Pika (NSS) - စက်တင်ဘာ ၂

တိဘက်-နီပေါနယ်စပ်မှာဖြစ်ပွားခဲ့တဲ့ဖြစ်ရပ်ဆိုးကြီးအပြီး သီတင်းပတ်(၁)ပတ်အကြာမှာ သိပ္ပံပညာရှင်တွေက ဟိမဝန္တာတောင်တန်းမှာ နောက်ထပ်ဘာတွေထပ်ဖြစ်လာနိုင်မလဲဆိုတာကို အနီးကပ်စောင့်ကြည့်လေ့လာမှုတွေလုပ်ဆောင်နေတယ်လို့ သိရပါတယ်။

မိုးသည်းထန်စွာရွာသွန်းမှုတွေ လျော့ကျသွားနိုင်ပေမယ့်လည်း အားနည်းတဲ့မြေပြင်အနေအထားနဲ့ မုတ်သုံမိုးတွေကြောင့် ပြန်လည်လှုပ်ရှားလာနိုင်တဲ့ ရွှံ့နွံနဲ့ ကျောက်တုံးများစွာကရှိနေဆဲဖြစ်တယ်လို့လည်း ကျွမ်းကျင်သူတွေက သတိပေးပြောဆိုထားပါတယ်။

ကင်းဘရစ်ချ်တက္ကသိုလ်ရဲ့သဘာဝဘေးအန္တရာယ်ဆိုင်ရာ လက်ထောက်ပါမောက္ခ Maximillian Van Wyk de Vries က နီပေါဖြစ်ရပ်ဆိုးကို အန္တရာယ်အမျိုးမျိုးဆက်တိုက်ဖြစ်ပေါ်နိုင်တဲ့ဖြစ်ရပ်ဆိုးတစ်ခုအဖြစ် ဖော်ပြပြောဆိုထားပြီး နောက်ထပ်အန္တရာယ်ရှိတဲ့ဖြစ်ရပ်ဆိုးတွေ ထပ်ဖြစ်လာနိုင်တယ်လို့လည်း ပြောကြားခဲ့ပါတယ်။

Maximillian Van Wyk de Vries က "ကျောက်တုံးတွေနဲ့ရေခဲတွေပြိုကျမှုကြောင့် ပျက်စီးဆုံးရှုံးမှုများစွာကိုဖြစ်ပေါ်စေခဲ့တဲ့ ရေကြီးမှုကြီးတစ်ခုကို ဖြစ်ပွားစေခဲ့ပါတယ်။ နောက်ဆက်တွဲအနေနဲ့ မြေပြိုမှုတွေထပ်ရှိခဲ့တယ်ဆိုတာကိုလည်း ကျွန်တော်တို့သိရှိထားပါတယ်” လို့ ပြောခဲ့ပါတယ်။

ဒါ့ပြင် သိပ္ပံပညာရှင်တွေဟာ မူလပြိုကျမှုဖြစ်စဉ်ရဲ့အရင်းအမြစ်နဲ့ အောက်ဘက်ချိုင့်ဝှမ်းနှစ်ခုစလုံးကို အနီးကပ်စောင့်ကြည့်မှုတွေလုပ်ဆောင်နေတယ်လို့လည်း Maximillian Van Wyk de Vries က ပြောကြားခဲ့ပါတယ်။

Maximillian Van Wyk de Vries က "အားနည်းသွားမြေပြင်အနေအထားနေရာတစ်ဝိုက်မှာ နောက်ထပ်ပြိုကျမှုတွေက ထပ်ဖြစ်လာနိုင်ခြေရှိပါတယ်။ချိုင့်ဝှမ်းတစ်လျှောက်မှာလည်း ရွှံ့နွံနဲ့ကျောက်တုံးတွေ မီတာပေါင်းများစွာဖုံးလွှမ်းနေပြီး မိုးသည်းထန်စွာရွာသွန်းရင် အဲဒီရေတွေက ထပ်မံမြင့်တက်လာပြီး ရေကြီးမှုအသစ်တစ်ခုက ဖြစ်ပေါ်လာနိုင်ပါတယ်” လို့ ပြောခဲ့ပါတယ်။