ယွန်း (NSS) - ဇွန် ၂၂

စစ်တွေပြည်သူ့ဆေးရုံကြီး အပါအဝင် စစ်တွေမြို့ရှိ ပညာရေးနှင့် ကျန်းမာရေးဆိုင်ရာနေရာ(၉)ခု၌ အင်တာနက်ဝန်ဆောင်မှုကို (၃)နှစ်အခမဲ့အသုံးပြုနိုင်ရန် ဆောင်ရွက်နေကြောင်း နစကမှ သိရသည်။

ပညာ‌ရေး၊ ကျန်းမာရေးနှင့် လူမှုရေးကဏ္ဍများတွင် အသုံးပြုနိုင်ရန်အတွက် အော်ပရေတာ(၄)ခုမှ အင်တာနက်ဝန်ဆောင်မှုကို သုံးနှစ်အခမဲ့ အသုံးပြုနိုင်ရေးကို စီစဥ်ဆောင်ရွက်နေကြောင်း သိရသည်။

ထိုသို့ ဆောင်ရွက်ရာ၌ စစ်တွေပြည်သူ့ဆေးရုံကြီးနှင့် ကွန်ပျူတာတက္ကသိုလ်တွင် MPT ကလည်းကောင်း၊ စစ်တွေတက္ကသိုလ်၊ စစ်တွေပြည်သူ့ဆေးရုံကြီး၊ ဗုဒ္ဓတက္ကသိုလ်နှင့် မြောက်ဦးဓမ္မစင်တာတို့၌ MYTEL ကလည်းကောင်း ဆောင်ရွက်ပေးလျက်ရှိကြောင်း သိရသည်။

အလားတူ သူနာပြုသင်တန်းကျောင်းနှင့် အစိုးရနည်းပညာအထက်တန်းကျောင်းတို့တွင် ATOM ကလည်း ကောင်း၊ စစ်တွေနည်းပညာတက္ကသိုလ်နှင့် တိုင်းရင်းဆေးရုံကြီးတို့၌ OOREDOO ကလည်းကောင်း ‌အင်တာနက်ဝန်ဆောင်မှုအတွက် ဆောင်ရွက်ပေးလျက်ရှိကြောင်း သိရသည်။

ထို့ပြင် ဆက်သွယ်ရေး‌အော်ပရေတာများမှ ၎င်းတို့၏ မိုဘိုင်းဖုန်းအချင်းချင်းခေါ်ဆိုမှုကို ဇွန်လ(၁၅)ရက်မှ (၃ဝ)ရက်အထိ အကန့်အသတ်မဲ့ဖုန်းခေါ်ဆိုခွင့်၊ SMS အခမဲ့ပေးပို့ခွင့်နှင့် အင်တာနက်ဒေတာ စုစုပေါင်း (5 GB)တို့ကို ဆောင်ရွက်ပေးခဲ့ပြီးဖြစ်ကြောင်း သိရသည်။

မိုခါမုန်တိုင်း မကျရောက်မီက ရခိုင်ပြည်နယ်တွင် ဆက်သွယ်ရေးအော်ပရေတာ(၄)ခု၏ မိုဘိုင်းစခန်းပေါင်း (၁၂၃၃)ခုရှိခဲ့ကြောင်း သိရသည်။

သို့သော် ပြီးခဲ့သည့် မေလ(၁၄)ရက်တွင် တိုက်ခတ်ခဲ့သည့် ဆိုင်ကလုန်းမုန်တိုင်းမိုခါကြောင့် အဆိုပါ မိုဘိုင်းစခန်းများအနက် စခန်းပေါင်း (၉ဝ၄)ခုဆက်သွယ်မှု ပြတ်တောက်သွားခဲ့ကြောင်း သိရသည်။

ပြီးခဲ့သည့် မေလ(၂၃)ရက်အထိ မိုဘိုင်းစခန်းပေါင်း(၆၄၇)ခုကို ပြန်လည်ပြုပြင်နိုင်ခဲ့ပြီး ယခင်မိုဘိုင်းစခန်းများ အပါအဝင် စုစုပေါင်း မိုဘိုင်းစခန်း (၉၇၆)ခုကို ပြုပြင်ပြီးစီးပြီးဖြစ်ကြောင်း သိရသည်။