ဂျန်ဇက် (NSS) - ဇူလိုင် ၈

ယူကရိန်းရေတပ်ဟာ ရုရှားတပ်ဖွဲ့တွေကို ရင်ဆိုင်ရာမှာ ပိုမိုကောင်းမွန်စေဖို့ ရေငုပ်သင်္ဘောများကူညီထောက်ပံ့ပေးဖို့ အနောက်အုပ်စုနိုင်ငံများကို ထပ်မံတောင်းဆိုလိုက်ကြောင်းသိရပါတယ်။ ယူကရိန်းရေတပ်အကြီးအကဲက ယူကရိန်းဟာ ပင်လယ်နက်ဒေသမှာ စစ်ရေးစွမ်းရည် ပိုမိုကောင်းမွန်စေဖို့ ရေငုပ်သင်္ဘောလိုအပ်ကြောင်း ရေအောက်မှာရေငုပ်သင်္ဘောဖြန့်ကြက်ချထားမယ်ဆိုရင် ရုရှားနဲ့ဖြစ်ပွားနေတဲ့တိုက်ပွဲတွေအတွင်း ပင်လယ်နက်ဒေသတစ်လျှောက်မှာ ယူကရိန်းရဲ့ရပ်တည်ချက်တွေ ပိုမိုကောင်းမွန်လာမှာဖြစ်ကြောင်း ပြောပါတယ်။ 

ဒါ့ပြင် ယူကရိန်းရေတပ်ဟာ ပင်လယ်နက်ဒေသမှာဖြန့်ကြက်ချထားဖို့ ကြီးမားတဲ့ ရေငုပ် သင်္ဘောမလိုအပ်ကြောင်း ယူကရိန်းရေတပ်တပ်ဖွဲ့အကြီးအကဲက ပြောပါတယ်။ ရုရှားနဲ့ယူကရိန်းစစ်ပွဲဖြစ်ပွားခဲ့တဲ့ ၂၀၂၂ ခုနှစ် ဖေဖော်ဝါရီလနောက်ပိုင်းတည်းက အနောက်အုပ်စုနိုင်ငံတွေဟာ ယူကရိန်းကို စစ်လက်နက်ပစ္စည်းတွေ ကူညီထောက်ပံ့ပေးခဲ့ပြီး လက်ရှိအချိန်မှာလည်း တိုက်လေယာဉ်တွေကူညီပေးဖို့ စီစဉ်နေပါတယ်။ ယူကရိန်းနဲ့ ရုရှားကြားဖြစ်ပွားနေတဲ့စစ်ပွဲဟာ သုံးနှစ်အတွင်းရောက်ရှိလာချိန်မှာ အနောက်အုပ်စုနိုင်ငံတွေဟာ ယူကရိန်းကိုပေးမယ်လို့ ကတိပေးထားတဲ့ စစ်လက်နက်ပစ္စည်းတွေ ကူညီထောက်ပံ့ပေးဖို့ နှောင့်နှေးမှုတွေရှိလာခဲ့ကြောင်း သိရပါတယ်။ 

ယူကရိန်းရေတပ်အကြီးအကဲက "ရေတပ် တပ်ဖွဲ့အစိတ်အပိုင်းအဖြစ် ကျွန်တော်တို့ဟာ ရေငုပ်သင်္ဘောတွေ လိုအပ်တယ်။ ကျွန်တော်ဟာ အဲဒီအချက်ကို စဉ်းစားမိတယ်"လို့ပြောပါတယ်။ ယူကရိန်းဟာ စစ်ပွဲဖြစ်ခဲ့ပြီးနောက်ပိုင်းတည်းက ခေတ်မီလက်နက်တွေ ရယူနိုင်ဖို့ အမေရိကန်ဦးဆောင်တဲ့အနောက်အုပ်စုနိုင်ငံတွေကို အကူအညီတောင်းခံခဲ့ရာ အနောက်အုပ်စုနိုင်ငံများက အမေရိကန်ဒေါ်လာ ဘီလျံနဲ့ချီပြီး အကူအညီပေးထားကြောင်းသိရပါတယ်။