Zawgyi Version; 

Iris (NSS) - ဖေဖော်ဝါရီလ - ၁၄ 

နေပြည်တော်အချုပ်ထောင်တွင် ထောင်ဒဏ်ကျခံနေရသော နိုင်ငံတော်အတိုင်ပင်ခံပုဂ္ဂိုလ်ဟောင်း ဒေါ်အောင်ဆန်းစုကြည်ထံသို့ ပြည်ထဲရေး ဝန်ကြီးဌာန ပြည်ထောင်စုဝန်ကြီး ဒုတိယဗိုလ်ချုပ်ကြီး ရာပြည့်က လစဉ်ပုံမှန်သွားရောက်တွေ့ဆုံ၍ ကျန်းမာ ရေးအခြေအနေနှင့် လိုအပ်ချက်မှန်သမျှကို ဖြည့် ဆည်းပေးနေ လေ့ရှိကြောင်း သတင်းရင်းမြစ်များထံမှ စုံစမ်းသိရှိရသည်။ 

   ဒေါ်အောင်ဆန်းစုကြည်နှင့်ပတ်သက်၍ သားဖြစ်သူ ကင်မ်အဲရစ်က အမေရိကန်အစိုးရ အာဘော်မီဒီယာများထံ ပြောကြားထားချက်အပေါ် NP News က မေးမြန်းစုံစမ်းကြည့်ရာမှ သိရှိခဲ့ရခြင်းမျိုးလည်းဖြစ်သည်။ 

“ပြည်ထဲရေးဝန်ကြီးက မကြာခဏသွား တွေ့တယ်။ လစဉ်လိုလို သွားတွေ့ပြီး ကျန်းမာရေး အခြေအနေမေးတယ်။ လိုအပ်တဲ့ဆေးဝါးနဲ့ အစား အသောက်တွေ မပြတ်လပ်အောင် ဖြည့်ဆည်းပေး တာရှိတယ်။ ဒေါ်အောင်ဆန်းစုကြည်ဘက်က မှာတာတွေလည်းရှိတယ်” ဟု အတွင်းသတင်းရင်းမြစ် တစ်ဦးက အတည်ပြုပြောကြားသည်။

 ယင်းသတင်းစကားကိုလည်း နိုင်ငံတကာ အသီးသီးမှ သံတမန်များထံ အကြိမ်ကြိမ် အသိပေး ထားပြီး ဖြစ်ကြောင်း ၎င်းကဆိုသည်။ အထူးသဖြင့် ပြည်ထဲရေးဝန်ကြီးဟောင်း ဒုတိယဗိုလ်ချုပ်ကြီး စိုးထွဋ် လက်ထက်က ယင်းကဲ့သို့တွေ့ဆုံရန် အခြေအနေမပေးခဲ့သည့်အပြင် ဒေါ်အောင်ဆန်းစုကြည် ဘက်က တောင်းဆိုခဲ့သော တွေ့ဆုံလိုသည့် နစက အစိုးရဘက်မှ ပုဂ္ဂိုလ်မှာလည်း သွားရောက်တွေ့ဆုံရန် အဆင်ပြေမှုမရှိခဲ့ကြောင်း ကြားသိရသည်။

ယင်းကဲ့သို့ နှစ်ဖက် အခက်အခဲများ ဖြစ်ပေါ်ခဲ့ပြီးနောက် ဒုတိယဗိုလ်ချုပ်ကြီး စိုးထွဋ်အစား ဒုတိယဗိုလ်ချုပ်ကြီးရာပြည့်က ပြည်ထဲရေးဝန်ကြီး အဖြစ် ပြောင်းလဲတာဝန်ထမ်းဆောင်ချိန်မှစ၍ ဒေါ်အောင်ဆန်းစုကြည်ထံ ပြည်ထောင်စုဝန်ကြီးက လတိုင်းလိုလို ပုံမှန်သွားရောက်တွေ့ဆုံခဲ့ခြင်းမျိုးဖြစ် ကြောင်း သိရသည်။ 

