ALynn (NSS) - ဩဂုတ် ၇

 ဘင်္ဂလားဒေ့ရှ်နိုင်ငံတွင် လူထုဆန္ဒပြမှုများကြောင့် ကာလကြာအုပ်ချုပ်ခဲ့သော ဝန်ကြီးချုပ် ရှိတ်ဟာစီနာထွက်ပြေးသွားခဲ့ပြီးနောက် ယာယီအစိုးရကို ဦးဆောင်ရန် နိုဘယ်လ်ဆုရှင် အသေးစား ငွေရေးကြေးရေး လုပ်ငန်း၏ ရှေ့ဆောင် မိုဟာမက်ယူနွတ်စ်ကို ရွေးချယ်ကြောင်း ဗုဒ္ဓဟူးနေ့ (သြဂုတ်လ ၇ ရက်) အစောပိုင်းတွင် ကြေညာခဲ့သည်။ 

ဆန္ဒပြကျောင်းသား ခေါင်းဆောင်များက ဘင်္ဂလားဒေ့ရှ်နိုင်ငံသား သန်းပေါင်းများစွာကို ဆင်းရဲတွင်းမှ ဖယ်ရှားပေးခဲ့သော အသက် ၈၄ နှစ်အရွယ် ယူနွတ်စ်ကို နိုင်ငံအား ဦးဆောင်ဖို့ တောင်းဆိုခဲ့ပြီးနောက် ယခုလို ခန့်အပ်မှုက မြန်မြန်ဆန်ဆန် ဖြစ်လာခဲ့ခြင်းဖြစ်သည်။

ယာယီအစိုးရတွင် ယူနွတ်စ်အား အကြီးအကဲအဖြစ်ထားရှိရန် ဆုံးဖြတ်ချက်သည် သမ္မတ Mohammed Shahabuddin၊ စစ်ခေါင်းဆောင်များနှင့် ဆန္ဒပြကျောင်းသားများအဖွဲ့ (SAD) မှ ခေါင်းဆောင်များ၏ တွေ့ဆုံဆွေးနွေးမှုမှတစ်ဆင့် ဆုံးဖြတ်ခဲ့ခြင်းဖြစ်သည်ဟု Shahabuddin က သတင်းစာရှင်းလင်းပွဲတွင် ပြောကြားခဲ့သည်။

အသက် ၇၆ နှစ်အရွယ် ဟာစီနာသည် ၂၀၀၉ ခုနှစ်ကတည်းက အာဏာရခဲ့သော်လည်း ၂၀၂၄ ခုနှစ်၊ ဇန်နဝါရီ ရွေးကောက်ပွဲတွင် မဲလိမ်မှုဖြင့် စွပ်စွဲခံခဲ့ရပြီး ပြီးခဲ့သည့်လတွင် သန်းနှင့်ချီသော လူများက လမ်းမပေါ်ထွက်ကာ ရာထူးမှနုတ်ထွက်ရန် တောင်းဆိုဆန္ဒပြခဲ့ကြသည်။ ဆူပူအုံကြွမှုကို နှိမ်နင်းရန် လုံခြုံရေးတပ်ဖွဲ့ဝင်များက ကြိုးပမ်းခဲ့သော်လည်း ဆန္ဒပြမှုများ ကြီးထွားလာကာ နောက်ဆုံး၌ ဟာဆီနာသည် ရဟတ်ယာဉ်ဖြင့် ဩဂုတ်လ ၅ ရက်တွင် ထွက်ပြေးသွားခဲ့သည်။

စစ်တပ်အကြီးအကဲ ဗိုလ်ချုပ်ကြီး Waker-Uz-Zaman က “အကြမ်းဖက်မှုတွေကို ရပ်တန့်ဖို့ အချိန်ကျပြီ”ဟု ပြောသည်။ အင်္ဂါနေ့ (ဩဂုတ်လ ၆ ရက်) တွင် သမ္မတသည် ကျောင်းသား ခေါင်းဆောင်များနှင့် အဓိကအတိုက်အခံ ဘင်္ဂလားဒေ့ရှ်အမျိုးသားပါတီ(BNP)တို့၏ တောင်းဆိုချက်အရ ပါလီမန်ကို ဖျက်သိမ်းခဲ့ပြီး (၃)လအတွင်း ရွေးကောက်ပွဲများ ကျင်းပရန်လည်း ရည်ရွယ်ထားသည်။

အင်္ဂါနေ့က စစ်တပ်သည် ဟာစီနာနှင့်နီးစပ်သော ထိပ်တန်းဗိုလ်ချုပ်အများအပြားကို ရာထူးမှဖြုတ်ချခဲ့ပြီး Rapid Action Battalion အရံတပ်ဖွဲ့၏ တပ်မှူးတစ်ဦးဖြစ်သည့် Ziaul Ahsan ကိုလည်း ထုတ်ပယ်ခဲ့သည်။ ဝန်ကြီး ချုပ်ဟောင်းဖြစ်သလို BNP ပါတီ၏ဥက္ကဋ္ဌလည်းဖြစ်သည့် ခါလီဒါဇီယာ (၇၈)နှစ်ကိုလည်း နေအိမ်အကျယ်ချုပ်မှ ပြန်လွှတ်ပေးခဲ့ကြောင်း သမ္မတရုံး၏ ထုတ်ပြန်ချက်အရသိရသည်။

မြို့တော်ရှိ လမ်းများသည် အင်္ဂါနေ့တွင် အများအားဖြင့် ငြိမ်သက်အေးဆေးနေပြီး ယာဉ်ကြောပိတ်ဆို့မှုများ ပြန်လည်စတင်ခြင်း၊ ဈေးဆိုင်များဖွင့်လှစ်ခြင်းနှင့် နိုင်ငံတကာလေကြောင်း ခရီးစဉ်များ ပြန်လည်စတင်ခြင်းတို့ဖြင့် ပုံမှန်လည်ပတ်လာခဲ့သည်။ သို့သော် အနည်းဆုံး လူ ၁၂၂ ဦး သေဆုံးခဲ့သည့် အကြမ်းဖက်မှုအပြီး တစ်ရက်အကြာတွင် အစိုးရရုံးများကို ပိတ်ထားဆဲဖြစ်သည်။ International Crisis Group မှ Thomas Kean က အာဏာပိုင်အသစ်များသည် စိန်ခေါ်မှုများစွာကို ရင်ဆိုင်ရနိုင်ကြောင်း ပြောကြားခဲ့သည်။ 

“အခု အာဏာရလာမယ့် ကြားဖြတ်အစိုးရဟာ မကြာသေးမီနှစ်တွေအတွင်း ဆိုးရွားစွာ ပျက်စီးသွားခဲ့တဲ့ ဘင်္ဂလားဒေ့ရှ်ရဲ့ ဒီမိုကရေစီပြန်လည်တည် ဆောက်ရေး တာဝန်ကို စတင်ဖို့ လိုအပ်ပါတယ်” ဟု ၎င်းက ဆိုသည်။