အေဝိုင်အီး (NSS) - ဖေဖော်ဝါရီလ - ၁၄

အငြိမ်းစားဗိုလ်ချုပ်မှူးကြီးဦးသန်းရွှေ လက်ထက်က ဖောက်လုပ်၍ သွားလာအသုံးပြုစေခဲ့သော ရန်ကုန်-မန္တလေး အမြန်လမ်းမကြီးမှာ အစိုးရ သုံးဆက်ရှိလာသည့်တိုင် ဦးသန်းရွှေလက်ထက်က ထက် ပိုမိုကောင်းမွန် အောင် အဆင့်မြှင့်ပေးနိုင်မှုမရှိသေးကြောင်း အမြန်လမ်းအသုံးပြုသူအချို့က ထောက်ပြပြောကြားသည်။

နေ့စဉ် ကားစီးရေ ထောင်ချီသွားလာနေသော ရန်ကုန်-မန္တလေး အမြန်လမ်းမကြီးကို အငြိမ်းစား ဗိုလ်ချုပ်မှူးကြီး ဦးသန်းရွှေက နေပြည်တော်မြို့သစ် ကြီးနှင့် ယှဉ်တွဲ၍ဖောက်လုပ်ပေးခဲ့ခြင်းဖြစ်ပြီး သက်တမ်းအားဖြင့် ဆယ်စုနှစ် တစ်ခု ကျော်လာခဲ့ပြီလည်းဖြစ်သည်။

သို့သော် ဦးသိန်းစိန်အစိုးရလက်ထက် ငါးနှစ်၊ ဒေါ်အောင်ဆန်းစုကြည်အစိုးရ ငါးနှစ်နှင့် ဗိုလ်ချုပ်မှူး ကြီးမင်းအောင်လှိုင် ဦးဆောင်သော နစကအစိုးရ လက်ထက် သုံးနှစ်ကြာသည်အထိ လမ်းမကြီး၏ အရည်အသွေးပိုင်းမှာ ဦးသန်းရွှေလက်ထက်နှင့်ယှဉ်လျှင် များစွာ ပြောင်းလဲတိုးတက်ခဲ့ခြင်းမရှိသည်ကို တွေ့ရသည်။

“အမြန်လမ်းရဲ့ ရန်ကုန်ကနေ မန္တလေးဘက်ကို သွားတဲ့ လမ်းပိုင်းတစ်ခုတည်းမှာပဲ လှိုင်းကြက်ခွပ်က အခုရေ (၃၀)ကျော်ရှိတယ်။ ဒါက ရန်ကုန်-နေပြည် တော် အထိပဲ ပြောသေးတာ။ မန္တလေးအထိဆိုရင် အခုရေ (၅၀)ကျော်လိမ့်မယ်”ဟု အမြန်လမ်းကို ပုံမှန် ဖြတ်သန်း အသုံးပြုနေသူ လုပ်ငန်းရှင်တစ်ဦးကပြော သည်။

လမ်းမကြီးပေါ်မှ လှိုင်းကြက်ခွပ်များမှာ ကီလို မီတာ (၁၀ဝ)နှုန်းဖြင့် မောင်းနှင်နေသောကားများကို လူးခါစေသည့်အပြင် ကား၏ရှော့ဘားများကိုလည်း ကောင်း၊ အခြားသော အစိတ်အပိုင်းများကိုလည်း ကောင်း ထိခိုက်နစ်နာမှုများ ရှိနေစေသည်ဟု ဆိုသည်။

“အဆိုးဆုံးက မညီညာတဲ့လှိုင်းကြက်ခွပ်တွေကြောင့် စီယာရင်ကို မထိန်းနိုင်ဘဲ လမ်းဘေးထိုးဆင်း သွားတာတွေ၊ မတော်တဆဖြစ်တာတွေ ဖြစ်သွားနိုင် တယ်။ မောင်းဖူးသူတိုင်းသတိထားမိမှာပါ “ဟု ၎င်းက ဆက်လက်ပြောကြားသည်။

အမြန်လမ်းကို နေ့စဉ်ဖြတ်သန်းမောင်းနှင်နေရသည့် အဝေးပြေးကားလိုင်းအချို့မှ လေးဦးထက်မနည်း သောယာဉ်မောင်းအချို့ကလည်း ယင်းအချက် ကို အတည်ပြုပြောကြားကြပြီး လမ်းတစ်လျှောက် ပြင်ဆင်ရမည့်အပိုင်းများစွာ ရှိနေကြောင်း ထောက်ပြ ကြသည်။

