Pika (NSS) - မတ် ၂

ယီမင်နိုင်ငံတွင်းမှ ပစ်လွှတ်ရန်ပြင်ဆင်ထားသော ဟူသီလက် နက်ကိုင်အဖွဲ့၏ မြေပြင်မှ ဝေဟင်ပစ်ဒုံးကျည်တစ်စင်းကို လေကြောင်းမှ တိုက်ခိုက်မှုများလုပ်ဆောင်ကာ ဖျက်ဆီးပစ်ခဲ့ကြောင်း အမေရိကန်စစ်တပ် တပ်မှူးများက မတ်လ(၁)ရက် တွင် ထုတ်ဖော်ပြောဆိုခဲ့သည်။

အမေရိကန်ဗဟိုကွပ်ကဲမှုဌာနချုပ် CENTCOM က "အမေရိကန်တပ်ဖွဲ့တွေဟာ မတ်လ(၁)ရက်၊ မွန်းလွဲပိုင်းမှာ ပစ်လွှတ်ဖို့ပြင် ဆင်ထားတဲ့ ဟူသီလက်နက်ကိုင်အဖွဲ့ရဲ့ မြေပြင်မှ ဝေဟင်ပစ်ဒုံးကျည်ကို လေကြောင်းမှတိုက်ခိုက်မှုတွေ လုပ်ဆောင်ပြီး ဖျက်ဆီးပစ်ခဲ့ပါတယ်။ ဒီဒုံးကျည်ဟာ ဒေသတွင်းမှာရှိတဲ့ အမေရိကန်လေယာဉ်တွေအတွက် ခြိမ်းခြောက်မှုတစ်ခုဖြစ်လာနိုင်တာကြောင့် ဒီလိုမျိုးတိုက်ခိုက်မှုတွေ လုပ်ဆောင်ပြီး ဖျက်ဆီးပစ်ခဲ့တာပါ"ဟု ပြောဆိုခဲ့သည်။

ထို့ပြင် ဟူသီလက်နက်ကိုင်အဖွဲ့သည် မတ်လ(၁)ရက်၊ ညပိုင်းတွင် ပင်လယ်နီထဲသို့ သင်္ဘောဖျက်ဒုံးကျည်တစ်စင်းကို ပစ်လွှတ်ခဲ့သော်လည်း မည်သည့်သင်္ဘောကိုမှ ထိမှန်ခဲ့ခြင်းမျိုးမရှိကြောင်း အမေရိကန်တပ်ဖွဲ့များကပြောကြားခဲ့သည်။ အစ္စရေး-ဟားမက် စစ်ပွဲစတင်ဖြစ်ပွားပြီးနောက် ဂါဇာကမ်းမြောင်ဒေသရှိ ပါလက်စတိုင်းလူမျိုးများကို ထောက်ခံသည့်အနေဖြင့် ပင်လယ်နီအတွင်းရှိ ကုန်တင်သင်္ဘောများကို တိုက်ခိုက်မှုများ လုပ် ဆောင်နေခြင်းဖြစ်ကြောင်း ဟူသီလက်နက်ကိုင်အဖွဲ့က ပြောခဲ့သည်။ ဂါဇာကမ်းမြောင်ဒေသအပေါ် အစ္စရေးက ထိုးစစ်ဆင်နေမှုများကို မရပ်တန့်မချင်း ကုန်တင်သင်္ဘောများကို တိုက်ခိုက်မှုများအား ဆက်လက်လုပ်ဆောင်သွားမည်ဖြစ်ကြောင်း ဟူသီလက်နက်ကိုင်အဖွဲ့က ကတိပြုခဲ့သည်။ ပင်လယ်နီအတွင်းရှိ ကုန်တင်သင်္ဘောများကို ပစ်မှတ်ထားတိုက်ခိုက်နေမှုများအား လက်တုံ့ပြန်သည့်အနေဖြင့် အမေရိကန်နှင့်ဗြိတိန်တို့၏တပ်ဖွဲ့များသည် ယီမင်နိုင်ငံရှိ ဟူသီလက်နက်ကိုင်အဖွဲ့၏ ပစ်မှတ်များကို လေကြောင်းမှတိုက်ခိုက်မှုများ ဆက်တိုက်လုပ်ဆောင်ခဲ့သည်။

ဟူသီလက်နက်ကိုင်အဖွဲ့က ပင်လယ်နီအတွင်းရှိ ကုန်တင်သင်္ဘောများကို တိုက်ခိုက်နေမှုများအား ရပ်တန့်မည်ဆိုမှသာ အမေရိကန်တပ်ဖွဲ့ များသည် ဟူသီလက်နက်ကိုင်အဖွဲ့အပေါ်တိုက်ခိုက်နေခြင်းများကို ရပ်တန့်သွားမည်ဖြစ်ကြောင်း အမေရိကန်အကြီးတန်းသံတမန်တစ်ဦးက ပြီးခဲ့သည့်လတွင် ထုတ်ဖော်ပြောဆိုခဲ့ဖူးသည်။