Htay Oung (NSS) - မတ် ၂

ထိုင်းနိုင်ငံကို ဇန်နဝါရီလ ၁ ရက်မှ ဖေဖော်ဝါရီလ ၂၅ ရက်အတွင်းနိုင်ငံခြားဧည့်သည် ၅ ဒသမ ၉၈ သန်း လာ‌ရောက် ခဲ့ပြီး တစ်နှစ်ထက်တစ်နှစ် ၄၈ ရာခိုင်နှုန်း တိုးမြင့်လာခဲ့ကာ တရုတ်နိုင်ငံမှ လာရောက်လည်ပတ်သူ ၁ ဒသမ ၁ သန်း ရှိကြောင်း ဘန်ကောက်ခရီးသွားလုပ်ငန်း ဝန်ကြီးဌာနက ဖေဖော်ဝါရီလ ၂၇ ရက်တွင် ပြောသည်။

ယမန်နှစ်က နိုင်ငံခြားဧည့်သည် ၂၈ သန်းကိုလက်ခံခဲ့ရသည့်အတွက် ယခုနှစ်တွင် သန်း ၄၀ အထိ စံချိန်တင်နိုင်ရန် အစိုးရက ရည်မှန်းထားကြောင်း သိရသည်။ အရှေ့တောင်အာရှ၏ ဒုတိယအကြီးဆုံးစီးပွားရေးအင်အားကြီး တိုင်းပြည်ဖြစ်သည့် ထိုင်းနိုင်ငံသည် ၎င်း၏ အဓိက စီးပွားမောင်းနှင်အားဖြစ်သည့်ခရီးသွားလုပ်ငန်းကို မြှင့်တင်ရန် အတွက် မကြာသေးမီက တရုတ်နှင့် အိန္ဒိယနိုင်ငံသားများကို ဗီဇာကင်းလွတ်ခွင့်ပြုခဲ့သည်။

ထို့ပြင် အခြားသောနိုင်ငံများ၏ နိုင်ငံသားများကိုလည်း  ဗီဇာမလိုပဲ ခရီးသွားခွင့်ပြုနိုင်ရန် စီစဉ်‌ဆောင်ရွက်နေ ကြောင်း မကြာသေးမီက ဝန်ကြီးချုပ် ဆရက်သာတာဗီဆင်အစိုးရက ပြောကြားခဲ့သည်။

ထို့ပြင် ထိုင်းနိုင်ငံ၏ အပန်းဖြေဆေးခြောက်သုံးစွဲမှုကို နှစ်ကုန်ပိုင်းတွင်တားမြစ်ရန်ရှိသော်လည်း ဆေးဝါးအ‌နေဖြင့် ဆက်လက်သုံးစွဲခွင့်ပြုမည်ဖြစ်ကြောင်း ဘန်ကောက်ကျန်းမာရေးဝန်ကြီး ချိုလ်နမ်ဆရီကာအောက ပြောဆို‌ ကြောင်း ရိုက်တာသတင်းအေဂျင်စီက ဖေဖော်ဝါရီလ ၂၉ ရက်က ရေးသားထားသည်။

၂၀၂၂ ခုနှစ်တွင်  အပန်းဖြေအနေဖြင့် အသုံးပြုနိုင်ကြောင်း ခွင့်ပြုပြီးနောက် ထောင်သောင်းချီသည့် ဆေးခြောက် အရောင်းဆိုင်များ ပေါ်ပေါက်လာပြီး လာမည့်နှစ်တွင် အမေရိကန်ဒေါ်လာ ၁ ဒသမ ၂  ဘီလျံအထိ တန်ကြေးရှိတဲ့ စီးပွားရေးလုပ်ငန်းတစ်ခုဖြစ်လာဖွယ်ရှိကြောင်း သိရသည်။ အစိုးရအနေဖြင့် ယခုနှစ်ကုန်ပိုင်းတွင် အသက်၀င်လာ မည့် ဆေးခြောက်သုံးစွဲမှုထိန်းချုပ်ရေးဥပဒေအသစ်ကိုရေးဆွဲနေပြီး ခရီးသွားလုပ်ငန်းအပေါ်သက်ရောက်မှုရှိမှာ မဟုတ်ကြောင်း ထိုင်းကျန်းမာရေးဝန်ကြီးက ဆက်လက်ပြောသည်။