ဂျန်ဇက် (NSS) - စက်တင်ဘာ ၂၆

မြန်မာအစိုးရ နှင့် အခြားသက်ဆိုင်ရာလက်နက်ကိုင်အဖွဲ့စည်းများအနေဖြင့် ထိခိုက်လွယ်သော အဖွဲ့စည်းများထံ လူသားချင်းဆိုင်ရာစာနာမှုအကူညီပေးရေးပစ္စည်းများကူညီပေးပို့မှုများကို ဟန့်တားမှုမရှိဘဲ ဘေးကင်းလုံခြုံမှုများဖြစ်လာစေရန် ဝိုင်းဝန်းကူညီပေးစေလိုကြောင်း ဗြိတိန်နိုင်ငံ၏ လူ့အခွင့်ရေးဆိုင်ရာ သံအမတ်ကြီး အီလန်နာဆန်ဒါးစ့်က ထုတ်ဖော်ပြောဆိုလိုက်သည်။မြန်မာပြည်သူများသည် လက်ရှိအချိန်တွင် ရေကြီးမှုဒဏ်၊ အစားစာမလုံခြုံမှုမြင့်တက်ခြင်းအပြင် ကျန်းမာရေးဝန်ဆောင်မှုများနှင့် တစ်ကိုယ်ရေသုံးပစ္စည်းများလိုအပ်နေသည့် သက်ရောက်မှုများကို တွေ့ကြုံခံစားနေရကြောင်း ၎င်းကထပ်မံပြောဆိုခဲ့သည်။

ဗြိတိန်အစိုးရအနေဖြင့် ယခုဘဏ္ဍာနှစ်အတွင်း လူသားချင်းဆိုင်ရာစာနာမှုအကူညီအဖြစ် ပေါင်သန်း (၄၀)ကျော်ကူညီထောက်ပံ့ပေးမည်ဖြစ်သလိုအခြားငွေကြေးချမ်းသာသော နိုင်ငံများအနေဖြင့်လည်း တတ်စွမ်းသရွှေ့ ပိုမိုကူညီထောက်ပံ့ပေးစေလိုကြောင်း ဗြိတိန်သံအမတ်ကြီး ဆန်ဒါးစ့်ကကုလ သမဂ္ဂ လူ့အခွင့်ရေးကောင်စီအစည်းအဝေးအတွင်း မိန့်ခွန်းပြောဆိုရာတွင် ထည့်သွင်းပြောဆိုခဲ့သည်။ လက်ရှိအချိန်တွင် မြန်မာနိုင်ငံ၌ လူသားချင်းဆိုင်ရာစာနာမှုအကူညီလိုအပ်မှု နှင့် လူ့အခွင့်ရေးအခြေနေများလိုအပ်ချက်မြင့်တက်နေကြောင်း သိရသည်။ 

ထို့ပြင် သြဂုတ်လအတွင်း၌ လူပေါင်း (၄၂၀၀၀)ကျော် နေရပ်စွန့်ခွာခဲ့ရပြီး အာဏာအငြင်းပွားမှုဖြစ်ပွားခဲ့ပြီးနောက်ပိုင်း တစ်လအတွင်း နေရပ်စွန့်ခွာခဲ့ရမှုအများဆုံးဖြစ်ခဲ့ကြောင်း ဗြိတိန်သံအမတ်ကြီးက ပြောသည်။ မြန်မာနိုင်ငံတွင် အာဏာအငြင်းပွားမှုများဖြစ်ပွားခဲ့ပြီးနောက်ပိုင်း ဖြစ်ပွားလာခဲ့သောလက်နက်ကိုင်ပဋိပက္ခများကြောင့် လူပေါင်းသန်းချီနေရပ်စွန့်ခွာနေထိုင်နေရချိန်တွင် စက်တင်ဘာလအတွင်း လူပေါင်းသိန်းချီနေရပ်စွန့်ခွာစေခဲ့သောရေကြီးမှုများထပ်မံဖြစ်ပွားလာခဲ့ကြောင်းသိရသည်။