ယွန်း (NP News) - ဇွန် ၂၂

မူပိုင်ခွင့်ဥပဒေ(၄)ရပ်အနက်မှ ကျန်ရှိနေသည့် မူပိုင်ခွင့်ဥပဒေ(၃)ရပ်ကို အာဏာတည်နိုင်ရေးအတွက် အကောင်အထည်ဖော်ဆောင်ရွက်ရန် နစကဝန်ကြီးမှ တိုက်တွန်းပြောဆိုထားသည်။

မူပိုင်ခွင့်ဆိုင်ရာဗဟိုကော်မတီဥက္ကဋ္ဌ ဒုတိယဝန်ကြီးချုပ်နှင့် ပြည်ထောင်စုဝန်ကြီး ဗိုလ်ချုပ်ကြီး မြထွန်းဦးက ဇွန်လ (၂၁)ရက်တွင် နေပြည်တော်ရှိ ဝန်ကြီးဌာန၏ ညီလာခံခန်းမ၌ ကျင်းပခဲ့သော မူပိုင်ခွင့်ဆိုင်ရာ ဗဟိုကော်မတီအစည်းအဝေး၌ အထက်ပါကဲ့သို့ ပြောခဲ့ခြင်းဖြစ်သည်။

မြန်မာနိုင်ငံ၌ ပြီးခဲ့သည့် ၂ဝ၁၉ ခုနှစ်တွင် မူပိုင်ခွင့်ဥပဒေ(၄)ရပ်ဖြစ်သည့် ကုန်အမှတ်တံဆိပ်မူပိုင်ခွင့်ဥပဒေ အပါအဝင် စက်မှုဒီဇိုင်းမူပိုင်ခွင့်ဥပဒေ၊ တီထွင်မှုမူပိုင်ခွင့်ဥပဒေ၊ စာပေနှင့် အနုပညာမူပိုင်ခွင့်ဥပဒေတို့ကို အတည်ပြုပြဋ္ဌာန်းခဲ့ပြီးဖြစ်ကြောင်း သိရသည်။

အဆိုပါ မူပိုင်ခွင့်ဥပဒေ(၄)ရပ်အနက် ကုန်အမှတ်တံဆိပ်မူပိုင်ခွင့်ဥပဒေကို ယခုနှစ်(၂ဝ၂၃ ခုနှစ်)၊ ဧပြီလ (၁)ရက်တွင် အာဏာတည်ခဲ့၍ အမှတ်တံဆိပ်မှတ်ပုံတင်ခြင်းကို တရားဝင်လက်ခံခဲ့ပြီး ဧပြီလ(၂၆)ရက်တွင် စတင်ဆောင်ရွက်ခဲ့ကြောင်း ပြည်ထောင်စုဝန်ကြီးက ဆိုသည်။

ထို့ပြင် မူပိုင်ခွင့်ဥပဒေ(၄)ရပ်အနက် ဆက်လက်ဆောင်ရွက်ရမည့် စက်မှုဒီဇိုင်းမူပိုင်ခွင့်ဥပဒေ အပါအဝင် တီထွင်မှုမူပိုင်ခွင့်ဥပဒေ၊ စာပေနှင့် အနုပညာမူပိုင်ခွင့်ဥပဒေတို့ကို အာဏာတည်နိုင်‌ရေး အကောင်အ ထည်ဖော်ဆောင်ရွက်ရန် ၎င်းက တိုက်တွန်းပြောဆိုထားသည်။

လက်ရှိတွင် မူပိုင်ခွင့်ဗဟိုကော်မတီ၌ မူပိုင်ခွင့်ဆိုင်ရာ ပညာရှင်များကို ရွေးချယ်ပြီးဖြစ်၍ ထည့်သွင်းဖွဲ့စည်းနိုင်ရေးကို ဆောင်ရွက်လျက်ရှိကြောင်း သိရသည်။

ထို့ပြင် မြန်မာနိုင်ငံသည် ကမ္ဘာ့ကုန်သွယ်ရေးအဖွဲ့နှင့် ကမ္ဘာ့မူပိုင်ခွင့်အဖွဲ့တို့တွင် အဖွဲ့ဝင်နိုင်ငံဖြစ်သည်နှင့်အညီ ကုန်သွယ်ရေးဆိုင်ရာ မူပိုင်ခွင့်စာချုပ်ကို လိုက်နာဆောင်ရွက်ရန်လိုအပ်ကြောင်း ပြည်ထောင်စုဝန်ကြီးက ဆိုထားသည်။

အာဆီယံဒေသတွင်းနိုင်ငံများအနေဖြင့် ရင်းနှီးမြှုပ်နှံမှု၊ ကုန်စည်စီးဆင်းမှုများ တိုးတက်စေရန်နှင့် စီးပွား ရေးဖွံ့ဖြိုးတိုးတက်မှုကို အထောက်အကူပြုသည့် မူပိုင်ခွင့်စနစ်များကို ဆောလျင်စွာအကောင်အထည် ဖော်ကျင့်သုံးနေကြောင်း သိရသည်။

သို့ဖြစ်၍ မြန်မာနိုင်ငံအနေဖြင့် အခြားအာဆီယံအဖွဲ့ဝင်နိုင်ငံများနှင့် တန်းတူရင်ပေါင်တန်းဆောင်ရွက်နိုင်ရေးကို ကြိုးပမ်းဆောင်ရွက်ရန် ပြည်ထောင်စုဝန်ကြီးက တိုက်တွန်းပြောဆိုထားသည်။