ရောင်နီ (NSS) - စက်တင်ဘာ ၁၁ 

            လူငယ်တွေရဲ့ စိတ်ကျန်းမာရေးကို အကာအကွယ်ပေးဖို့အတွက် လူမှုကွန်ရက် ပလပ်ဖောင်းတွေပေါ်မှာ နေ့စဉ် အသုံးပြုချိန် ကန့်သတ်ခြင်း၊ ကြည့်ရှုမှု ခေတ္တရပ်နားစေခြင်းနဲ့ စက်ပစ္စည်းတွေမှာ 'Minor Mode' (လူငယ်သုံး စနစ်) သီးသန့် ထည့်သွင်းခြင်း အပါအဝင် အစီအမံအသစ်တွေ ဆောင်ရွက်ဖို့ စင်ကာပူ အာဏာပိုင်တွေနဲ့ နည်းပညာ ကျွမ်းကျင်သူတွေ ဆွေးနွေးနေတယ်လို့ သိရပါတယ်။ 

           ပြီးခဲ့တဲ့ ဇူလိုင်လအတွင်း ကျန်းမာရေးဝန်ကြီးဌာန ကျွမ်းကျင်သူများ အဖွဲ့မှ ထုတ်ပြန်ခဲ့တဲ့ အစီရင်ခံစာအရ အစီအမံသစ်တွေဟာ အသက် ၁၃ နှစ်မှ ၁၇ နှစ်အကြား အသုံးပြုသူတွေအတွက် ထိခိုက်စေနိုင်တဲ့ အချက်တွေကို အဓိက ကိုင်တွယ်ဖြေရှင်းသွားမှာ ဖြစ်တယ်လို့ သိရပါတယ်။ 

အဲဒီအချက်တွေထဲမှာ အသုံးပြုသူတွေကို အချိန်အကြာကြီး စွဲလန်းနေစေတဲ့ ကန့်သတ်မဲ့ ပွတ်ဆွဲကြည့်ရှုခြင်း (Infinite Scroll)၊ ဗီဒီယိုတွေ အလိုအလျောက် ပွင့်ခြင်း (Auto-play)၊ စိတ်အနှောင့်အယှက်ဖြစ်ဖွယ် အကြောင်း အရာတွေကို ပိုမိုပြသပေးတဲ့ Algorithm Feed တွေနဲ့ စိတ်ဓာတ်ရေးရာ ယှဉ်ပြိုင်မှုတွေ ဖြစ်ပေါ်စေတဲ့ "Like" အရေအတွက် ဖော်ပြမှုတွေအထိ ပါဝင်ပါတယ်။

ဒစ်ဂျစ်တယ်ဖွံ့ဖြိုးတိုးတက်ရေးနဲ့ သတင်းအချက်အလက်ဝန်ကြီး ဂျိုးဆက်ဖင်တီယို က အဆိုပါ စည်းမျဉ်းတွေကို ထိရောက်စွာ အကောင်အထည်ဖော်နိုင်ဖို့ အသက်အရွယ် စိစစ်တဲ့ စနစ်တွေ ပါဝင်တဲ့ ဥပဒေပြင်ဆင်ချက်တွေကို ၂၀၂၇ ခုနှစ် အစောပိုင်းမှာ လွှတ်တော်ကို တင်သွင်းသွားမယ်လို့ ပြောကြားခဲ့ပါတယ်။ သတင်းတွေအရ အသုံးပြုသူ လူငယ်တွေအတွက် နေ့စဉ် လူမှုကွန်ရက် အသုံးပြုချိန်ကို ပလပ်ဖောင်းအလိုက် ၁ နာရီမှ ၂ နာရီအထိ ကန့်သတ်ရေးကိုလည်း ဆွေးနွေးနေတယ်လို့ သိရပါတယ်။ ဒါအပြင် တရုတ်နိုင်ငံမှာ ကျင့်သုံးနေတဲ့ အတိုင်း ဖုန်း Operating System ပေါ်မှာ မိဘတွေက ထိန်းချုပ်နိုင်တဲ့ 'Minor Mode' ထည့်သွင်းရေး၊ Algorithm အစား အသုံးပြုသူကိုယ်တိုင် ကြည့်ရှုလိုတဲ့ အကြောင်းအရာများကို စိတ်ကြိုက် ရွေးချယ်နိုင်ရေးနဲ့  နေ့စဉ် ပို့စ်ကြည့်ရှုမှု ပမာဏ ကန့်သတ်ပေးတဲ့ Page Break စနစ်တွေ ထည့်သွင်းရေးတို့ကိုလည်း ကျွမ်းကျင်သူတွေက အကြံပြုထားပါတယ်။ စင်ကာပူရဲ့ အွန်လိုင်း ဘေးကင်းလုံခြုံရေး ကျင့်ဝတ်စနစ် (Code of Practice for Online Safety) အရ လက်ရှိ Facebook, Instagram, TikTok, HardwareZone, X နဲ့ YouTube မှာ ဒေသတွင်း အသုံးပြုသူတွေအတွက် အန္တရာယ်ရှိတဲ့ အကြောင်းအရာတွေနဲ့ ထိတွေ့မှုကို လျှော့ချဖို့ တာဝန်ရှိပြီး အဆိုပါ ပလပ်ဖောင်းတွေမှာ ကာကွယ်ရေး စည်းကမ်းသစ်တွေကို ပထမဆုံးအနေနဲ့ စတင် အကောင်အထည် ဖော်သွားဖွယ် ရှိနေတယ်လို့ သိရပါတယ်။