သန့်မင်းအိမ် (NSS) - စက်တင်ဘာ ၂

ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြိုနယ်ရှိ ငဝန်တာနိမ့်ကျမှုနှင့် ရေကျော်စီးဝင်မှုများ ကြောင့် ငဝန်တာကြောင့် တောင်သူများ ထိခိုက်မှု အပါအဝင် အချက်အလက်များအား မြန်ဆန်စွာ စာရင်း ကောက်ရန်အတွက် ဧရာဝတီတိုင်းဒေသကြီးဝန်ကြီးချုပ်ဦးအေးကျော်က ညွှန်ကြားခဲ့ကြောင်း တိုင်းအစိုးရ၏ထုတ်ပြန်ချက်အရ သိရသည်။

ငဝန်တာနိမ့်ကျခဲ့ပြီး ရေစီးဝင်လမ်းကြောင်းပိတ်ဆို့ကာကွယ် နိုင်ရေးလုပ်ငန်းများပြီးစီးရန် နီးကပ်လာပြီဖြစ်ပြီး ရေများပြန်လည်ကျဆင်းလာပြီဖြစ်သဖြင့် သီးနှံများ အမြန်ဆုံးပြန်လည်စိုက်ပျိုးနိုင်ရန်အတွက် လိုအပ်သော စက်ယန္တရားများ၊ မျိုးစေ့များနှင့် သွင်းအားစုများအား ကြိုတင်၍အသင့်စုဖွဲ့ထားရှိပြီးဖြစ်ကြောင်းနှင့် ရေပြန်လည်ကျဆင်းလာသည်နှင့် တစ်ပြိုင်နက် စပါးစိုက်ပျိုး၍ရသည့်နေရာများကို ဦးစားပေးထွန်ယက်စိုက်ပျိုးနိုင်ရေး ဆောင်ရွက် သွားမည်ဖြစ်ကြောင်း ဧရာဝတီတိုင်းဒေသကြီးဝန်ကြီးချုပ် ဦးအေးကျော်က ပြောသည်။ 

ထို့ပြင် မတ်ပဲ၊ ပဲတီစိမ်း၊ ပဲပုပ်အစရှိသည့် အခြားသီးနှံများ စိုက်ပျိုးနိုင်ရေးအတွက်လည်း လိုအပ်သည်များကို ကြိုတင်စီမံဆောင်ရွက်ထားရမည်ဖြစ်ကြောင်း၊ ရေကြီး နစ်မြုပ်မှုများမှ ကွင်းအလိုက်ရေပြန်ပေါ်သည့် ဧရိယာ၊ ဧက၊ တောင်သူတစ်ဦးချင်း၏ ပျက်စီးခဲ့သည့် စိုက်ဧက၊ ပြန်လည်စိုက်ပျိုးမည့်သီးနှံ၊ မျိုးစေ့နှင့်သွင်းအားစု လိုအပ်ချက်၊ ထွန်ယက် စိုက်ပျိုးမည့် အခြေအနေ၊ စိုက်ပျိုးရေရရှိမှုအခြေအနေများနှင့်ပတ်သက်သည့် စာရင်းဇယားများ ကိန်းဂဏန်း အချက်အလက်များကို ကွင်းအလိုက် သက်ဆိုင်ရာဌာနများ ပါဝင်သည့်အဖွဲ့များစုဖွဲ့၍ မြန်မြန် ဆန်ဆန်မှန်မှန်ကန်ကန် ကွင်းဆင်းကောက်ယူကြရမည်ဖြစ်ကြောင်းနှင့် နိုင်ငံတော်မှ လိုအပ်သည်များကို ပံ့ပိုးဖြည့်ဆည်းဆောင်ရွက်ပေးထားပြီးဖြစ်သဖြင့် ပြည်သူများအတွက်ထိရောက်မှုရှိပြီး လေလွင့်ဆုံးရှုံးမှုမရှိစေရေး တာဝန်ရှိသူများအနေဖြင့် အနီးကပ်ကြီးကြပ်၍ တွန်းအားပေးကြပ်မတ် ဆောင်ရွက်သွားကြရမည်ဖြစ်ကြောင်း ပြောကြားသည်။

ယင်းအပြင် စက်မှုလယ်ယာဦးစီးဌာန တိုင်းဦးစီးမှူးက စက်ယန္တရားများအသင့်စုဖွဲ့ထားရှိမှု အခြေအနေများကို လည်းကောင်း၊ ဆည်မြောင်းနှင့် ရေအသုံးချမှုစီမံခန့်ခွဲရေးဦးစီးဌာန(ရေအရင်းအမြစ်) တိုင်းဦးစီးမှူးက စိုက်ပျိုးရေရရှိရေးအတွက် ရေတင်စက်များ၊ ဆိုလာရေတင်စနစ်များဖြင့် စိုက်ပျိုးရေရှိရေး ဆောင်ရွက်သွားမည့်အခြေအနေများနှင့်တက်ရောက်လာသူများ၏ အထွေထွေဆွေးနွေးတင်ပြချက်များအပေါ် တိုင်းဒေသကြီးဝန်ကြီးချုပ်က လိုအပ်သည်များဖြည့်စွက်ဆွေးနွေးကာ ပေါင်းစပ်ညှိနှိုင်း ဆောင်ရွက်ပေးခဲ့သည်။