သန့်ဇင်(NSS)-နိုဝင်ဘာ ၁၅

အကြောင်းအမျိုးမျိုးကြောင့် ပိတ်ထားရသော တက္ကသိုလ်များကို လာမည့်နှစ်တွင် ဖွင့်လှစ်နိုင်ရန်ကြိုးစားနေပြီး မကြာမီအခြား တက္ကသိုလ်များလည်း ပြန်ဖွင့်ရန်စီစဉ်နေကြောင်း နိုင်ငံတော်လုံခြုံရေးနှင့်အေးချမ်းသာယာရေးကော်မရှင်ဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က ပြောကြားခဲ့ကြောင်း သိရသည်။

ယနေ့(အောက်တိုဘာ ၁၅ရက်) နံနက်ပိုင်းက နေပြည်တော်၊ မြန်မာအပြည်ပြည် ဆိုင်ရာကွန်ဗင်းရှင်း ဗဟိုဌာန-(၁) (MICC-I) တွင်ကျင်းပသော တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ်NCA (၁၀) နှစ်ပြည့်နှစ်ပတ်လည်ပွဲတွင် တက်ရောက်မိန့်ခွန်း ပြောကြားစဉ်အထက်ပါကဲ့သို့ ပြောကြားခဲ့ကြောင်း သိရသည်။

ပညာရေးနှင့်ပတ်သက်၍ တိုင်းပြည်တွင် အသိပညာ၊ အတန်းပညာနှင့် အတတ်ပညာ အားနည်းချက်များရှိနေသည်မှာ ငြင်းဆန်၍ မရကြောင်း ဗိုလ်ချုပ်မှူးကြီးမင်းအောင်လှိုင်ကဆိုသည်။

“ဒါကိုကျွန်တော်တို့က ပညာရေးနဲ့ပတ်သက်ပြီးတော့ သည်းခံရမယ့်နှစ်တွေကိုတော့ မရှက်ပါဘူး။ ကျွန်တော်ပြောတာ တစ်ခါတစ်လေ ကျတော့လည်း ကိုယ့်ပေါင်ကိုယ်လှန်ထောင်းနေသလိုပဲ။ တကယ်တော့ တကယ့်အမှန်ပါ။ ကျွန်တော်တို့မှာ အားနည်းချက်ရှိတာ ပညာရေး အားနည်းချက်ရှိတဲ့အတွက်ကြောင့် ပထမအဆင့်အနေနဲ့ GK - +9 အထိကိုသွားဖို့ ရအောင် လုပ်ကြဖို့လိုပါတယ်။ အခုတတ်နိုင် သလောက်တော့ ကျွန်တော်ကျောင်းတွေဖွင့်ပါတယ်။ ပြီးခဲ့တဲ့ရက်ပိုင်းက ကျောက်မဲပြန်ပြီးတော့ ထိန်းချုပ်နိုင်တဲ့အခါ ချက်ချင်းကျောင်း တွေရအောင်ဖွင့်ပါ KG ရအောင်ဖွင့်ပါ ။ ကလေးတွေကို အစိုးရစစ်ကျောင်းတွေကတော့ မပြောဘူးပေါ့။ ကျောင်းစစ်တွေရှိတယ်။ ကျောင်းစစ်တွေမှာတော့ စနေ၊ တနင်္ဂနွေမှာပါသင်ပေး။ သင်ပြီးသလောက် စာမေးပွဲစစ်ပေးရမယ်”ဟု ဗိုလ်ချုပ်မှူး ကြီးမင်းအောင်လှိုင်က ပြောကြားခဲ့သည်။

ထို့ပြင် စာသင်နှစ်များနောက်ကျခဲ့သည့် ကလေးများအတွက် နွေရာသီကျောင်းပိတ်များတွင်လည်း အခြေခံပညာကျောင်းများဖွင့်ကာ ကျောင်းပြန်တက်စေရမည်ဖြစ်ကြောင်း ဗိုလ်ချုပ်မှူး ကြီးမင်းအောင်လှိုင်ကဆိုသည်။

