စော(NSS)-အောက်တိုဘာ ၁၇

နေပြည်တော်၌ ခုတင်(၁၀၀၀)ဆေးရုံအပါအဝင် နေရာအချို့ အောက်တိုဘာ ၁၉ရက်နေ့၊ နံနက် (၈)နာရီမှ ညနေ(၅)နာရီအထိ လျှပ်စစ်ဓာတ်အားပြတ်တောက်မှုဖြစ်ပေါ်မည်ဖြစ်၍ ရေပေးဝေမှုနောက်ကျမည်ဖြစ်ကြောင်း နေပြည်တော်စည်ပင်သာယာ‌ရေးကော်မတီထံမှ သိရသည်။ 

ထို့ကြောင့် နေပြည်တော်စည်ပင်သာယာရေးကော်မတီ၊ အင်ဂျင်နီယာဌာန(ရေနှင့်သန့်ရှင်းမှု) ကွပ်ကဲမှုအောက်ရှိ ရေသန့်စင်စက်ရုံအမှတ်(၁)မှ ရေပေးဝေရေး အပိုင်းများဖြစ်သော လွှတ်တော်ဝန်ထမ်းအိမ်ရာ၊ အိမ်တော်ဝန်ထမ်းအိမ်ရာများ၊ လေးကျွန်းရေပေး ရေးဝင်း(ရုံးကြီးများ)၊ နန်းဦးရေပေးရေးမှ ဇေယျသိဒ္ဓိရပ်ကွက်(စံပယ်အိမ်ရာ)များသို့ ရေပေးဝေမှုနောက်ကျမည်ဖြစ်ကြောင်း ဖော်ပြချက်အရ သိရသည်။

ထို့ပြင်  ကံ့ကော်အိမ်ရာ၊ ခုတင်(၁၀၀၀)ပြည်သူ့ဆေးရုံကြီး၊ မြို့တော်ခန်းမ၊ စည်ပင်ဝန်ထမ်းအိမ်ရာ၊ သပြေကုန်းဈေး၊ နိုင်ငံခြားရေးရုံး၊ ပြည်ထဲရေးရုံး၊ ရေပန်းဥယျာဉ်၊ ခရေအိမ်ရာနှင့် သုခတော်ဝင်အိမ်ရာများလည်းပါဝင်ကြောင်း ဖော်ပြထားသည်။