စော (NSS) - စက်တင်ဘာ ၂၆

အင်းလေးဒေသရေကြီးမှုသည် ဆယ်ရက်ကျော်ကြာမြင့်လာသော်လည်း (၃)ပေခန့်သာ ကျဆင်းလာကြောင်း ဒေသခံတစ်ဦးက NSS ကိုပြောသည်။

ရာဂီမုန်တိုင်းအရှိန်ကြောင့် ပြီးခဲ့သည် စက်တင်ဘာ ၉ ရက်မှစတင်ကာ နေပြည်တော်အပါအဝင် တိုင်းနှင့်ပြည်နယ်အချို့တွင် ရေကြီးရေလျှံမှုများ ဖြစ်ပေါ်ခဲ့သည်။ အင်းလေးဒေသတွင်မူ မိုးအဆက်မပြတ်ရွာသွန်းပြီး တောင်ကျရေများကျဆင်းလာမှုကြောင့် စက်တင်ဘာလ (၁၁)ရက်မှ (၁၈)ရက်အထိကာလအတွင်း လူခြောက်ဦးသေဆုံး၍ နှစ်ဦးမှာ ရေစီးဖြင့်မျောပါ ပျောက်ဆုံးနေကြောင်း သိရသည်။ သို့သော် လက်ရှိအချိန်အထိ လူနေအိမ်များ ရေနစ်မြုပ်လျက်ရှိကြောင်းသိရသည်။

“တော်တော်ကြာတယ်။ မြုပ်တဲ့နေ့ကနေစရင် အခုချိန်ထိကို (၃)ပေမပြည့်ဘူး။ မြုပ်တာက ၁၃ ရက်၊ ၁၄ ရက်လေ အဲဒါဆိုတော့  ဆယ်ရက်ကျော်ပြီ အဲဒါကို အခုချိန်ထိ ကျတာ (၃)ပေမပြည့်ဘူး။ တစ်ရက်ကို တစ်လက်မလောက်ပဲကျတယ်။ အခုရက်တွေမှာ မိုးပြန်ရွာလာလို့ ရေမကျဘူး”ဟု ဒေသခံတစ်ဦးက ပြောသည်။

လက်ရှိအချိန်အထိ ရေများမြင့်တက်နေမှုကြောင့်  အင်းလေးဒေသတွင် သောက်သုံးရန်ရေနှင့် မီးသွေးကို အဓိက လိုအပ်လျက်ရှိနေကြောင်းသိရသည်။ ထို့ပြင် စက်လှေအခက်အခဲကြောင့် အလှူရှင်များသွားရောက်လှူဒါန်းရန် အခက်အခဲများလည်း ရှိနေကြောင်း သိရသည်။

“ပြန်လည်ထူထောင်ရေးကျရင်‌တော့ ဝိုင်းပြီးလှူဖို့တော့ လိုတယ်။ အဲဒါလေးတော့ အကြံပြုချင်တယ်။ ဘာဖြစ်လို့လဲဆိုတော့ ပျက်စီးသွားတဲ့အိမ်တွေ အများကြီးဖြစ်သွားတာကို။ ရေကကျသွားပြီ တစ်တောင်လောက်တော့ ကျသွားပြီ”ဟု အင်းလေးဒေသသို့ သွားရောက်ကူညီခဲ့သူ ကိုကြည်သာက ပြော သည်။

အင်းလေးဒေသတွင် ရေကြီးမှုကြောင့် အိမ်ခြေ (၂၀,ဝဝဝ)ကျော် ရေဝင်ရောက်မှုများရှိခဲ့ပြီး ဒေသတွင်း ပရဟိတအဖွဲ့များ၊ နယ်ခံပရဟိတအဖွဲ့များနှင့် ဌာနဆိုင်ရာ ပရဟိတအဖွဲ့များစုပေါင်းပြီး ကူညီကယ်ဆယ်ရေးလုပ်ငန်းများ လုပ်ဆောင်နေကြောင်း သိရသည်။ ယခုအခါ ကယ်ဆယ်ရေစခန်း (၇)ခုဖွင့်လှစ်ထားပြီး ကယ်ဆယ်ရေးစခန်းများတွင် လူဦးရေ (၅၆၄၃)ဦးကို ကူညီကယ်ဆယ်ထားကာ လတ်တလောအနေဖြင့် ဆေးဝါးနှင့်ရိက္ခာများလိုအပ်နေကြောင်း သိရသည်။