ယွန်း (NSS) - စက်တင်ဘာ ၂၆

ပြည်ပမှ ကုန်ပစ္စည်းတင်သွင်းမှုများကို အပ်ကုန်စနစ်ဖြင့် ခွင့်ပြုပေးသင့်ကြောင်း ပြည်တွင်းရှိ စီးပွားရေးလုပ်ငန်းရှင်များက ပြောသည်။  

ယခုကာလများတွင် ပြည်တွင်း၌ ဆေးဝါး အပါအဝင် စက်သုံးဆီ၊ စားသုံးဆီနှင့် အချို့ကုန်စည်များ မကြာခဏ ပြတ်လပ်မှု ဖြစ်ပေါ်လျက်ရှိပြီး နိုင်ငံခြားငွေရှားပါးမှု ယခင်ကထက် ပိုမိုဆိုးရွားလာသည့်အတွက် သွင်းကုန်လိုင်စင်များကို လည်း အကန့်အသတ်ဖြင့်သာ ခွင့်ပြုလျက်ရှိသည်။

ထို့ကြောင့် ပြည်တွင်း၌ ကုန်ပစ္စည်းရှားပါးမှုပြဿနာများ သက်သာစေရေးနှင့် နိုင်ငံခြားငွေ အခက်အခဲများ ပြေလည်စေရေးအတွက် လူသုံးကုန်ပစ္စည်းများအပါအဝင် စားသုံးကုန်များ၊ ဆေးဝါးနှင့် ပြည်ပမှ တင်သွင်းမည့် သွင်းကုန် များအားလုံးကို အပ်ကုန်စနစ်ဖြင့် တင်သွင်းရောင်းချခွင့် ပေးသင့်ကြောင်း ပြည်တွင်းရှိ စီးပွားရေးလုပ်ငန်းရှင်တစ်ဦးက NSS ကို ပြောသည်။ 

“တကယ်ဆိုရင် ပစ္စည်းတင်သွင်းမယ့် ကုမ္ပဏီတွေကို မင်းတို့တာဝန်ယူပြီးသွင်းဆိုပြီး လွတ်လွတ်လပ်လပ် ပေးသွင်းလိုက်သင့်တာ။ အဲဒါဆိုရင် ပစ္စည်းတွေပိုပြီး မြန်မြန်ရောက်လာမယ်။ အဲဒီလို လုပ်ဖို့ဆိုတာကလည်း  နိုင်ငံခြား မှာဆိုရင် အပ်ကုန် စနစ်ဆိုတာရှိတယ်။  earning တို့ဘာတို့ကို ‌ခေါင်းစားခံမနေနဲ့  အပ်ကုန်စနစ်နဲ့သာ ရမယ်ဆိုရင် ယူ ရောင်းခိုင်းလိုက်။ တစ်ခုခုဆို သူတို့ကအလွယ်နည်းနဲ့ရှင်းကြတယ်။ အလွယ်နည်းနဲ့ရှင်းမယ်ဆိုရင် ကျွန်‌တော်ပြောသလို အပ်ကုန်စနစ်နဲ့ သွင်းလာပြီးရင် ပြန်ပေးပေါ့။ အဲဒီလိုလုပ်လိုက်ရင် လတ်တလော ဒီမှာလည်း ပစ္စည်းတွေ ပြည့်သွားမယ်၊ သူလည်းဒေါ်လာ မပေးရတော့ဘူး။ နိုင်ငံခြားကနေ ဟွန်ဒီနဲ့လွှဲပြီး ယူလာကြမှာ။ ပြီးရင် နိုင်ငံခြားမှာရှိတဲ့ သူဌေးတွေရဲ့ ဒေါ်လာတွေကလည်း အသက်ဝင်ပြီး ပြန်ဝင်လာလိမ့်မယ်’’ ဟု ၎င်းကပြောသည်။ အပ်ကုန်စနစ်ကို ပြည်ပနိုင်ငံများတွင် လည်း ကျင့်သုံးလျက်ရှိပြီး အဆို ပါ စနစ်ကြောင့် ပြည်ပမှကုန်ပစ္စည်း တင်သွင်းရန် ဒေါ်လာကို ချက်ချင်းပေးရန်မလိုဘဲ  နိုင်ငံခြား ငွေရှားပါးမှု ပြဿနာကိုလည်း အထိုက်အလျောက် ဖြေရှင်း ပေးနိုင်မည်ဖြစ်ကြောင်း သိရသည်။

‘‘အပ်ကုန်စနစ်ဆိုတာက ရောင်းပြီးမှ ပြန်ပေးရတဲ့စနစ်ပေါ့။ အဲဒီတော့ လတ်တလောမှာ အပ်ကုန်စနစ်နဲ့ လက်ခံရင် ဘာဖြစ်မလဲဆိုတော့ ဒေါ်လာကို ချက်ချင်းချပေးစရာမလိုဘူး။ ဝင်လာလိမ့်မယ်။ ပြီးရင် သူတို့ဟာသူတို့ ရောင်းလိမ့်မယ်။ ရောင်းပြီးတဲ့အချိန်ကျမှပြန်ပေးဆိုပြီး ပစ္စည်းတွေအများ ကြီးဝင်လာမယ်။ အပ်ကုန်စနစ် ဆိုတာကလည်း နိုင်ငံခြားကုမ္ပဏီတွေကလည်း လုပ်ချင်ကြတယ်” ဟု အထက်ပါ စီးပွားရေးလုပ်ငန်းရှင်က ဆိုသည်။

ထို့ပြင် အဆိုပါစနစ်ကို ခွင့်ပြုပေးလိုက် ခြင်းအားဖြင့် နိုင်ငံခြားငွေရှားပါးမှုကြောင့် ပြည်တွင်း၌ ကုန်ပစ္စည်း တင်သွင်းရန် အခက်အခဲဖြစ်ပေါ်နေသည့် လုပ်ငန်းရှင်များ၏ အကျပ်အတည်းများကို အခိုက်အတန့်အားဖြင့် ဖြေရှင်းပေးနိုင်ကြောင်း သိရသည်။ ယင်းပြင် ပြည်သူလူထုကြား၌ ကုန်စည်ရှားပါးမှုကြောင့် ကုန်ဈေးနှုန်းတက်ခြင်းပြဿနာကိုပါ   ဖြေရှင်းပြီးသားဖြစ်သွားနိုင်သည်။

စီးပွားရေးနှင့် ကူးသန်းရောင်းဝယ်ရေး ဝန် ကြီးဌာနအနေဖြင့် သွင်းကုန်တင်သွင်းမှုကို ယခင်အတိုင်း FESC မှ စိစစ်ပြီး လိုင်စင်ခွင့်ပြုချက်များအရ တစ်နှစ်လျှင် အမေရိကန်ဒေါ်လာ (၁၆) ဘီလျံအထိ ခွင့်ပြုပေးနေကြောင်း သိရ သည်။

ယခု (၂၀၂၄- ၂၀၂၅) ဘဏ္ဍာနှစ်တွင် မြန်မာနိုင်ငံအနေဖြင့် ပြည်ပသို့ ပို့ကုန်တင်ပို့မှုမှ အမေရိကန် ဒေါ်လာ(၁၆) ဘီလျံကျော်ရရှိရန် မျှော်မှန်းထားပြီး သွင်းကုန်တင်သွင်းမှုအနေဖြင့် အမေရိကန်ဒေါ်လာ (၁၆) ဘီလျံဝန်းကျင် ပြန်လည် သုံးစွဲသွားရန် လျာထားကြောင်း နစက၏ သတင်းအချက် အလက်များအရ သိရသည်။