ALynn (NSS) - မတ် ၂၃

ဗင်နီဇွဲလားသမ္မတ ရွေးကောက်ပွဲတွင် အတိုက်အခံခေါင်းဆောင် မာရီယာ ကော်ရီနာ မာချာဒိုသည် အရွေးချယ်ခံခွင့် ပိတ်ပင်ခံထားရသောကြောင့် သူမ၏ နေရာတွင် အခြားကိုယ်စားလှယ်လောင်း တစ်ဦးကို အစားထိုးသွားမည်ဖြစ်ကြောင်း ကြေညာခဲ့သည်။ 

အဆိုပါ ကိုယ်စားလှယ်လောင်းသည် အသက် ၈၀ နှစ်အရွယ် သမိုင်းပညာရှင် ပါမောက္ခ Corina Yoris ဖြစ်ပြီး ဇူလိုင် ၂၈ ရွေးကောက်ပွဲတွင် မာချာဒိုအစား ဝင်ရောက်ယှဉ်ပြိုင်သွားမည်ဖြစ်သည်။ သမ္မတ နီကိုလက်စ်မာဒူရိုအစိုးရ အဖွဲ့သည် မာချာဒိုအပေါ် ဖိအားပေးခြင်းများ လုပ်ဆောင်နေသောကြောင့် နိုင်ငံ တကာ၏ ပြစ်တင်ရှုတ်ချခြင်းများခံနေရ‌စဉ် မတ်လ ၂၂ ရက် (သောကြာနေ့) ၌ အဆိုပါ ကြေညာချက် ထွက်ပေါ်လာခြင်း ဖြစ်သည်။ အစောပိုင်းနေ့ရက်များအတွင်းက မာချာဒို၏မဲဆွယ်စည်းရုံးရေးအဖွဲ့ ဝင်နှစ်ဦးဖြစ်သည့် Dignora Hernandez နှင့် Henry Alviarez အပါအဝင် သူမနှင့် နီးစပ်သူများကို ဖမ်းဆီးခြင်းအား အမေရိကန်နိုင်ငံခြားရေးဝန်ကြီးဌာနက ရှုတ်ချကြောင်း ကြေညာချက်ထုတ်ပြန်ခဲ့သည်။

Alviarez သည် မာချာဒို၏ လစ်ဘရယ်ပါတီ Vente Venezuela အတွက် စည်းရုံးရေးမှူးအဖြစ် တာဝန်ထမ်းဆောင်ပေးသူဖြစ်ပြီး Hernandez မှာမူ ပါတီအတွင်းရေးမှူးဖြစ်သည်။ ၎င်းတို့နှစ်ဦး စလုံးမှာ အကြမ်းဖက်မှုကို လှုံ့ဆော်ရန် ပူးပေါင်းကြံစည်မှုဖြင့် မတ်လ ၂၀ ရက် (ဗုဒ္ဓဟူးနေ့)တွင် ဖမ်းဆီးခံခဲ့ရသည်။ ဗင်နီဇွဲလားရှေ့နေချုပ် Tarek William Saab ၏ ဖော်ပြချက်အရ ၎င်းတို့သည် နိုင်ငံတော်ကို မတည်မငြိမ်ဖြစ်စေရန် ရည်ရွယ်သည့် စစ်ဘက်ဆိုင်ရာတိုက်ခိုက်ရေး စီမံချက်များတွင် ပါဝင်နေကြောင်း ဖော်ပြခဲ့သည်။ မာချာဒို၏အနီးကပ်တွဲဖက် Magalli Meda အပါအဝင် အခြားပါတီဝင်များသည်လည်း အလားတူစွဲချက်များဖြင့် ဖမ်းဝရမ်းထုတ်ခံထားရသည်။

သို့သော် မာချာဒိုက စွဲချက်အားလုံးမှာ လုံးဝမှားယွင်းနေကြောင်း ချေပခဲ့ပြီး နိုင်ငံတကာ လေ့လာစောင့်ကြည့်သူများက မာဒူရို၏ အုပ်ချုပ်ရေးစနစ်သည် အတိုက်အခံများကို ဖြုတ်ချရန် ကြိုးပမ်းနေခြင်းဖြစ်ကြောင်း သတိပေးထားသည်။ ဥပမာအားဖြင့် ချီလီနိုင်ငံခြားရေးဝန်ကြီးဌာနက အဆိုပါ ဖမ်းဆီးမှုသည် ရွေးကောက်ပွဲ လုပ်ငန်းစဉ်တွင် ဒီမိုကရေစီစိတ်ဓာတ်နှင့် ဆန့်ကျင်နေသည့် လုပ်ရပ်အဖြစ် ရည်ညွှန်းခဲ့သည်။ လူ့အခွင့်အရေးအဖွဲ့အစည်းများက မာဒူရိုနှင့် ၎င်း၏မဟာမိတ်များကို မတရားဖမ်းဆီးခြင်းနှင့် ညှဉ်းပန်းနှိပ်စက်ခြင်းအပါအဝင် အတိုက်အခံ များကို ဖြိုခွင်းရန် အစိုးရတပ်ဖွဲ့များကို အသုံးချနေကြောင်း စွပ်စွဲထားကြသည်။ 

မာချာဒိုသည် ဗင်နီဇွဲလား အမျိုးသားလွှတ်တော်အမတ်ဟောင်း ဖြစ်ပြီး သူမသည် အမေရိကန်၏ ပိတ်ဆို့အရေးယူမှုများကို ထောက်ခံမှုကြောင့် ရွေးကောက်ခံခြင်း ၁၅ နှစ်တာ ရပ်စဲခံရကြောင်း ကြေညာခဲ့သည်။ သို့သော် မာချာဒိုသည် အတိုက်အခံပါတီများအနက် အင်အားအကြီးဆုံးဖြစ်နေသည်။ ပဏာမရွေးကောက်ပွဲတွင် ဗင်နီဇွဲလားနိုင်ငံသား ၂ ဒသမ ၄ သန်းခန့်သည် ပြိုင်ဘက် မာဒူရိုကို ရွေးချယ်ခဲ့ကြသည်။