  “ဒေါ်အောင်ဆန်းစုကြည်က တွေ့ချင် တယ်လို့ တောင်းဆိုခဲ့သူရှိတယ်။ နာမည်တော့ မပြောပါရစေနဲ့” ဟု သတင်းရင်းမြစ်က မည်သူမည်ဝါ ဖြစ်သည်ကို ရှောင်လွှဲသွားသည်။ ဒုတိယဗိုလ်ချုပ်ကြီး ရာပြည့်သည် ဒေါ်အောင်ဆန်းစုကြည် အတိုင်ပင်ခံ ပုဂ္ဂိုလ်ဘဝကတည်းက ငြိမ်းချမ်းရေးလုပ်ငန်းစဉ်များ တွင် တပ်မတော်ဘက်မှ ကိုယ်စားလှယ်အဖြစ် ပါဝင် ခဲ့သူဖြစ်သည့်အတွက် ဒေါ်အောင်ဆန်းစုကြည်နှင့် လည်း မျက်နှာမစိမ်းသော စစ်ဗိုလ်ချုပ်တစ်ဦးလည်း ဖြစ်သည်။ 

အလားတူပင် အကျဉ်းစံနေရပြီဖြစ်သော ပြည်ထဲရေးဝန်ကြီးဟောင်း ဒုတိယဗိုလ်ချုပ်ကြီး စိုးထွဋ်သည်လည်း ဒေါ်အောင်ဆန်းစုကြည်တို့၏ အာဏာဆုပ်ကိုင်ထားမှု နောက်ဆုံးနှစ်များအတွင်း၌ ပြည်ထဲရေးဝန်ကြီးရာထူးကို တာဝန်ထမ်းဆောင်ခဲ့ရ သူဖြစ်ပြီး ဒေါ်အောင်ဆန်းစုကြည်နှင့် မျက်နှာစိမ်းလှ သူ မဟုတ်ပေ။ ၎င်း၏ ရှေ့ပိုင်းတွင် ဒုတိယဗိုလ်ချုပ် ကြီးဟောင်း ဦးကျော်ဆွေက ပြည်ထဲရေးဝန်ကြီးအဖြစ် တာဝန်ထမ်းဆောင်ခဲ့သူဖြစ်ပြီး ဒေါ်အောင်ဆန်းစု ကြည်နှင့် ရင်းနှီးသောဆက်ဆံရေးမျိုး ရှိခဲ့ဖူးသည်။ 

“ဒေါ်အောင်ဆန်းစုကြည်ရဲ့ မှာယူတဲ့ ပစ္စည်းတချို့က နိုင်ငံခြားကနေတောင် မှာယူရတာ” ဟု ပြည်ထဲရေးဝန်ကြီး ဒုတိယဗိုလ်ချုပ်ကြီး ရာပြည့် နှင့် လစဉ်တွေ့ဆုံသည့်ကာလများအတွင်း ဒေါ် အောင်ဆန်းစုကြည်ဘက်က မှာယူခဲ့သောလိုအပ် သည့်ပစ္စည်းများနှင့်ပတ်သက်၍ သတင်းရင်းမြစ်က အတည်ပြုပြောကြားသည်။ 

လက်ရှိ ဒေါ်အောင်ဆန်းစုကြည်၏ ကျန်း မာရေးအခြေအနေမှာ ကောင်းမွန်လှသည့်အခြေအ နေတွင်ရှိပြီး အခန်းအတွင်း၌ နိုင်ငံပိုင်သတင်းစာများ နှင့်အတူ ဒေါ်အောင်ဆန်းစုကြည် ဖတ်ရှုလိုသော စာ အုပ်အချို့ကိုပါ ထည့်သွင်းပေးထားကြောင်း သိရ သည်။ 

သားဖြစ်သူ ကင်မ်အဲရစ်ကမူ ဒေါ်အောင်ဆန်းစုကြည်ထံမှ လက်ရေးမူဖြင့် ရေးသားပေးပို့သော ပြန်စာကို ဇန်နဝါရီလလယ်က လက်ခံရရှိခဲ့ကြောင်း ထုတ်ဖော်ပြောကြားထားပြီး ထောင်တွင်း၌ရှိနေသော မိခင်၏ကျန်းမာရေးအခြေအနေကို စိုးရိမ်နေကြောင်း ဆိုထားသည်။ မိခင်ဖြစ်သူထံမှ လက်ရေးမူပြန်စာကို လက်ခံရရှိပြီးသည့်နောက်တွင် တိုက်ရိုက်တွေ့ဆုံခွင့် သို့မဟုတ် ဖုန်းပြောခွင့် ရရှိစေရန် ဆက်လက်ကြိုးစား သွားမည်ဟု အမေရိကန်အစိုးရအာဘော်သတင်းဌာန တစ်ခုထံသို့ ပြောကြားထားသည်။