NP News - ဇွန် ၄

မြန်မာနိုင်ငံသို့ တင်သွင်းလာသည့် EV ကားအချို့၌ မည်သည့်အာမခံချက်မှမရှိကြောင်း EV ကားလောကမှ စုံစမ်းသိရှိရသည်။

မြန်မာနိုင်ငံတွင် ရောင်းဝယ်မှုပြုလုပ်နေသည့် အချို့သော EV ကုမ္ပဏီများသည် EV Showroom ဖွင့်လှစ်ရောင်းချရန် လိုင်စင်တင်သွင်းထားခြင်းမရှိကြောင်း သိရသည်။

ထိုသို့ တရားဝင်တင်သွင်းထားခြင်းမရှိသည့်အတွက် EV ကားသုံးစွဲသူများအနေဖြင့် EV များကို ဝယ်ယူပြီးနောက် ဖြစ်ပေါ်လာသည့် ပြဿနာများနှင့် ပတ်သက်၍ သက်ဆိုင်ရာကုမ္ပဏီဘက်မှ မည်သည့်အာမခံချက်မှ ရရှိနိုင်မည်မဟုတ်ကြောင်း EV ကားအကြောင်း ကျွမ်းကျင်နားလည်သူတစ်ဦးက NP News ကို အသိပေးပြောဆိုထားသည်။

“အခုမြန်မာနိုင်ငံမှာ လာရောင်းနေတဲ့ EV ကားအချို့ဆိုရင်လည်း ဝယ်ပြီးရင် After Sale Service က ဘယ်လို အာမခံချက်ပေးမှာလဲ။ ဘတ္ထရီကိုရောဘယ်သူက အာမခံချက်ပေးမှာလဲ။ အားလုံးက ဘာအာမခံချက်မရှိဘူးလေ။ Original manufacture က လာလုပ်တာ မဟုတ်တဲ့အတွက် အာမခံချက်မရှိဘူး။ ပျက်သွားလို့ ပြင်ချင်ရင်တောင် showroom မရှိဘူး” ဟု ၎င်းက NP News ကို အသိပေးပြောဆိုထားသည်။

မြန်မာနိုင်ငံရှိ EV ကားတင်သွင်းခွင့်ရရှိသည့် ကုမ္ပဏီအချို့သည် တရုတ်နိုင်ငံသို့ သွားရောက်ပြီး ကားများကို ဝယ်ယူကာ ပြန်လည်ရောင်းချခြင်းမျိုး များပြားကြောင်း သိရသည်။

EV ကားတင်သွင်းမည့် ကုမ္ပဏီသည် အရောင်းပြခန်းဖွင့်လှစ်ခွင့် လက်မှတ်ရရှိထားခြင်းမရှိသေးသော် လည်း တင်သွင်းမည့် လျှပ်စစ်သုံးယာဉ်၏ အမှတ်တံဆိပ် တစ်ခုစီအတွက် ရောင်းချသည့် ကုမ္ပဏီနှင့်ချုပ်ဆိုထားသည့် အရောင်းအဝယ်သဘောတူစာချုပ်တင်ပြရမည်ဖြစ်ပြီး တင်သွင်းမည့် လျှပ်စစ်သုံးယာဉ်များအတွက် လိုအပ်သည့် အာမခံမှု၊ အပိုပစ္စည်းများ (Spare Parts)ရရှိနိုင်မှုနှင့် သုံးစွဲပြီးနောက်ပိုင်း ပြင်ဆင်မှုများကို ဆောင်ရွက်နိုင်သည့် အစီအမံထားရှိရမည်ဟု စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနက အသိပေးကြေညာထားပြီးဖြစ်သည်။

သို့သော်လည်း လက်ရှိ ပြည်တွင်းဈေးကွက်၌ ရောက်ရှိနေသည့် အချို့သော EV ကားများသည် သတ်မှတ်ချက်များကို ပြည့်စုံအောင် ဆောင်ရွက်ထားခြင်းမရှိသည့်အတွက် ခိုင်လုံသည့် အာမခံချက်မရှိကြောင်း သိရသည်။

“ဟိုနေ့ကဆိုရင် BYD တစ်စီးတိုက်သွားတယ် ပြီးတော့ ကားနဲ့ပတ်သက်တာတွေ ဘာမှပြန်ဝယ်လို့မရတော့ဘူး။ Body ကတော့ ထုလို့ရတယ်။ ဘာမှတော့ ပြန်ထွက်မလာဘူး ကော်တွေပဲဆိုတော့။ ကျန်တဲ့ဟာတွေလည်း ဝယ်လို့မရဘဲ အချိန်တစ်ခုအထိထိုင်စောင့်နေမှရမယ်။ ကားကလည်း မောင်းလို့မှမရတော့တာ။ ကား(၂)စီး၊ (၃)စီး အပိုရှိနေတဲ့သူတွေလောက်ပဲ ဝယ်စီးလို့အဆင်ပြေမှာ” ဟု ၎င်းက ဆက်လက်ပြောဆိုထားသည်။

လက်ရှိတွင် စျေးကွက်အတွင်း၌ ငွေကျပ်သိန်းထောင်ကျော်အထိ ပေါက်ဈေးရှိ‌နေသည့် EV ကားများရှိသကဲ့သို့ ငွေကျပ်သိန်းရာဂဏန်းသာရှိသည့် EV ကားများလည်း ရှိကြောင်း စုံစမ်းသိရှိရသည်။

EV ကားများကို လောင်စာဆီစရိတ်လျှော့ချနိုင်ရန် အသုံးပြုလိုသော်လည်း အဆိုပါသုံးစွဲမှုအတွက် လုံခြုံမှု၊ အရည်အသွေးပြည့်ဝမှု၊ အာမခံချက်ရှိမှုများအပေါ်တွင်လည်း မေးခွန်းထုတ်မှုများရှိနေသည်။

ပြည်သူများအနေဖြင့် လျှပ်စစ်ကားနှင့် အားသွင်းစက်များ ဝယ်ယူသုံးစွဲရာ၌ စိတ်ကျေနပ်မှုမရှိပါက တိုင်ကြားနိုင်ကြောင်း နစက၏ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနက ပြီးခဲ့သည့် လပိုင်းကအသိပေးကြေညာထားသည်။