သန့်ဇင်(NP News)-အောက်တိုဘာ ၁၆

အရပ်ဖက်အဖွဲ့အစည်းများမှတ်ပုံတင်ရာတွင် ငြိမ်းချမ်းရေးကို အထောက်အကူပြုရန်နှင့် ဆူပူမှုကို အားမပေးရန် အာမခံချက်များ ပါရန်လိုကြောင်း တပ်မတော်အရာရှိဟောင်း၊ နိုင်ငံရေးလေ့လာ၊သုံးသပ်သူ ဒေါက်တာအောင်မျိုးက ပြောကြားသည်။

ယနေ့(အောက်တိုဘာ ၁၆ရက်) မွန်းလွဲပိုင်းက နေပြည်တော်ရှိ မြန်မာအပြည်ပြည် ဆိုင်ရာကွန်ဗင်းရှင်း ဗဟိုဌာန-(၁) (MICC-I) တွင် ကျင်းပသော NCA (၁၀) နှစ်ပြည့် နှစ်ပတ်လည် အလုပ်ရုံဆွေးနွေးပွဲယာယီရပ်နားစဉ် မီဒီယာများ၏ မေးမြန်းမှုအပေါ် အထက်ပါကဲ့သို့ ပြောကြားခဲ့ခြင်းဖြစ်သည်။

လက်ရှိကျင်းပပြုလုပ်လျက်ရှိသော အလုပ်ရုံဆွေးနွေးပွဲတွင် ဒေါက်တာအောင်မျိုးက ငြိမ်းချမ်းရေးလုပ်ငန်းစဉ်အတွင်း အရပ်ဖက်အဖွဲ့ အစည်းများ ပါဝင်လာရန်ဆွေးနွေးခဲ့ကြောင်း သိရသည်။

“အဖွဲ့စည်းတိုင်းရဲ့စိတ်မှာငြိမ်းချမ်းရေးရတာကောင်းတယ်။ ငြိမ်းချမ်းရေးရတာမြတ်နိုးဖွယ်ရာပဲ။ ဆူပူမှုကမကောင်းဘူးဆိုတဲ့ Idea ကို အဖွဲ့တိုင်းမှာဝင်သွားအောင်ပေါ့နော်။ အဲဒါကတော့ ပထမဆုံးရည်မှန်းချက်ပေါ့နော်။ အဲဒါကိုရည်ရွယ်ခြင်းဖြစ်ပါတယ်။ ဘယ်အဖွဲ့ ရယ်လို့မဟုတ်ဘူး။ အဖွဲ့တိုင်းပေါ့နော်”ဟု ဒေါက်တာအောင်မျိုးက ဆိုသည်။

အရပ်ဖက်အဖွဲ့အစည်းများသည် မြို့နယ်အထွေထွေအုပ်ချုပ်ရေးရုံးတွင်မှတ်ပုံတင်ရမည်ဖြစ်ပြီး မှတ်ပုံတင်ရသည့် ရည်ရွယ်ချက်အတွင်း ငြိမ်းရေးအား အထောက်အကူပြုရန်နှင့် ဆူပူမှုကို အားမပေးကြောင်း ရည်မှန်းချက်ပါရမည်ဖြစ်ကြောင်း ၎င်းကဆိုသည်။

“အဲဒါက ဒေသန္တရအုပ်ချုပ်ရေးနဲ့သွားရမှာ။ သူတို့အဖွဲ့အစည်းဆိုတဲ့အတွက် မှတ်ပုံတင်မယ်။ မှတ်ပုံတင်တဲ့ရည်ရွယ်ချက်က တစ်ခုပါမှာက ငြိမ်းရေးကိုအထောက်အကူပြုရမယ်။ ဆူပူမှုကို အားမပေးဘူးဆိုတဲ့ ရည်မှန်းချက်ပါရမယ်။ အဲဒါကဘာနဲ့သွားမလဲဆိုရင် ဒေသန္တရအုပ် ချုပ်ရေး ထွေအုပ်ပေါ့‌နော်အဲဒီတော့မှတ်ပုံတင်ရမယ်။ လွယ်လွယ်ကူကူပဲတင်ရမယ်။ လွယ်လွယ်ကူကူတင်နိုင်အောင် လည်းလုပ်ပေးရ မယ်။ အဲဒီအချက်တွေထည့်သွင်းပေးရမယ်လို့ ဆိုလိုခြင်းဖြစ်ပါတယ်”ဟု ၎င်းက ပြောကြားခဲ့သည်။

သို့သော်လက်ရှိအနေအထားအရ ငြိမ်းချမ်းရေးလမ်းစဉ်တွင် အရပ်ဖက်အဖွဲ့များ၏ ပူးပေါင်းဆောင်ရွက်ရေးမှာ နိုင်ငံရေးအခြေအနေအပြင်စသောအကြောင်းအရာများကြောင့် ငြိမ်းချမ်းရေးအတွက်ပြတ်သားစွာရပ်တည်ရန် ခက်ခဲနေဦးမည်ဖြစ်ကြောင်း ၎င်းကဆိုသည်

“လက်ရှိအခြေအနေမှာ ငြိမ်းချမ်းရေးလမ်းစဉ်ကို အရပ်ဖက်အဖွဲ့က ပူးပေါင်းဆောင်ရွက်ရေးအခြေအနေက အဲဒါကလက်ရှိအနေ အထား မှာ စစ်လည်းဖြစ်နေတယ်လေ။ ငွေကြေးဖောင်းပွမှုကလည်းမြင့်တက်နေတယ်။ လက်ရှိအခြေအနေမှာ နိုင်ငံတော်ကလည်း စစ်အနိုင် တိုက်ရေး ကိုပဲ စဉ်းစားနေရတယ်။ အဲဒီတော့ တကယ့်တကယ်ကျတော့ Good Government ဆိုတဲ့ အုပ်ချုပ်ရေးကောင်း ပေါ့နော်။ ဥပမာတရားရုံးတွေက မှန်ကန်တယ်လို့လက်ခံရမယ်။ အားလုံးက ကုန်ဈေးနှုန်းတွေကလည်းကျရမယ်။ တိုင်းပြည်ကလည်း ကောင်းကောင်းမွန်မွန် သွားနေတယ်ဆိုတဲ့။ ဥပမာ ရွေးကောက်ပွဲလုပ်တော့မယ် ပါတီစုံဒီမိုကရေစီစနစ်ကို ပြန်သွားတော့မယ်။ အဲဒီလိုမျိုး မကောင်းရင်တောင်မှပဲ‌ ကောင်းတဲ့အလားလာရှိနေတယ်ဆိုတဲ့ ပတ်ဝန်းကျင်ကြီးတစ်ခုတည်ဆောက်ရမယ်။ အဲဒီလိုတည်ဆောက်တော့မှ စောစောအချက်တွေနဲ့ဟန်ချက်ညီလိုက်တာ။ အဲဒီလိုမျိုးမတည်ဆောက်နိုင်ရင်တော့ လူအဖွဲ့အစည်းတွေက ငြိမ်းချမ်းရေးဘက်ကို ပြတ်ပြတ်သားသားရပ်တည်ဖို့ဆိုတာ အခက်အခဲရှိဦးမှာပါ”ဟု ၎င်းကပြောသည်။