မြူနစ် (NSS) - နိုဝင်ဘာ ၁၅

KTLA စစ်ဦးစီးချုပ် စောနယ်ဒါးဘိုမြ သမ္မတအဖြစ် တာဝန်ယူသော ကော်သူးလေအစိုးရတစ်ရပ် ထူထောင်ထားသည့် စာရွက်စာတမ်းအချို့ ပျံ့နှံထွက်ပေါ်လျက်ရှိသည်။

ကရင်အမျိုးသားအစည်းအရုံး(KNU)၏ KNDO တွင် စစ်ဦးစီးချုပ်အဖြစ် တာဝန်ထမ်းဆောင်ခဲ့ဖူးသော စောနယ်ဒါးဘိုမြသည် KNU မှခွဲထွက်ကာ ကော်သူးလေတပ်မတော်(KTLA)ကို ၂၀၂၂ ခုနှစ် ဇူလိုင်လ ၁၆ ရက်တွင် ဖွဲ့စည်းတည်ထောင်ခဲ့သည်။

လက်ရှိတွင် ကော်သူးလေအစိုးရအား ဖွဲ့စည်းတည်ထောင်ထားကြောင်း စောနယ်ဒါးဘိုမြ၏ လက်မှတ်ပါဝင်သည့် စာရွက်စာတမ်းအချို့သည် ပျံ့နှံ့လျက်ရှိသည်။

အဆိုပါစာရွက်စာတမ်းအချို့၌ အုပ်ချုပ်ရေး၊ တရားရေး၊ ကာကွယ်ရေးစသည့် အများပြည်သူတို့၏ အကျိုးစီးပွားများအတွက် နိုင်ငံရေးအရ ဦးဆောင်လမ်းညွှန်မှုပေးရန် လွတ်မြောက်နယ်မြေ၌ အခြေစိုက်သည့် အစိုးရတစ်ရပ် ထူထောင်ရန်ဆုံးဖြတ်ခဲ့သည်ဟု ဖော်ပြထားသည်။

ကော်သူးလေအစိုးရသည် ကော်သူးလေပြည်နယ် ကရင်နယ်မြေများတွင်းရှိ နိုင်ငံသားများနှင့် ပြည်သူများ၏အကျိုးကို ထမ်းဆောင်ရန် တရားဝင်ဖွဲ့စည်းထားသော အဖွဲ့ဖြစ်သည်ဟု ရေးသားထားသည်။

ပြည်နယ်ဥသျှောင်သမ္မတအဖြစ် စောနယ်ဒါးဘိုမြက တာဝန်ယူမည်ဖြစ်ပြီး ဒုသမ္မတအဖြစ် စောဘဝါးနှင့် စောဆာဂေးဖိုးတို့က တာဝန်ယူမည်ဖြစ်ကြောင်း ရေးသားဖော်ပြထားသည်ကို တွေ့ရသည်။

ထို့ပြင် ကော်သူးလေအစိုးရ၌ ပြည်ထဲရေးဝန်ကြီး၊ နိုင်ငံခြားရေးဝန်ကြီး၊ ကာကွယ်ရေးဝန်ကြီး စသော ဝန်ကြီးများကိုလည်း ထည့်သွင်းဖွဲ့စည်းထားကြောင်း ဖော်ပြထားသည်ကို တွေ့ရသည်။

အဆိုပါစာရွက်စာတမ်းပါ အချက်အလက်များကို အမျှော်အမြင်ရှိသည့် ကရင်လူထုအနေဖြင့် စိတ်ဝင်စားမှုမရှိကြောင်း နှင့် အဓိပ္ပာယ်မယ့်သည့်လုပ်ရပ်အဖြစ်မြင်ကြောင်း KNU ကော့ကရိတ်ခရိုင်ဥက္ကဋ္ဌ ပဒိုရွှေမောင်းက NSS ကို သုံးသပ်ပြောကြားသည်။

“ကျွန်တော်လည်းပဲ ကရင်တွေထဲမှာ အဲဒီလိုအရူးထတဲ့ ကရင်အဖွဲ့တွေ များနေတော့ စိတ်တောင်မဝင်စားတော့ဘူး။ ကရင်တွေလည်း သိပါတယ်။ ဒီစာတွေက။ ကရင်လူထုထဲ အမျှော်အမြင်၊ အတွေးအခေါ်ရှိတဲ့ ကရင်တွေက ဒီစာတွေကို စိတ်မဝင်စားဘူး။ ဒါပေမယ့် စာနဲ့ပေနဲ့ ဖြစ်တဲ့အပေါ်မှာတော့ တစ်ချို့ကတော့ ဝေဖန်သုံးသပ်မှုတွေ ရှိလာတာပေါ့။ ဒါပေမယ့် ဒီစာတွေကတော့ ဘာမှမဟုတ်ပါဘူး။ အဓိပ္ပါယ်မဲ့ အလုပ်တွေပါ။ ကျွန်တော်ကတော့ အဲဒီလိုပဲ မြင်တယ်”ဟု ပဒိုရွှေမောင်းက ပြောသည်။

စောနယ်ဒါးဘိုမြ ဦးဆောင်သော ကော်သူးလေတပ်မတော်(KTLA)အဖွဲ့ကို KNU တပ်မဟာ (၇)နယ်မြေအတွင်း လုံးဝချေ ချခွင့်ပြုမည်မဟုတ်ကြောင်း KNU ဘက်က သတိပေးထားဖူးသည်။

အလားတူ စောနယ်ဒါးဘိုမြ အစိုးရအဖွဲ့ထူထောင်မှုနှင့်ပတ်သက်၍ “ကရင်တွေရဲ့ အသိအမှတ်ပြုမှုကို ရမှာမဟုတ်ဘူး။ ဘယ်သူမှလည်း အသိအမှတ်မပြုဘူး။ တပ်မဟာ(၄)ကနေ KTLA ပါသွားတဲ့သူတွေ ပြန်လာနေကြတယ်။ KNU ဆီမှာပြန်လာနေတာ အတော်များနေပြီ။ သူ့မှာက အင်အားလည်းမများပါဘူး။ သူ့ရဲ့အစိုးရဆိုတဲ့အဖွဲ့မှာ ပါနေတဲ့သူတွေက အများအားဖြင့် နိုင်ငံခြားက လူတွေပဲ။ ပြည်တွင်းက မဟုတ်ဘူး” ဟု ကရင်တိုင်းရင်းသားခေါင်းဆောင်ပိုင်းအချို့နှင့် ဆက်နွယ်သူတစ်ဦးက NSS ကို ပြောသည်။

စောနယ်ဒါးဘိုမြသည် KNU လက်အောက်ခံဖြစ်သော KNDO ၏ စစ်ဦးစီးချုပ်ဟောင်း တစ်ဦးဖြစ်ခဲ့ဖူးသူ ဖြစ်ပြီး ဝေါ်လေ၌ အစုလိုက်အပြုံလိုက် လူသတ်မှုနှင့်ပတ်သက်၍ ၎င်းအား KNDO စစ်ဦးစီးချုပ်ရာထူးနှင့်တာဝန်မှ ရပ်ဆိုင်းခဲ့ခြင်းဖြစ်သည်။