Pika (NSS) - ဇန်နဝါရီ ၇

မြောက်ကိုရီးယားစစ်တပ်သည် ဇန်နဝါရီလ(၆)ရက်တွင် Yeonpyeong ကျွန်းအနီးသို့ အမြောက်ကျည် (၆ဝ) ကျော် ပစ်လွှတ်ခဲ့ကြောင်း တောင်ကိုရီးယားစစ်တပ်က ပြောကြားခဲ့သည်။

မြောက်ကိုရီးယားစစ်တပ်သည် အဆိုပါဧရိယာအနီးသို့ အမြောက်ကျည်ပေါင်း(၂ဝဝ)ကျော်ကို ပစ်လွှတ်ခဲ့ပြီးနောက် တစ်ရက်အကြာတွင် ယခုကဲ့သို့ပစ်လွှတ်မှုများ ထပ်မံလုပ်ဆောင်ခဲ့ခြင်းဖြစ်သည်။ ထို့အပြင် တောင်ကိုရီးယားဖက် က သတိပေးမှုများရှိနေသည့်ကြားမှ မြောက်ကိုရီးယားက အမြောက်ကျည်များ ထပ်မံပစ်လွှတ်ခဲ့ခြင်းဖြစ်သည်။ 

"ဒီဇင်ဘာလ(၆)ရက်နေ့ ညနေ(၄)နာရီနဲ့ (၅)နာရီခန့်လောက်မှာ မြောက်ကိုရီးယားစစ်တပ်ဟာ Yeonpyeong ကျွန်းအနောက်မြောက်ဘက်ဧရိယာထဲကို အမြောက်ကျည်(၆ဝ) ကျော် ပစ်လွှတ်ခဲ့ပါတယ်" ဟု တောင်ကိုရီးယား ပူးတွဲစစ်ဦးစီးချုပ်များရုံးက  ပြောခဲ့သည်။

မြောက်ကိုရီးယားအစိုးရသည် ဇန်နဝါရီလ(၅)ရက်တွင် တောင်ကိုရီးယားကျွန်းများဖြစ်သော Yeonpyeong နှင့် Baengnyeong ကျွန်းများအနီးသို့ အမြောက်ကျည်ပေါင်း(၂ဝဝ)ကျော် ပစ်လွှတ်ခဲ့ကြောင်း သိရသည်။ 

မြောက်ကိုရီးယားဖက်က ပစ်လွှတ်မှုများလုပ်ဆောင်ပြီးနောက် အဆိုပါကျွန်းနှစ်ကျွန်းလုံးရှိ ဒေသခံများကို ဘေးလွတ်ကင်းရာသို့ရွှေ့ပြောင်းကြရန် တောင်ကိုရီးယားအစိုးရက အမိန့်ထုတ်ခဲ့ကြောင်းလည်း သိရသည်။

ဇန်နဝါရီလ(၅)ရက် နှင့် (၆)ရက်တွင် မြောက်ကိုရီးယားဖက်က ပစ်လွှတ်လိုက်သော အမြောက်ကျည်များသည် နှစ်နိုင်ငံကြား ၂ဝ၁၈ ခုနှစ်က လက်မှတ်ရေးထိုးခဲ့သော တင်းမာမှုလျှော့ရေး သဘောတူညီချက်အရ ဖန်တီးထား သည့်နယ်စပ်တစ်လျှောက်ရှိ ကြားခံဇုန်အတွင်းသို့ ကျရောက်သွားခဲ့ကြောင်း သိရသည်။ အဆိုပါကြားခံဇုန်အတွင်း အမြောက်ကျည်ပစ်လွှတ်မှုများ ပြန်လည်စတင်ခြင်းသည် ကိုရီးယားကျွန်းဆွယ်၏ ငြိမ်းချမ်းရေးကို ခြိမ်းခြောက် နေခြင်းဖြစ်ပြီး တင်းမာမှုများကို ပိုမိုတိုးမြင့်လာစေသည့် ရန်စသည့်လုပ်ရပ်တစ်ခုဖြစ်ကြောင်း တောင်ကိုရီးယား စစ်တပ်က ဇန်နဝါရီလ(၆)ရက်တွင် ထုတ်ဖော်ပြောခဲ့သည်။

တောင်ကိုရီးယားအစိုးရသည် ပြင်းထန်သည့် သတိပေးချက်တစ်ခုကို ထုတ်ပြန်ခဲ့ပြီး ရန်စသည့်လုပ်ရပ်များကို ချက်ချင်းရပ်တန့်ရန် မြောက်ကိုရီးယားကို တိုက်တွန်းခဲ့ကြောင်းလည်း သိရသည်။ ထုတ်ပြန်ချက်ထဲတွင် "မြောက်ကိုရီးယားဟာ ဒီလိုလုပ်ရပ်တွေကို မရပ်တန့်ဘူးဆိုရင် ကျွန်တော်တို့နိုင်ငံကို ကာကွယ်ဖို့အတွက် သင့်လျော်တဲ့အစီအစဉ်တွေကို ပြန်လည်လုပ်ဆောင်သွားမှာပါ" ဟု ရေးသားထားသည်။