သက်ပိုင် (NSS) - ဇူလိုင်လ ၁၅ 

        ရခိုင်ပြည်နယ်မှ AA  ထိန်းချုပ်ရာဒေသ များတွင် အခြေခံစားသောက်ကုန်အပါအဝင် လူသုံး ကုန်ပစ္စည်းများအားလုံး အဆမတန်ဈေးမြင့်တက် လျက်ရှိကြောင်း ဒေသခံများက NSS သို့ ပြောသည်။

လက်ရှိတွင် အခြေခံစားသောက်ကုန်များ မှာ ပြည်မနှင့်နှိုင်းယှဉ်ပါက သုံးဆကျော်လေးဆခန့် အထိ မြင့်တက်လျက်ရှိကြောင်းနှင့် ထိုသို့ မြင့်တက် မှုကြောင့် ဒေသခံပြည်သူများမှာ ကျပ်တည်းမှုများနှင့် ကြုံတွေ့နေရကြောင်း သိရသည်။

" ဒီမှာက အလုပ်အကိုင်တွေကလည်း ဒီလောက်ထိမရှိဘူး။ ဒီကြားထဲ ကုန်ဈေးတွေကလည်း အရမ်းကြီးလာတော့ တော်တော်ဒုက္ခရောက်ကြရ တယ်။ တခြားမပြောနဲ့ ငရုတ်သီးစိမ်းလိုဟာတောင် တစ်ဆယ်သားကို ငါးထောင်လောက်ပေးနေရတယ်။ ငွေသုံးသောင်းရှိရင်တောင် မိသားစုထမင်းဝိုင်း တစ်နပ်စာအတွက် ကောင်းကောင်းမွန်မွန် မစားရ သေးတဲ့ အခြေအနေဖြစ်နေတာ" ဟု မြေပုံမြို့နယ်မှ ဒေသခံတစ်ဦးကဆိုသည်။

AA ထိန်းချုပ်ရာဒေသများတွင် ဆန်ကြမ်း တစ်အိတ်လျှင် ငွေကျပ်(၂၀ဝဝဝ၀)ကျပ်၊ စားအုန်းဆီ တစ်ပိဿာလျှင် (၃၀ဝဝဝ)ကျပ်မှ (၃၅၀ဝဝ) ကျပ် အကြား၊ ငရုတ်သီးစိမ်း တစ်ပိသာလျှင် (၅၀ဝဝဝ) ကျပ်မှ (၆၀ဝဝဝ)ကျပ်အကြား၊ ကြက်သွန်နီ တစ် ပိဿာလျှင် (၂၅၀ဝဝ) နှင့် (၃၀ဝဝဝ) ကျပ်အကြား၊ ကြက်ဥတစ်လုံးလျှင် (၁၅၀ဝ)ကျပ်၊ ခေါက်ဆွဲ ခြောက်တစ်ထုပ်လျှင် (၅၀ဝဝ)ကျပ်နှင့် ဆရာခို လိမ်းဆေး တစ်ဘူးလျှင် ငွေကျပ် (၅ဝဝဝ)အထိ ဈေးနှုန်းမြင့်တက်လျက်ရှိကြောင်း သိရသည်။

ရခိုင်ပြည်နယ်အနေဖြင့် ယခင်က ကုန် စည်စီးဆင်းရေးအတွက် ပြည်မကို (၉၈) ရာခိုင်နှုန်း အထိ မှီခိုနေခဲ့ရခြင်းဖြစ်သည့်အတွက် AA ထိန်းချုပ်ပြီးနောက်ပိုင်းတွင် ကုန်စည်စီးဆင်းမှုပြတ် တောက်ကာ အဆမတန်ဈေးနှုန်းမြင့်တက်လာ ရခြင်းဖြစ်ကြောင်း စစ်တွေမြို့မှ အမည်မဖော်လိုသည့် စီးပွားရေးလုပ်ငန်းရှင်တစ်ဦးက ဆိုသည်။

" လက်ရှိမှာ အဲဒီဘက်က ကုန်သည်တွေ က မီဇိုရမ်ဘက်ကနေပြီး ကုန်တွေကို သယ်ကြတယ် လို့ သိရတယ်။ နောက်ပြီးတော့ အိန္ဒိယတို့ ဘင်္ဂလား ဒေ့ရှ်တို့ဘက်ကလည်း ရသလောက်သယ်ပြီး ပြန် ရောင်းနေကြတယ်လို့ သိရတယ်။ ဘင်္ဂလားဒေ့ရှ် ဘက်က တရားဝင်သယ်လို့မရတော့ အခု မီဇိုရမ်ဘက် ကို အားကိုးနေရတယ်ကြားတာပဲ။ ဒီတော့ ကုန်ကျ စရိတ်တွေများပြီး ကုန်တွေကလည်း ဈေးတက်မှာ အသေအချာပဲ" ဟု ၎င်းက သုံးသပ်ပြောဆိုသည်။

ထို့ပြင် AA ထိန်းချုပ်ထားသည့် အမ်း၊ တောင်ကုတ်၊ ရမ်းဗြဲ၊ မအီနှင့် သံတွဲမြို့နယ်များတွင် အခြေခံစားသောက်ကုန်များရှားပါးနေပြီး ဒေသခံ များမှာ စားဝတ်နေရေးအတွက် ပြင်ပအလှူရှင်များ၏ အကူအညီဖြင့် ရပ်တည်စားသောက်နေကြရကြောင်း ဒေသခံများထံမှသိရသည်။