“လမ်းတစ်လျှောက်မှာတော့ ပြင်နေတဲ့ အပိုင်းတွေ မြင်ရတယ်။ လမ်းကို စက်နဲ့ထိုးပြီး ဖြည် ထားတာတွေ ရှိတယ်။ ဒါတွေက လတိုင်းမပြတ် တစ် နေရာပြီးတစ်နေရာတော့ လုပ်နေတာတွေ့တယ်”ဟု အဝေးပြေးကားလိုင်းတစ်ခုမှ ယာဉ်မောင်းတစ်ဦးက ပြောသည်။

ပြည်ပနိုင်ငံအချို့မှ အဝေးပြေးအမြန်လမ်းမကြီး များတွင်မူ လှိုင်းကြက်ခွပ်များ၊ မညီမညာဖြစ်သော အစိတ်အပိုင်းများနှင့် မကြာခဏ ပြင်ဆင်နေရခြင်း များကို မတွေ့ရဘဲ ယာဉ်မောင်းသူများအတွက် ငြိမ့် ညောင်းသက်သာမှုကိုဖြစ်စေကြောင်း လုပ်ငန်းရှင် အချို့က ထောက်ပြပြောကြားသည်။

“ ကျွန်တော်တို့ တရုတ်ရောက်တယ်ဗျာ။ အိန္ဒိယ၊ ဂျပန်သွားတယ်ဗျာ။ အဝေးပြေးလမ်းတွေက ညက် နေအောင် ကောင်းတယ်။ ဒီမှာကတော့ အစိုးရသုံး ဆက်သာ ရှိလာတယ်။ ဦးသန်းရွှေလက်ထက်က ထား ခဲ့တဲ့အခြေအနေထက် ပိုကောင်းလာတာ သိပ်မတွေ့ ရဘူး” ဟု ပြည်ပပို့ကုန်/သွင်းကုန်လုပ်ငန်းရှင်တစ် ဦးက မှတ်ချက်ပြုသည်။ အစဉ်အလာအရ အစိုးရအဆက်ဆက်လုပ်ဆောင်ပေးသွားသော အချို့လုပ်ငန်း ဆောင်တာများမှာ ဆင့်ကဲသဘောဖြင့် ပိုမိုကောင်းမွန် လာရမည်မှာ မှန်သော်လည်း မြန်မာနိုင်ငံတွင်မူ အမြန်လမ်းကဲ့သို့သော လမ်းမကြီးမှာ ဆင့်ကဲ ပြောင်းလဲမှုသဘောအရ ပိုမိုကောင်းမွန်လာခြင်းမရှိဘဲ ဦးသန်းရွှေထားခဲ့သည့်အတိုင်းသာ မြင်နေရသည်ဟု ဆိုသည်။

ရန်ကုန်-မန္တလေး အမြန်လမ်းမကြီးသည် ကုန်ကျစရိတ် ဒေါ်လာသန်းဆယ်ချီရှိခဲ့ပြီး အဆင့်ဆင့်သော အစိုးရများက လက်ဆင့်ကမ်းသယ်ဆောင်ရသော ရွှေ့ပြောင်းမရသည့်အမွေလည်း ဖြစ်သည်။ ယင်းပြင် နိုင်ငံတော်က စနစ်ကျနသောစီမံမှုဖြင့် ရန်ကုန်မှ မန္တလေးအပြင် မန္တလေးမှ မြစ်ကြီးနားအထိ ပိုမို ကောင်းမွန်သော တိုးတက်ပြောင်းလဲမှုအဖြစ် အသွင် ပြောင်းလဲပေးသင့်သည့် မဟာဗျုဟာလမ်းမကြီးလည်း ဖြစ်သည်။ သို့သော်လည်း အဆိုပါလမ်းမကြီးပေါ်၌ ယာဉ်မတော်တဆမှုကြောင့် နှစ်စဉ် လူဦးရေရာချီ သေဆုံးရပြီး ကားစီးရေ ရာဂဏန်းနီးပါး ပျက်စီးဆုံးရှုံး မှုများ ဖြစ်ပေါ်နေလေ့ရှိကြောင်း ဆောက်လုပ်ရေး ဝန်ကြီးဌာန၏ ထုတ်ပြန်ချက်များအရ သိရသည်။