ဂျန်ဇက် (NSS) - မတ် ၂၃ 

ဖိလစ်ပိုင်နိုင်ငံအနေဖြင့် အငြင်းပွားနေသည့် တောင်တရုတ်ပင်လယ်နှင့်ပတ်သက်ပြီး နိုင်ငံအချုပ်အခြာအခွင့် အရေးကို ကာကွယ်နိုင်ရန် ပိုမိုကြိုးပမ်းသွားမည်ဖြစ်ကြောင်း သမ္မတဖာဒီနန်မာကိုစ့်ဂျူနီယာက ထုတ်ဖော်ပြောဆိုလိုက်သည်။ 

အမေရိကန်နှင့် ဖိလစ်ပိုင်နိုင်ငံကြား ကာကွယ်ရေးပူးပေါင်းဆောင်ရွက်ရေးစာချုပ်က လက်ရှိဖြစ်ပွားနေသည့် ခြိမ်းခြောက်မှုများမှလွဲပြီး အခြားရည်ရွယ်ချက်မျိုးမရှိကြောင်း ဖိလစ်ပိုင်သမ္မတက ပြောသည်။ ဖိလစ်ပိုင်နိုင်ငံသည် ၁၉၅၁ ခုနှစ်တွင် အမေရိကန်နိုင်ငံ နှင့် တိုက်ခိုက်မှုများဖြစ်လာလျှင် တစ်ခြားတစ်နိုင်ငံကို ကူညီပေးရန် သဘောတူစာချုပ်လက်မှတ်ရေးထိုးထားကြောင်း သိရသည်။

ဖိလစ်ပိုင်သမ္မတက တောင်တရုတ်ပင်လယ်နှင့်ပတ်သက်ပြီး ပိုင်နက်နယ်မြေအငြင်းပွားနေသော်လည်း တရုတ်နိုင်ငံ နှင့် စစ်ပွဲဖြစ်ပွားခြင်းကိုရှောင်ရှားမည်ဖြစ်ကြောင်း ပြောသည်။ ဖိလစ်ပိုင်သမ္မတ က " ကျွန်တော်တို့ ဟာ တရုတ်နိုင်ငံနဲ့ စစ်ပွဲဖြစ်လာမှာကို ရှောင်ရှားမှာပါ၊ကျွန်တော်တို့ဟာ နိုင်ငံအကျိုးစီးပွားနဲ့ ငြိမ်းချမ်းရေးကိုသာ စဉ်းစားနေပါတယ်။ အငြင်းပွားမှုတွေအမြင့်ဆုံးဖြစ်လာစေဖို့ မရည်ရွယ်ဘူး" ဟု ပြောသည်။

သို့သော်လည်း ဖိလစ်ပိုင်သမ္မတက တရုတ်နိုင်ငံ၏ ခြိမ်းခြောက်မှုများသည် ပြီးခဲ့သောနှစ်အတွင်း မြင့်တက်လာခဲ့ ကြောင်း သိရသည်။ ဖိလစ်ပိုင်သမ္မတ က "ကျွန်တော်တို့ဟာ စစ်ပွဲရှောင်ရှားမှာဖြစ်တယ်။ စစ်ပွဲရှောင်ရှားနိုင်အောင် အရာရာတိုင်းကို လုပ်ဆောင်သွားမယ်။ တင်းမာမှု ထပ်မံဖြစ်လာမယ့်အခြေနေတွေအပြင် စစ်ပွဲကိုရှောင်ရှားနိုင် အောင် မိတ်ဖက်နိုင်ငံတွေနဲ့ ပူးပေါင်းဆောင်ရွက်မယ်။ စေ့စပ်ဆွေးနွေးမှုတွေ ထပ်မံလုပ်ဆောင်မယ်" ဟု ပြောသည်။ 

အမေရိကန်နိုင်ငံသည် ဖိလစ်ပိုင်နိုင်ငံကို ကူညီထောက်ပံ့ပေးနေကြောင်း အကူအညီများရရှိရန်အတွက် အမေရိကန် နိုင်ငံအပေါ် အလွန်အကျွံမှီခိုနေခြင်းက အန္တရာယ်ရှိလာနိုင်ကြောင်း ဖိလစ်ပိုင်သမ္မတက ပြောသည်။

တရုတ်စစ်သင်္ဘောများသည် ပြီးခဲ့သောသီတင်းပတ်အတွင်း တောင်တရုတ်ပင်လယ်အတွင်းတွင် ဖိလစ်ပိုင်ကမ်းခြေ စောင့်သင်္ဘောများကို တားဆီးမှုများထပ်မံဖြစ်လာခဲ့ကြောင်း သတင်းများထွက်ပေါ်ခဲ့ဖူးသည်။ တရုတ် နှင့် ဖိလစ်ပိုင်နိုင်ငံတို့သည် ၂၀၁၆ ခုနှစ်တွင် တောင်တရုတ်ပင်လယ်အရေးနှင့်ပတ်သက်ပြီး ပိုင်နက်နယ်မြေ အငြင်းပွားခဲ့ပြီး နိုင်ငံတကာခုံရုံးကိုရောက်ရှိခဲ့ကြောင်း သိရသည်။ 

နိုင်ငံတကာခုံရုံးက ဖိလစ်ပိုင်ကိုအနိုင်ပေးခဲ့သော်လည်း တရုတ်နိုင်ငံက ငြင်းဆန်ပယ်ချထားပြီး တောင်တရုတ် ပင်လယ်အတွင်းရှိ ပိုင်နက်နယ်မြေအများစုကို ၎င်းတို့ပိုင်ဆိုင်သည်ဆိုသောအချက်ကို ဆက်လက်ကိုင်ဆွဲထားဆဲ ဖြစ်ကြောင်း သိရသည်။