"ပြီးရင်လည်း ကျောင်းပိတ်ရက်တွေမှာလည်း ပြန်တက်ခိုင်း၊ နွေရာသီကျောင်းပိတ်ရက်ကျရင် ကျောင်းပြန်တက်ခိုင်း ပြန်တက်ခိုင်းပြီး စာလုပ်၊ အဲဒီမှာစာလုပ်ပြီးရင် စာမေးပွဲတစ်ခါပြန်စစ်၊ ဒီလိုနဲ့  ကလေးတွေမဆုံးရှုံးအောင်၊ တစ်နှစ်ဆုံးရှုံးမှုဆိုတာလည်း ကလေးတွေအတွက် ကြီးမားပါတယ်။ တက်ရောက်လာတဲ့ကိုယ်စားလှယ် တွေလည်း ကျောင်းနေဖူးတဲ့သူတွေဖြစ်ပါတယ်။ သားသမီးချင်း၊ ကျောင်းသားချင်း၊ မိဘချင်းစာနာဖို့လိုပါတယ်။  ဒါကြောင့် သူတို့တွေပညာတက်ပြီး ပညာတွေမကျန်ခဲ့အောင် အတတ်နိုင်ဆုံးဆောင် ရွက်ပေးပါတယ်” ဗိုလ်ချုပ်မှူး ကြီးမင်းအောင်လှိုင်က ပြောကြားခဲ့သည်။

ထို့ပြင် အကြောင်းအမျိုးမျိုးကြေင့် ပိတ်ထားရသော တက္ကသိုလ်တွေ၊ ကောလိပ်များကိုလည်း တတ်နိုင်သမျှပြန်လည်ဖွင့်လှစ်ခိုင်းထားပြီး လာမည့်နှစ်တွင်တွင်လည်း ကျန်ရှိတက္ကသိုလ်များဖွင့်လစ်ရန်ကြိုးစားနေကြောင်း ဗိုလ်ချုပ်မှူးကြီးမင်းအောင်လှိုင်က ဆိုသည်။

“အလားတူပါပဲ တက္ကသိုလ်တွေ၊ ကောလိပ်တွေမှာလည်း အကြောင်းအမျိုးမျိုးကြောင့် ပိတ်လိုက်ရတဲ့ကျောင်းတွေရှိပါတယ်။ တတ်နိုင်သလောက်ဖွင့်ခိုင်းပါတယ်။ ပျက်စီး သွားတဲ့ကျောင်းတွေက စောစော board မှာပြထားတဲ့ပုံတွေမှ တွေ့ပါလိမ့်မယ်။ ကြီးမားတဲ့ဆုံးရှုံးမှုတွေအများကြီးဖြစ်ပေါ်လာခဲ့ရင် အတတ်နိုင်ဆုံး ပြင်ပါ။ မြန်မြန်ပြင်ပြီးတော့ လာမယ့်ပညာသင်နှစ်။ ဒီနှစ်ဆိုရင်လည်း လွိုင်ကော်တက္ကသိုလ် ကျွန်တော် ဖွင့်ဖို့လုပ်ထားပါတယ်။ လာမည့်နှစ်ဆိုရင် ကျန်တဲ့တက္ကသိုလ်တွေဖွင့်နိုင်အောင် ကျွန်တော်တို့ ဖွင့်နိုင်အောင်ကြိုးစားသွားပါမယ်။ မကြာခင်မှာလည်း အခြားတစ်နေရာက တက္ကသိုလ်တွေ ဖွင့်နိုင်အောင်ဖို့အတွက် စီစဉ်နေပါတယ်” ဟု ဗိုလ်ချုပ်မှူးကြီးမင်းအောင်လှိုင်က ထည့်သွင်းပြောကြားခဲ့သည်။