထိခိုက်ဒဏ်ရာရရှိခဲ့ကြောင်း သိရသည်။

ဖြစ်စဉ်မှာ ယနေ့ (ဇွန်လ ၃ဝ ရက်)၊ နံနက်(၈)နာရီခွဲအချိန်တွင် မြိတ်မြို့၊ ကျောက်ဖြူတောင်ကျေးရွာ အုပ်စု၊ မရင်းငယ်ဖျားရွာလမ်းဆုံ၌ အထက်ပါကဲ့သို့ဖြစ်ပွားခဲ့ကြောင်း သစ္စာမေတ္တာသွေးနှင့်လူမှုကူညီရေးအသင်းထံမှ သိရသည်။

အုတ်များသယ်ဆောင်လာသည့် ကားသည် ကော့သောင်းဘက်မှ မြိတ်မြို့ဘက်သို့ မောင်းနှင်လာစဉ် ဘရိတ်ပေါက်ပြီး ယာဉ်တိုက်မှုဖြစ်ပွားခဲ့ကြောင်း သိရသည်။

“အုတ်တွေတင်လာတဲ့ကားက ဘရိတ်ပေါက်သွားတယ်ပြောတယ်။ ဘရိတ်ပေါက်ပြီး ဘေးတွဲဆိုင်ကယ်ကို တိုက်ပြီးမှ ခရီးသည်တွေပါလာတဲ့ အန်စာတုံးကားကို တိုက်မိတယ်ကြားတယ်။ ခရီးသည်ကားပေါ်မှာ ယာဉ်မောင်းအပါ (၉)ယောက်တော့ပါတယ်။ ဘေးတွဲဆိုင်ကယ်မှာတော့ ငါးယောက်ပါလာတယ်။ ငါးယောက်မှာ သုံးယောက်တော့ ထိခိုက်ဒဏ်ရာရသွားတယ်”ဟု သစ္စာမေတ္တာသွေးနှင့်လူမှုကူညီရေးအသင်းမှ တာဝန်ရှိသူတစ်ဦးက NP News ကိုပြောသည်။

ခရီးသည်တင်ကားသည် မြိတ်မြို့မှ ကော့သောင်းဘက်သို့ မောင်းနှင်လာပြီး ယာဉ်ပေါ်တွင် လူ(၉)ဦး လိုက်ပါလာကြောင်း သိရသည်။

ယာဉ်တိုက်မှုကြောင့် အမျိုးသမီး(၆)ဦးနှင့် အမျိုးသား(၆)ဦး ထိခိုက်ဒဏ်ရာရရှိခဲ့ပြီး မြိတ်ပြည်သူဆေးရုံကြီးသို့ပို့ဆောင်ထားကြောင်း သိရသည်။