ယွန်း (NSS) - ဖေဖော်ဝါရီ ၁၁

ရေကြောင်းလုပ်ငန်းများကို ပိုမိုကောင်းမွန်သည့်ဝန်ဆောင်မှုပေးနိုင်ရန် တည်ဆောက်ထားသည့် ရေယာဥ်ရှစ်စင်း လုပ်ငန်းခွင်စတင်ဝင်ရောက်ခြင်းအခမ်းအနားကို ဖေဖော်ဝါရီ (၁၀)ရက်တွင် ကျောက်တံတားမြို့နယ်၊ ပန်းဆိုးတန်းကျန်းမာရေး ဆိပ်ခံတံတား၌ ကျင်းပခဲ့သည်။

ဆိပ်ကမ်းလုပ်ငန်းနှင့် ရေကြောင်းပြလုပ်ငန်းများတွင် ပိုမိုကောင်းမွန်သည့် ဝန်ဆောင်မှုပေးနိုင်ရန် တည်ဆောက်ခဲ့ခြင်းဖြစ်ကြောင်း ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဗိုလ်ချုပ်ကြီးမြထွန်းဦးက ဆိုသည်။

အဆိုပါရေယာဥ်(၈)စင်းတွင် မြန်မာ့ဆိပ်ကမ်းအာဏာပိုင်၌ ၆ဝ မီတာ ဘက်စုံသုံး ဗော်ယာ မ/ချ ရေယာဉ် (60M Multipurpose Buoy Handling Vessel) ("ဂန္ဓ"ရေယာဉ်) (၁) စီး၊ မြေတူးမြေခံရေယာဉ် (၂) စုံနှင့် ဆိပ်ကမ်းလုပ်ငန်းသုံး ရေယာဉ် (Habour Launch) (၃) စီး၊ စုစုပေါင်း ရေယာဉ် (၈) စီး ပါဝင်ကြောင်း သိရသည်။

ရေယာဥ်အသစ်ရှစ်စင်းကို မြန်မာ့ဆိပ်ကမ်းအာဏာပိုင်၏ ဆိပ်ကမ်းလုပ်ငန်းများနှင့် ရေကြောင်းပြလုပ်ငန်းများတွင် ပိုမိုကောင်းမွန်သည့်ဝန်ဆောင်မှုများ ပေးနိုင်စေရေးအတွက် စုစုပေါင်း အမေရိကန်ဒေါ်လာ ၂ဝ.၆၇ သန်း အကုန်အကျခံကာ တည်ဆောက်ခဲ့ခြင်းဖြစ်ကြောင်း သိရသည်။

ပင်လယ်ရေကြောင်းပို့ဆောင်ရေးကဏ္ဍသည် နိုင်ငံ၏အပြည်ပြည်ဆိုင်ရာ ကုန်သွယ်မှုအခန်းကဏ္ဍနှင့် တိုက်ရိုက်ချိတ်ဆက်မှုရှိနေပြီး နိုင်ငံ့လူမှုစီးပွားဘဝ ဖွံ့ဖြိုးတိုးတက်ရေးအတွက် လွန်စွာအရေးကြီးကြောင်း ပြည်ထောင်စုဝန်ကြီးက ပြောသည်။

ကုန်သွယ်မှုနည်းလမ်းများအနက် ပင်လယ်ရေကြောင်းဖြင့် ကုန်သွယ်မှုသည် ကမ္ဘာ့ကုန်သွယ်မှုတန်ဖိုး၏ ၇ဝ ရာခိုင်နှုန်း နှင့် ကမ္ဘာ့ကုန်သွယ်မှု ပမာဏ၏ ၈ဝ ရာခိုင်နှုန်းရှိကြောင်း United Nation Conference on Trade and Development (UNCTAD)က နှစ်စဉ်ထုတ်ပြန်သည့် Review of Maritime Transport အရ သိရကြောင်း ဗိုလ်ချုပ်ကြီးမြထွန်းဦးက ဆိုထားသည်။