ထိုက်စံ(NSS) - စက်တင်ဘာ ၁၂

အထည်အမှာစာမရရှိတော့သည့်အတွက် ယာယီပိတ်သိမ်းမည့် ထန်းတပင်မြို့နယ်ရှိ Teng Hui သိုးမွှေးစက်ရုံ လုပ်သားများ နစ်နာကြေးရရှိရေးနှင့် အလုပ်အကိုင်ရရှိရေးအတွက် အလုပ်သမားဝန်ကြီးဌာန ၊ ပြည်ထောင်စုဝန်ကြီး ဦးခင်‌မောင်စိုးက ကြိုပမ်းဆောင်ရွက်ပေးနေကြောင်း သိရသည်။ 

အလုပ်သမားဝန်ကြီးဌာန ၊ ပြည်ထောင်စုဝန်ကြီး ဦးခင်‌မောင်စိုးက ယနေ့(စက်တင်ဘာ ၁၂ ရက်)တွင် အဆိုပါ Teng Hui သိုးမွှေးစက်ရုံ သွားရောက်ကြည့်ရှုခဲ့ပြီး စက်ရုံများ တာဝန်ရှိသူများ ၊   စက်ရုံလုပ်သားများ နှင့် တွေ့ဆုံ၍ စက်ရုံပြန်လည်လည်ပတ်နိုင်ရေးနှင့် လုပ်သားများအခြားစက်ရုံသို့ ပြောင်းရွှေ့လုပ်ကိုင်နိုင်ရေးတို့အတွက် လမ်းညွှန်မှာကြားခဲ့သည်။ 

“အလုပ်သမားတွေက အလုပ်အကိုင်ရရှိစေဖို့အတွက် သူတို့အလုပ်တွေရရှိပြီးတော့မှ စားဝတ်နေရေး ရရှိစေဖို့အတွက် ကျွန်တော်တို ဝန်ကြီးဌာနက တာဝန်ယူပေးရပါတယ်။ ဒီစက်ရုံက ပိတ်ရတာမဟုတ်ဘူး။ သူ့ကိုလာတဲ့ အော်ဒါ ပို့မယ့်ကုန်ကြမ်းက ရှိတဲ့ဟာက အလုပ်မလုပ်နိုင်ဘူး။ ဒါလည်း ကျွန်တော်တို့အနေနဲ့ ပထမဆုံးအချက်အနေနဲ့ နိုင်ငံမှာရှိတဲ့ ကျွန်တော်တို့ရဲ့လက်တွဲဖော်ကုမ္ပဏီတွေနဲ့ ပြန်ပြီး ကျွန်တော်တို့ ဘက်ကလည်း Try နေတယ်။ ဒီစက်ရုံက ပြန်ပြီးအော်ဒါနဲ့ ပြန်လုပ်ရရင် ပိုပြီးအဆင်ပြေတာပေါ့။ အော်ဒါအသစ်ရှာရမယ်။ ကုမ္ပဏီအသစ်ရှာရမယ်ဆိုတော့ တစ်မျိုးတော့ ပြောင်းသွားတာပေါ့။ ကျွန်တော်တို့ ဝန်ကြီးဌာနအနေနဲ့ မှာခဲ့ချင်တာကတော့ အတတ်နိုင်ကြိုးစားပြီးတော့ ပြန်လည်ပတ်နိုင်အောင် ကြိုးစားပါလို့မှာချင်ပါတယ်”ဟု ဝန်ကြီးက ပြောကြားခဲ့သည်။

ထို့နောက် လှိုင်သာယာမြို့နယ်ရှိ CMP စက်ရုံများဖြစ်သော  APEX PLUS GARMENT COMPANY LIMITED နှင့်  TRI-WIN LEATHER MYANMAR COMPANY LIMITED စက်ရုံတို့သို့ရောက်ရှိပြီး စက်ရုံအလုပ်သမားများ၊ အလုပ်သမားရေးရာလုပ်ငန်းညှိနှိုင်းရေးကော်မတီ(WCC) အဖွဲ့ဝင်များနှင့်တွေ့ဆုံ၍  အလုပ်သမားရေးရာများ ဆွေးနွေးကာ   စက်ရုံအတွင်း လှည့်လည်ကြည့်ရှုခဲ့သည်။

ထိုသို့ဆွေးနွေးစဉ် အလုပ်ရုံနှင့်အလုပ်သမားဥပဒေ စစ်ဆေးရေးဦးစီးဌာနမှ ညွှန်ကြားရေးမှူးချုပ် ဦးဇော်ဇော်ဦးက အလုပ်သမားများ၏ ဥပဒေပါ ခံစားခွင့်များနှင့်စက်ရုံများ၏ လက်ရှိ အမှာစာရရှိနေမှုများနှင့်ပတ်သက်၍ ရှင်းလင်းပြောကြားခဲ့သည်။

