NSS - ဇွန် ၂၅

ကျောက်ကြီး - နတ်သံကွင်း သွယ်တန်းထားသော တံတားတစ်စင်းကို KNLA - PDF ပူးပေါင်းအဖွဲ့က မိုင်းခွဲဖျက်ဆီးခဲ့ကြောင်း သတင်းရရှိသည်။ 

ဖြစ်စဉ်မှာ ယနေ့ (ဇွန်လ ၂၅ ရက်)၊ နေ့လည် (၁၂)နာရီ အချိန်ခန့်တွင် ပဲခူးတိုင်း၊ ကျောက်ကြီးမြို့နယ်၊ ရန်မျိုးအောင် ကျေးရွာအထွက်ရှိ တံတား၌ ဖြစ်ပွားခဲ့ကြောင်း သိရသည်။ 

KNLA - PDF ပူးပေါင်းအဖွဲ့သည် အဆိုပါရန်မျိုးအောင်ကျေးရွာအထွက်ရှိ ကျောက်ကြီး - နတ်သံကွင်း သွယ်တန်းထားသော တံတားသို့ ရောက်ရှိလာပြီး မိုင်းခွဲဖျက်ဆီးသွားခဲ့ရာ တံတားမှာပြိုကျပျက်စီးသွားခဲ့ပြီး လူနှင့် မော်တော်ယာဉ်များသွားလာ၍ မရတော့ကြောင်း သိရသည်။ 

အဆိုပါတံတားသည် တပ်မတော်၏ လက်နက် နှင့် ရိက္ခာထောက်ပို့ရန် အဓိက အသုံးပြုသော တံတားတစ်စင်းဖြစ်သောကြောင့် ချိုးဖျက်ခဲ့ကြောင်း  KNLA / PDF kyaukkyi - ကျောက်ကြီး မှ ထုတ်ပြန်ထား သည်ကို တွေ့ရသည်။

ကျောက်ကြီးမြို့နှင့် နတ်သံကွင်းမြို့တို့အား ဆက်သွယ်ထားသည့် လမ်းပိုင်းများပေါ်ရှိ တံတားများသည် မကြာခဏဆိုသလို မိုင်းခွဲဖျက်ဆီးခံရမှုများရှိနေပြီး ဒေသခံပြည်သူလူထုအနေဖြင့် ကျန်းမာရေး၊ လူမှုရေးကိစ္စနှင့်ပတ်သက်၍ ဆက်သွယ်သွားလာရာတွင် အခက်အခဲများ ဖြစ်ပေါ်နေကြောင်း ဒေသခံများက ပြောဆိုထားကြသည်။

အထက်ပါဖြစ်စဉ်နှင့် ပတ်သက်၍ နစက သတင်းထုတ်ပြန်ရေးအဖွဲ့က တစ်စုံတစ်ရာ ထုတ်ဖော်ပြောဆိုခြင်း မရှိသေးပေ။

အလားတူပြီးခဲ့သည့် ဇွန်လ ၆ ရက်ကလည်း PDF ပူးပေါင်းအဖွဲ့သည် နတ်သံကွင်းစစ်တောင်းမြစ်ကူးတံတား၌ လုံခြုံရေးယူနေသည့် အဖွဲ့ကို လာရောက်တိုက်ခိုက်ပြီးနောက် တံတားအား ဖောက်ခွဲဖျက်ဆီးခဲ့သည့် ဖြစ်စဉ်ဖြစ်ပွားခဲ့သည်။