ဂျန်ဇက် (NSS) - ဒီဇင်ဘာ ၃၁ 

တောင်တရုတ်ပင်လယ်အရေး တင်းမာမှုအရှိန်မြင့်တက်နေတာတွေနဲ့ပတ်သက်ပြီး စိုးရိမ်မှုဖြစ်ရကြောင်း အာဆီယံနိုင်ငံခြားရေးဝန်ကြီးများက  သတင်းထုတ်ပြန်လိုက်ပါတယ်။

တောင်တရုတ်ပင်လယ်အတွင်း ပိုင်နက်နယ်မြေအငြင်းပွားမှုတွေကြောင့် တင်းမာမှုမြင့်တက်လာရခြင်းဟာ ဒေသအတွင်း ငြိမ်ချမ်းရေးကို ခြိမ်းခြောက်နေပြီး အငြင်းပွားနေတဲ့ နိုင်ငံတွေကြား ငြိမ်းချမ်းစွာဆွေးနွေးစေလို ကြောင်း တိုက်တွန်းထားပါတယ်။ တရုတ်နိုင်ငံဟာ တောင်တရုတ်ပင်လယ်အတွင်းမှာ ပိုင်နက်နယ်မြေ ၈ဝ ရာခိုင်နှုန်း ပိုင်ဆိုင်တယ်လို့ ပြောဆိုထားရာ အာဆီယံအဖွဲ့ဝင်နိုင်ငံအချို့နဲ့ အငြင်းပွားမှုတွေ ရှိနေခဲ့ပါတယ်။ 

အထူးသဖြင့် တရုတ်နိုင်ငံ နဲ့ ဖိလစ်ပိုင်နိုင်ငံကြား ပိုင်နက်နယ်မြေအငြင်းပွားမှုတွေ ပိုမိုအရှိန်မြင့်တက်လာခဲ့ပြီး တရုတ်စစ်သင်္ဘောတွေက ဖိလစ်ပိုင်စစ်သင်္ဘောတွေကို အငြင်းပွားပိုင်နက်နယ်မြေမှာ ဝင်တိုက်တာတွေရှိခဲ့ကြောင်း သိရပါတယ်။

တရုတ်နဲ့ ဖိလစ်ပိုင်တို့ဟာ တောင်တရုတ်ပင်လယ်အတွင်း ပိုင်နက်နယ်မြေအငြင်းပွားမှုတွေအတွက် အပြန်အလှန် ဝေဖန်ပြစ်တင်တာတွေလုပ်ဆောင်ခဲ့ရာ နှစ်ဖက်တင်းမာမှုတွေ ပိုမိုဖြစ်လာနေကြောင်း သိရပါတယ်။ 

အာဆီယံနိုင်ငံခြားရေးဝန်ကြီးများက အငြင်းပွားမှုတွေကိုလျော့ချဖို့၊ ခက်ခဲရှုပ်ထွေးမှုတွေကို အပြုသဘောဆောင် တဲ့ပုံစံမျိုးနဲ့ဖြေရှင်းဖို့၊ အစွမ်းကုန်သည်းခံကြဖို့ တောင်းဆိုထားပါတယ်။ အာဆီယံ နဲ့ တရုတ်နိုင်ငံကြား တောင်တရုတ်ပင်လယ်ဒေသမှာ code of conduct ဖန်တီးဖို့ ကြိုးပမ်းနေချိန်မှာပဲ ပိုင်နက်နယ်မြေအငြင်းပွားမှုတွေ ပိုမိုဖြစ်လာခဲ့ရကြောင်း သိရပါတယ်။

တရုတ်အစိုးရက တောင်တရုတ်ပင်လယ်အတွင်းရှိအငြင်းပွားမှုတွေနဲ့ပတ်သက်ပြီး ဖိလစ်ပိုင်နိုင်ငံရဲ့လုပ်ရပ်တွေက ရန်စသလိုမျိုးဖြစ်နေကြောင်း ပြောဆိုထားပါတယ်။ ဖိလစ်ပိုင်အစိုးရက တောင်တရုတ်ပင်လယ်အရေးနဲ့ ပတ်သက်ပြီး တရုတ်အစိုးရနဲ့ဆက်ဆံရေးက အဆိုးဘက်ကိုဦးတည်နေကြောင်း မကြာသေးမီက ပြောခဲ့ဖူးပါတယ်။