မြူနစ် (NSS) - ဒီဇင်ဘာ ၃၁

ကိုးကန့်ကိုယ်ပိုင်အုပ်ချုပ်ခွင့်ရဒေသ၊ လောက်ကိုင်မြို့ရှိ ဒေသကွပ်ကဲမှုစစ်ဌာနချုပ်(ဒကစ)ကို MNDAA ပူးပေါင်းအဖွဲ့ တိုက်ခိုက်လာသည့်အတွက် တိုက်ပွဲပြင်းထန်နေကြောင်း သိရသည်။

ကိုးကန့်လက်နက်ကိုင် MNDAA ပူးပေါင်းအဖွဲ့သည် ယနေ့(ဒီဇင်ဘာ ၃၁ ရက်) နံနက်အစောပိုင်းမှစတင်ကာ ဒကစ(လောက်ကိုင်) ကို တိုက်ခိုက်နေခြင်းဖြစ်ကြောင်း ဒေသခံများထံမှ သိရသည်။

“လောက်ကိုင်မှာရှိတဲ့ ဒကစကို ကိုးကန့်လက်နက်ကိုင်တွေက မနက်ကတည်းက တိုက်နေတာ။ တော်တော်လေး ပြင်းထန်တယ်။ အခုလည်း တိုက်နေကြတုန်းပဲ။ တပ်ဘက်ကလည်း စစ်ကူတွေ လာပို့ပြီးတော့ အင်အားဖြည့်နေတာတွေ့ရတယ်။ ပြီးတော့ လေကြောင်းပစ်ကူတွေနဲ့ ချေမှုန်းတိုက်ခိုက်နေတာလည်း ရှိတယ်” ဟု လောက်ကိုင်မြို့ခံတစ်ဦးက လူမှုကွန်ရက်စာမျက်နှာမှတစ်ဆင့် အသိပေးပြောကြားထားသည်။

ဒကစ(လောက်ကိုင်) အား MNDAA ပူးပေါင်းအဖွဲ့များ တိုက်ခိုက်လာသည့်အတွက် တပ်မတော်ဘက်ကလည်း လေကြောင်း ပစ်ကူ၊ အမြောက်ပစ်ကူများဖြင့် ပြန်လည်ချေမှုန်းတိုက်ခိုက်နေလျက်ရှိကြောင်း သိရသည်။

“လောက်ကိုင်မြို့ထဲမှာတော့ MNDAA အဖွဲ့တွေပဲ ကြီးစိုးနေကြတာ။ တပ်က သူ့စခန်းထဲမှာပဲ နေနေတာ။ အပြင်ထွက်ပြီး တိုက်ခိုက်တာမျိုးတော့ မတွေ့ရဘူး။ မနေ့က ညကလည်း ပလောင်ရွာမှာရှိတဲ့ တပ်စခန်းကို လက်နက်ကိုင်တွေ သိမ်းလိုက်တယ်လို့ ကြားတယ်။ အခုတော့ ဒကစအလှည့် ရောက်ပြီဆိုပြီးတော့ ပြောနေကြတာ ရှိတယ်။ မြို့ထဲမှာရှိတဲ့ အန်တီ တို့ အိမ်တွေလည်း တော်တော်လေးကို ပျက်စီနေပြီ” ဟု လောက်ကိုင်မြို့ခံတစ်ဦးက ပြောသည်။

MNDAA ဦးဆောင်သော မြောက်ပိုင်းမဟာမိတ်လက်နက်ကိုင်(၃)ဖွဲ့သည် ပြီးခဲ့သော အောက်တိုဘာ ၂၇ ရက်မှ စတင်ကာ (၁၀၂၇ စစ်ဆင်ရေး)အမည်ဖြင့် ရှမ်းပြည်နယ်အရှေ့မြောက်ပိုင်းဒေသအတွင်းရှိ လုံခြုံရေးစခန်းများကို အင်အားအလုံးအ ရင်းဖြင့် ဝင်ရောက်တိုက်ခိုက်ခဲ့သည်။

အဆိုပါစစ်ဆင်ရေးကာလအတွင်း တပ်မတော်၏ လုံခြုံရေးစခန်းများ သိမ်းပိုက်ခံခဲ့ရသည့်ဖြစ်စဉ်များရှိခဲ့ဖူးပြီး လက်ရှိတွင် ၎င်းစစ်ဆင်ရေးသည် လောက်ကိုင်မြို့၌ ဆင်နွှဲနေလျက်ရှိသည်။

“အရင်ကဆိုရင် လောက်ကိုင်ကနေ ချင်းရွှေဟော်အထိ တပ်မတော်လုံခြုံရေးအဖွဲ့ရဲ့ ဂိတ်တွေက (၄)ဂိတ်လောက် ရှိတယ်။ အခုတစ်ခုမှ မရှိတော့ဘူး။ လောက်ကိုင်မြို့ထဲမှာဆိုရင် တိုက်ပွဲဖြစ်လို့ အိမ်တွေ၊ အဆောက်အဦးတွေ တော်တော်ပျက်စီးကုန်ပြီ။ အရင်ရက်ကဆိုရင် ရပ်ကွက်(၁)မှာရှိတဲ့ ဈေးလည်း မီးလောင်သွားတယ်။ တော်တော်လေးလည်း ပျက်စီးနေပြီ။ အန်တီတို့ အိမ်ဆိုရင် မှန်ကွဲသွားတာတွေ၊ ဘာတွေရှိတယ်” ဟု လောက်ကိုင်မြို့ခံက ဆက်လက်ပြောသည်။

လက်ရှိတွင် MNDAA လက်နက်ကိုင်အဖွဲ့များအနေဖြင့် လောက်ကိုင်မြို့အတွင်းသို့ ဝင်ရောက်လာကာ အရပ်သားနေအိမ်များအပေါ်၌ ဝင်ရောက်နေရာယူလျက်ရှိပြီး မြန်မာလူမျိုးအပါအဝင် ဒေသခံများကို လောက်ကိုင်မြို့အတွင်းမှ ထွက်ခွာသွား ရန် အတင်းအဓမ္မနှင်ထုတ်နေမှုများရှိကြောင်း သိရသည်။