“ကျွန်တော်တို့ဦးစီးဌာနရဲ့မျှော်မှန်းချက်ကတော့ ဥပဒေပါခံစားခွင့်များကို မှန်မှန်ကန်ကန်နဲ့ မြန်မြန်ဆန်ဆန်ရရှိနိုင်စေဖို့။ လုပ်ငန်းခွင်ဘေးအန္တရာယ်ကင်းရှင်းပြီးတော့မှ ကျန်းမာရေးကောင်းမွန်စေဖို့ ဒီလိုဆောင်ရွက်ခြင်းအားဖြင့် လုပ်ငန်းခွင်တည်ငြိမ်အေးချမ်းမှုရှိမယ်။ လုပ်ငန်းခွင်တည်ငြိမ်းအေးချမ်းမှုရှိမှ နိုင်ငံအတွက်ကို ကုန်ထုတ်စွမ်းအားမြင့်မားလာစေဖို့ဆိုပြီး ရည်ရွယ်ချက်နဲ့ ကျွန်တော်တို့ အလုပ်သမားဝန်ကြီးဌာနအနေနဲ့ ပေါင်းစပ်ပြီးတော့မှ ဆောင်ရွက်နေခြင်း ဖြစ်ပါတယ်။  APEX PLUS GARMENT COMPANY LIMITED စက်ရုံကတော့ ဦးအောင်မြင့်မြတ် မြန်မာနိုင်ငံသားပိုင်စက်ရုံဖြစ်ပါတယ်။ ရင်းနှီးမြုပ်နှံမှုက FDI ဖြစ်ပြီး CMP လုပ်ငန်းဖြစ်ပါတယ်ခင်ဗျ။ အလုပ်သမားဦးရေကတော့ (၁၉၅၉)ဦးရှိပြီး ကုန်ကြမ်းရရှိမှုက တရုတ်နိုင်ငံက ရရှိပါတယ်။ ကုန်ကြမ်းတင်ပို့မှုက ဂျပန်နိုင်ငံက တင်ပို့လျက်ရှိပါတယ်။ ထုတ်ကုန်အမျိုးအစားကတော့ Coat နဲ့ Down Coat ၊ ဂျက်ကတ်နဲ့ WAT Brand ထုတ်လုပ်ပါတယ်။ ကုန်အမှာစာရရှိမှုကတော့ တင်ထားချက်အရ (၃၀)ရက်(၁၀)လ (၂၀၂၆)အထိကို ကုန်အမှာစာရရှိမှုက တွေ့ရတာဖြစ်ပါတယ်။  TRI-WIN LEATHER MYANMAR COMPANY LIMITED စက်ရုံကတော့ FDI စက်ရုံအမျိုးအစား CMP စက်ရုံ အမျိုးအစား ဖြစ်ပါတယ်။ သူရဲ့ အနေအထားကိုလေ့လာကြည့်တဲ့အခါမှာ ကုန်အမှာစာရရှိမှုကို အိတ်ရေ(၂၀၀၀၀၀)ကို (၁၂)လပိုင်းကုန်အထိကို အမှာစာလက်ခံရရှိပြီးဖြစ်ကြောင်း တင်ပြပါတယ်။ ဒီစက်ရုံကလည်း အလုပ်ရုံနဲ့ အလုပ်အသမားဝန်ကြီး စစ်ဆေးရေဦးစီးဌာနကလည်း ပုံမှန်စစ်ဆေးခြင်းဆောင်ရွက်ပြီးတဲ့ စက်ရုံဖြစ်ပြီး ပြဿာနာတစ်စုံတရာမရှိတဲ့ စက်ရုံဖြစ်ကြောင်း တင်ပြအပ်ပါတယ်ခင်ဗျ” ဟု ၎င်းက ပြောသည်။

ပြီးခဲ့သည့်(စက်တင်ဘာ ၇ ရက်) နှင့် (၈) ရက်တို့တွင်  Teng Hui စက်ရုံလုပ်သားများ နစ် နာမှုမရှိစေရေး၊ အလုပ်အကိုင်အခွင့်အလမ်းများရရှိစေရေးအတွက်   အလုပ်သမားဝန်ကြီးဌာန ညွှန်ကြားရေးမှူးချုပ် ဦးကျော်ကျော်လွင်၊ ရန်ကုန်တိုင်းဒေသကြီး အလုပ်သမားညွှန်ကြားရေးဦးစီးဌာန ညွှန်ကြားရေးမှူး ဦးစိုးနိုင်နှင့် တာဝန်ရှိသူများက အဆိုပါစက်ရုံသို့ သွားရောက်တွေ့ဆုံ၍ စက်ရုံအလုပ်ရှင်များနှင့် အလုပ်သမားများကြား ညှိနှိုင်းဆောင်ရွက်ပေးခဲ့ခြင်းတို့ကို ဆောင်ရွက်ပေးခဲ့ကြောင်း သိရသည်။