ထိုက်စံ(NSS)-စက်တင်ဘာ ၁၀

ရန်ကုန် - မန္တလေးအမြန်လမ်းမကြီးပေါ်တွင် မောင်းနှင်းခွင့်ရရန်အတွက် ယာဉ်စုစုပေါင်း (၆၀၀၀)ကျော်ကို Telematics GPS စနစ် တပ်ဆင်ပေးပြီးဖြစ်ကြောင်း ထုတ်ပြန်ချက်အရ သိရသည်။

ရန်ကုန် - မန္တလေးအမြန်လမ်းမကြီးပေါ်တွင် ခရီးသည်တင်မော်တော်ယာဉ်များနှင့် သတ်မှတ်ခွင့်ပြုထားသည့် ကုန်စည် (၁၄) မျိုးသာ တင်ဆောင်ရမည့် ကုန်တင်ယာဉ်ကြီးများသည် Telematics GPS စနစ် တပ်ဆင်ပြီးမှသာ လမ်းအသုံးပြုခွင့်ရမည် သိရသည်။

ထို့ကြောင့် ရန်ကုန် - မန္တလေး အမြန် လမ်းမကြီးပေါ်တွင် Telematics စနစ် GPS စက်များ တပ်ဆင်ပြီး ဝန်ဆောင်မှုပေးခြင်း လုပ်ငန်းများ ကို (၂၀၂၄) ခုနှစ် ဇွန်လတွင် စတင်ဆောင်ရွက်ခဲ့ပြီး ယမန်နေ့(စက်တင်ဘာ ၉ ရက်)အထိခရီးသည်တင် မော်တော်ယာဉ် (၃၅၂၅) စီး၊ ကုန်တင်ယာဉ် (၂၅၁၂) စီးတို့ကို Telematics စက်များ တပ်ဆင်ပေးပြီးဖြစ်ကြောင်း သိရသည်။

ထို့ပြင် နေပြည်တော် စီလမ်းဆုံ တိုးဂိတ်ရှိ Telematics Com-mand & Control Centerဖြင့် ရန်ကုန်-မန္တလေး အမြန်လမ်းမ ကြီးပေါ်တွင် သွားလာလျက်ရှိသည့် ခရီးသည်တင် မော်တော် ယာဉ်များ သတ်မှတ်အရှိန်နှုန်း (ကီလို ၉၀) အတွင်းသာ မောင်းနှင်စေရေး၊ ယာဉ်မရပ်ရသည့်နေရာများတွင် ရပ်တန့်မှုမရှိစေရေးတို့အတွက် တယ်လီဖုန်းဖြင့် သတိပေးခြင်းကို (၂၄) နာရီ ဝန်ဆောင်မှုဖြင့် ဆောင်ရွက်ပေးလျက်ရှိကြောင်း သိရသည်။

အဆိုပါ Telematics Com-mand & Control Center ၏ လုပ်ငန်းဆောင်ရွက်မှုများကို ဆောက်လုပ်ရေးဝန်ကြီးဌာန ဒုတိယဝန်ကြီး ဦးမျိုးမြင့်သည် ယမန်နေ့(စက်တင်ဘာ ၉ ရက်) နံနက်ပိုင်းက သွားရောက် ကြည့်ရှုခဲ့ကြောင်း သိရသည်။

ထို့ပြင် ရန်ကုန်-မန္တလေး အမြန်လမ်းမကြီး ရန်ကုန်-နေပြည်တော် လမ်းပိုင်းရှိ တိုးဂိတ်များရှိ CCTV အခန်းများ၊ ငွေကောက်ခံမှုစနစ်များ၊ နည်းပညာဆိုင်ရာ ဆောင်ရွက်ထားမှု၊ ကတ္တားပေါ်၌ မော်တော်ယာဉ်များ အခြင်အတွယ်၍ ဖြတ်သန်းမောင်းနှင် သွားလာ နေမှုနှင့် တိုးဂိတ်အဆောက်အအုံ များကို ကြည့်ရှုစစ်ဆေးခဲ့ကြောင်း သိရသည်။