ဂျန်ဇက် (NSS) - ဧပြီ ၂ဝ

ယူကရိန်းဟာ အမေရိကန်အစိုးရထံကနေ အကူအညီအသစ်တွေထပ်မံမရတော့ဘူးဆိုရင် ဒီနှစ်အတွင်းမှာပဲ စစ်ရှုံးသွားဖွယ်ရှိနေကြောင်း အမေရိကန် ထောက်လှမ်းရေးအဖွဲ့အကြီးအကဲက ထုတ်ဖော်သတိပေးလိုက်ပါတယ်။

အမေရိကန် စီအိုင်အေ ထောက်လှမ်းရေးအဖွဲ့အကြီးအကဲ ဝီလျံဘရမ်းစ်က အမေရိကန်အစိုး ရဟာ ယူကရိန်းအတွက် အကူအညီအသစ်များထပ်မံမပေးတော့ဘူးဆိုရင် ဒီနှစ်အတွင်းမှာပဲ ယူကရိန်းရဲ့ကာကွယ်ရေးလုပ်ငန်းတွေ ပြိုလဲသွားဖွယ်ရှိနေပြီး ရုရှားကို ဖိအားပေးနိုင်မှာမဟုတ်ကြောင်း ပြောပါတယ်။

အမေရိကန်အစိုးရဟာ ယူကရိန်းကိုအမေရိကန်ဒေါ်လာ ၆၁ ဘီလျံကျော်ကို အကူအညီပေးဖို့ စီစဉ်နေပေမယ့် အမေရိကန်အောက်လွှတ်တော်က ကန့်ကွက်ဆန့်ကျင်မှုများရှိနေကြောင်းသိရပါတယ်။ အမေရိကန်အောက်လွှတ်တော် အကြီးအကဲဟာ ကာလအတန်ကြာနှောင့်နှေးတဲ့ ယူကရိန်းကို အကူအညီပေးမယ့် အမေရိကန်အစိုးရရဲ့အစီအစဉ်တွေကို မဲခွဲဆုံးဖြတ်ဖို့ စီစဉ်နေတယ်လို့လည်း သတင်းများထွက်ပေါ်နေပါတယ်။ စီအိုင်အေထောက်လှမ်းရေးအဖွဲ့အကြီး အကဲက အမေရိကန်လွှတ်တော်ကို ယူကရိန်းအပေါ် ကူညီပေးမယ့် ငွေကြေးများကို ချက်ချင်းခွင့်ပြုပေးဖို့ ထပ်မံတောင်းဆိုခဲ့ခြင်းမျိုးဖြစ်ပါတယ်။ စီအိုင်အေ ညွှန်ကြားရေးမှူး ဝီလျံဘရမ်းစ့်က "အမေရိကန်အပါအဝင် အနောက်အုပ်စုနိုင်ငံတွေဟာ ယူကရိန်းကို ကူညီပေးဖို့ အေးစက်ခဲ့မယ်ဆိုရင် ယူကရိန်းဟာ ကြီးမားတဲ့အခက်အခဲတွေနဲ့ရင်ဆိုင်ရမယ်။ ကျွန်တော်ရဲ့အမြင်အရတော့ ယူကရိန်းဟာ အမေရိကန်အစိုးရရဲ့အကူအညီတွေထပ်မံမရတော့ဘူးဆိုရင် ၂၀၂၄ ခုနှစ်အကုန်မှာ ရင်ဆိုင်နေရတဲ့တိုက်ပွဲတွေက အရှုံးနဲ့ရင်ဆိုင်ရဖွယ်ရှိနေပါတယ်။" လို့ပြောပါတယ်။

ယူကရိန်းကို ကူညီထောက်ပံ့ပေးဖို့ ပျက်ကွက်မယ်ဆိုရင် အခက်အခဲပြဿနာတွဟာ ဥရောပ တိုက်ကိုကျော်လွန်လာဖွယ်ရှိနေကြောင်း စီအိုင်အေထောက်လှမ်းရေးအဖွဲ့အကြီးအကဲကပြောပါတယ်။ ယူကရိန်း နဲ့ ရုရှားနိုင်ငံကြားဖြစ်ပွားနေတဲ့စစ်ပွဲဟာ သုံးနှစ်ထဲကိုရောက်ရှိလာချိန်မှာ လက်ရှိအချိန်အထိ အပစ်ခတ်ရပ်စဲရေး လုပ်ဆောင်နိုင်ခြင်းမရှိဘဲ တိုက်ပွဲများ ဆက် လက်ဖြစ်ပွားနေဆဲဖြစ်ပါတယ်။ ယူကရိန်းဟာ သိမ်းပိုက်ခံထားရတဲ့နယ်မြေတွေကို ရုရှားနိုင်ငံထံကနေ ပြန်လည်ရယူဖို့ ကြိုးပမ်းနေပေမယ့် မျှော်လင့်သလောက် ရလဒ်မကောင်းဘဲဖြစ်နေကြောင်းသိရပါတယ်။