ဂျန်ဇက် (NSS) - သြဂုတ် ၂ 

အမေရိကန်အစိုးရသည် ထိုင်းနှင့်ကမ္ဘောဒီးယားနိုင်ငံကြား အပစ်ခတ်ရပ်စဲရေးရယူရန် သဘောတူညီမှုများရရှိခဲ့ပြီး နောက် နှစ်နိုင်ငံစလုံးကို ကုန်သွယ်ခွန် ၁၉ ရာခိုင်နှုန်းသာ ကောက်ခံမည်ဖြစ်ကြောင်း သိရသည်။ 

အမေရိကန်အစိုးရသည် ထိုင်းနှင့် ကမ္ဘောဒီးယားနိုင်ငံတို့ကို ယခင်က ကုန်သွယ်ခွန် ၃၆ ရာခိုင်နှုန်းကောက်ခံရန် စီစဉ်ခဲ့သော်လည်း နှစ်နိုင်ငံကြားစစ်ပွဲဖြစ်ပွားချိန်တွင် အမေရိကန်သမ္မတ၏ ကြားဝင်စေ့စပ်မှုကိုလက်ခံပြီး အပစ်ခတ်ရပ်စဲရေးရယူရန် သဘောတူညီခဲ့ခြင်းကြောင့် ကုန်သွယ်ခွန်ကို ၁၉ ရာခိုင်နှုန်းသာ ကောက်ခံရန် စီစဉ်ခဲ့ခြင်းဖြစ်သည်။ 

အမေရိကန်သမ္မတက ထိုင်းနှင့်ကမ္ဘောဒီးယားနိုင်ငံတို့သည် စစ်ပွဲဖြစ်ပွားနေချိန်အတွင်း တိုက်ခိုက်မှုများကို အဆုံးသတ်ပြီး စေ့စပ်ဆွေးနွေးမှုမလုပ်ဆောင်ဘူးဆိုလျှင် နှစ်နိုင်ငံစလုံးကို ကုန်သွယ်ခွန်တိုးမြှင့်ကောက်ခံမည်ဟု သတိပေးခဲ့ကြောင်း သိရသည်။ မလေးရှားနိုင်ငံသည်  ထိုင်းနှင့် ကမ္ဘောဒီးယားနိုင်ငံကြား အပစ်ခတ်ရပ်စဲနိုင်ရန် လက်တွေ့ကြားဝင်ဆောင်ရွက်ပေးခဲ့သည့်အတွက် ကုန်သွယ်ခွန် ၁၉ ရာခိုင်နှုန်းသာ ကောက်ခံဖြစ်ကြောင်း အမေရိကန်အစိုးရက ပြောသည်။

အမေရိကန်အစိုးရသည် အရှေ့တောင်အာရှဒေသအတွင်းနိုင်ငံများအနက် ထိုင်း၊ ကမ္ဘောဒီးယား၊ မလေးရှား၊ အင်ဒိုနီးရှား၊ ဖိလစ်ပိုင်နိုင်ငံတို့ကို ကုန်သွယ်ခွန် ၁၉ ရာခိုင်နှုန်းသာ ကောက်ခံမည်ဖြစ်ကြောင်း ပြောသည်။ အမေရိကန်သည် မြန်မာနှင့် လာအိုနိုင်ငံကို ကုန်သွယ်ခွန် ၄၀ရာခိုင်နှုန်း၊ ဗီယက်နမ်နိုင်ငံကို ၂၀ရာခိုင်နှုန်း၊ ဘရူးနိုင်း နိုင်ငံကို ၂၅ ရာခိုင်နှုန်း၊ စင်ကာပူနိုင်ငံကို ၁ဝ ရာခိုင်နှုန်းကောက်ခံမည်ဟု ဆိုထားသည်။ 

ထိုင်းအစိုးရအဖွဲ့ပြောရေးဆိုခွင့်ရှိသူက ''အမေရိကန်ရဲ့ကုန်သွယ်ခွန်ဟာ နှစ်နိုင်ငံကြားအပြန်အလှန် ကုန်သွယ်ရေး နဲ့ ရေရှည်စီးပွားရေးတည်ငြိမ်မှုများအတွက် အပြန်အလှန် အကျိုးဖြစ်ထွန်းလာဖွယ်ရှိတယ်'' ဟု ပြောသည်။