မြူနစ် (NSS) - ဒီဇင်ဘာ ၁၉

ရခိုင်ပြည်နယ်၊ ရမ်းဗြဲမြို့နှင့်တစ်ဝိုက်တွင် တပ်မတော်နှင့် ရခိုင်လက်နက်အဖွဲ့ AA တို့အကြား တိုက်ပွဲဆက် လက်ဖြစ်ပွားနေပြီး မြို့ခံအများအပြားနေရပ်စွန့်ခွာခဲ့ရကြောင်း သိရသည်။

AA နှင့် တပ်မတော်လုံခြုံရေးအဖွဲ့တို့သည် ယမန်နေ့ (ဒီဇင်ဘာလ ၁၈ ရက်) နံနက် ၈ နာရီမှစ၍ ရမ်းဗြဲမြို့တွင် နှစ်ဖက်ကြား တိုက်ပွဲအပြင်းအထန်ဖြစ်ပွားခဲ့ကြောင်း မြို့ခံများက NSS ကို ပြောသည်။

“ရမ်းဗြဲမှာ တိုက်ပွဲက မနေ့က စတာပေါ့။ မနက် ၈ နာရီလောက်မှာစတာ။ မနက် ၁၀ နာရီလောက်ကနေ ညနေ ၃ နာရီအထိ တိုက်ပွဲက တော်တော်လေးပြင်းထန်တယ်။ ဒီလောက်ကြီး ပြင်းထန်တာမျိုး တစ်ခါမှ မကြုံဖူးသေးဘူး။ လက်နက်ကြီးသံတွေ၊ လက်နက်ငယ်သံတွေ၊ လေ ယာဉ်သံတွေ စုံနေအောင်ကြားရတယ်။ ဒရုန်းတွေနဲ့ လာပစ်တာတွေလည်း ရှိတယ်” ဟု ရမ်းဗြဲမြို့ခံကပြော သည်။

ယမန်နေ့တွင် ရမ်းဗြဲမြို့၌ ဖြစ်ပွားခဲ့သော တိုက်ပွဲအတွင်း အရပ်သားလူနေအိမ်များ ထိခိုက်ပျက်စီးမှုများ ရှိခဲ့ကြောင်း သိရသည်။

အလားတူ ယနေ့(ဒီဇင်ဘာလ ၁၉ ရက်)တွင်လည်း ရမ်းဗြဲမြို့နှင့်တစ်ဝိုက်၌ တပ်မတော်နှင့် AA လက်နက်ကိုင်အဖွဲ့တို့ကြားတိုက်ပွဲများ ဆက်လက်ဖြစ်ပွားနေလျက်ရှိကြောင်း မြို့ခံများကပြောသည်။

“ဒီနေ့လည်း ရမ်းဗြဲမှာ ဆက်ဖြစ်နေတုန်းပဲ။ တပ်ဖက်ကလည်း ရေကြောင်းပစ်ကူတွေနဲ့ ပစ်ပေးနေတယ်လို့ ကြားတယ်။ ပြင်းထန်နေတုန်းပါပဲ။ အခုတော့ မြို့ခံပြည်သူလူထုကတော့ မြို့ပေါ်မှာ မနေရဲကြတော့ဘူး။ ထိခိုက်မှာ ကြောက်လို့ စစ်ဘေးရှောင်နေရပြီ။ မရှောင်လို့လည်း မရတော့ဘူးလေ။ ကလေးငယ်တွေပါ ရှိနေတော့ စိုးရိမ်ရတယ်”ဟု ရမ်းဗြဲမြို့ခံက ဆက်လက်ပြောသည်။

ယင်းကဲ့သို့ ဖြစ်ပွားနေသည့် တိုက်ပွဲများကြောင့် ရမ်းဗြဲမြို့ခံပြည်သူလူထုအများစုသည် နေရပ်စွန့်ခွာ စစ်ဘေးရှောင်နေရလျက်ရှိကြောင်း သိရသည်။

“ကျွန်မတို့ကတော့ စစ်ပွဲဖြစ်မှာ မလိုလားဘူး။ ဒါပေမဲ့စစ်ပွဲဖြစ်တာကလည်း ကြာနေပြီဆိုတော့ လိုလားတဲ့သူလည်း ရှိသလို၊ မလိုလားတဲ့သူတွေလည်း ရှိမှာပေါ့။ ကြောက်တဲ့သူလည်းရှိတယ်။ အမျိုးမျိုးရှိနေမှာပဲလေ။ ကျွန်မတို့ ဆန္ဒအရဆိုရင်တော့ မဖြစ်စေချင်ဘူး” ဟု ရမ်းဗြဲမြို့ခံတစ်ဦးက NSS ကို ပြောသည်။

ဒေသခံပြည်သူလူထုအများစုနေထိုင်ရာမြို့များတွင် တိုက်ပွဲများ ဖြစ်လာမည်ကို မလိုလားသော ဒေသခံပြည်သူများလည်း ရှိနေသည်။

“ရခိုင်မှာ တိုက်ပွဲတွေဖြစ်ပြီး သိပ်မကြာဘူး လမ်းတွေ ပိတ်လိုက်တယ်။ ကုန်ဈေးနှုန်းတွေ ချက်ချင်းတက်လာတယ်။ အခုဆိုရင် ကြက်သွန်နီတစ်ပိသာ သုံးသောင်းဖြစ်နေပေမယ့် ရှာဝယ်လို့မရဘူး။ ဈေးရောင်းတဲ့သူတွေလည်း မရှိတော့ဘူး။ နောက်ဓာတ်ဆီ တစ်လီတာ နှစ်သောင်းခွဲအထိ ဖြစ်နေတယ်။ ဘယ်လိုသွားလာလှုပ်ရှာရမှာလဲ။ စစ်ဘေးရှောင်ဖို့အတွက်တောင် သွားဖို့မလွယ်ကူဘူး။ ပြည်သူတွေ ဘယ်လောက်ခက်ခဲလည်း စဉ်းစားသာကြည့်တော့” ဟု ရခိုင်ဒေသခံတစ်ဦးက ပြောသည်။

ရခိုင်ပြည်နယ်တွင် ရခိုင်လက်နက်ကိုင်အဖွဲ့ ULA/AA သည် ပြီးခဲ့သော နိုဝင်ဘာလ ၁၃ ရက်မှစတင်ကာ တစ်ကျော့ပြန်စစ်ပွဲများကို ပြန်လည်ဖော်ဆောင်ခဲ့ခြင်းဖြစ်ပြီး လက်ရှိတွင်လည်း နှစ်ဖက်ကြား၌ တိုက်ပွဲများ ဆက်လက်ဖြစ်ပွားနေဆဲဖြစ်သည်။