မြူနစ် (NSS) - နိုဝင်ဘာ ၈

ရှမ်းပြည်နယ်၊ မူဆယ်မြို့နယ်၌ တအာင်းလက်နက်ကိုင်အဖွဲ့ TNLA နှင့် ရှမ်းလက်နက်ကိုင်အဖွဲ့ SSPP တို့အကြား အပြန်အလှန်ပစ်ခတ်မှုဖြစ်ပွားခဲ့ကြောင်း သတင်းရရှိသည်။

ယမန်နေ့(နိုဝင်ဘာလ ၇ ရက်)၊ နံနက်ပိုင်းတွင် မူဆယ်မြို့နယ်၊ စယ်လန့်ကျေးရွာ၌ အထက်ပါကဲ့သို့ ဖြစ်ပွားခဲ့ကြောင်း ရှမ်းပြည်တိုးတက်ရေးပါတီ SSPP/SSA ဘက်က ယနေ့ (နိုဝင်ဘာလ ၈ ရက်)တွင် သတင်းထုတ်ပြန်ထားသည်။

စယ်လန့်ကျေးရွာတွင် နေထိုင်သော ဒေသခံပြည်သူ စိုင်းမောဝ်အွန်ကို TNLA အဖွဲ့မှ ဖမ်းဆီးသွားခြင်းကိစ္စနှင့်ပတ်သက်၍ SSPP မူဆယ်မြို့နယ်မှူးဦးဆောင်သော တပ်ဖွဲ့က TNLA ထံသို့ အကျိုးအကြောင်းသိရှိရန်အတွက် သွားရောက်မေးမြန်းမှုများပြုလုပ်ခဲ့သည်ဟု ထုတ်ပြန်ထားသည်။

စိုင်းမောဝ်အွန် ဖမ်းဆီးခံရသည့်ကိစ္စနှင့်ပတ်သက်၍ SSPP မူဆယ်မြို့နယ်မှူး ဦးဆောင်သော (၇)ဦးသည် TNLA ထံ သွားရောက်မေးမြန်းစဉ်အချိန်တွင် ၎င်းဘက်က အင်အား(၁၀၀)ဝန်းကျင်ခန့်ဖြင့် ဝိုင်းဝန်းပိတ်ဆို့ကာ စတင်ပစ်ခတ်မှုပြုလုပ်ခဲ့သည်ဟု SSPP/SSA ဘက်က ပြောသည်။

အဆိုပါအခြေအနေများကြောင့် စယ်လန့်ကျေးရွာအတွင်း၌ နှစ်ဖက်အကြား ရုန်းရင်းဆန်ခတ်တိုက်ပွဲဖြစ်ပွားခဲ့ပြီး SSPP ၏ မူဆယ်မြို့နယ်မှူးနှင့် အဖွဲ့ဝင်(၂)ဦးသည်လည်း စစ်သုံ့ပန်းအဖြစ် TNLA ၏ ဖမ်းဆီးခြင်းကို ခံခဲ့ရကြောင်း သိရသည်။

ထိုသို့ စစ်သုံ့ပန်းအဖြစ် ဖမ်းဆီးခံရမှုနှင့်ပတ်သက်၍ SSPP/SSA ဒုစစ်ဦးချုပ်စဝ်ငေါဝ်းဖအနေဖြင့် TNLA စစ်ဦးချုပ် တားဟိုပရန်ထံ ညှိနှိုင်းဆွေးနွေးခဲ့သော်လည်း စစ်သုံ့ပန်းများကို အရှင်လတ်လတ်သတ်ဖြတ်ပစ်ခဲ့သည်ဟု SSPP ဘက်က ထုတ်ပြန်ထားသည်။

“နှစ်ဖက် တိုက်ပွဲအတွင်း TNLA ဘက်က ၅ ဦးထက်မနည်း ကျဆုံးကာ ရှမ်းပြည်တိုးတက်ရေးပါတီရှမ်းပြည်တပ်မတော် SSPP/SSA ဘက်က တစ်ဦးကျဆုံးပြီး  မြို့နယ်မှူးအဆင့်ရှိသူတစ်ဦး နှင့် တပ်သားတစ်ဦးကို TNLA ဘက်က အရှင်ဖမ်းဆီးပစ်သတ်ကာ အခြားသော ရဲဘော်များလည်း ပျောက်ဆုံးနေတာ ဖြစ်ပါတယ်” ဟု SSPP အဖွဲ့က ပြောသည်။

TNLA အဖွဲ့၏ ဖမ်းဆီးခြင်းခံခဲ့ရသော စိုင်းမောဝ်အွန်သည် ရှမ်းတိုင်းရင်းသားများဒီမိုကရေစီအဖွဲ့ချုပ်ပါတီ စယ်လန့်ကျေးရွာအုပ်စု အလုပ်အမှုဆောင်ကော်မတီ အတွင်းရေးမှူးတစ်ဦးဖြစ်ကြောင်း သိရသည်။

လက်ရှိတွင် စိုင်းမောဝ်အွန်အား အမြန်ဆုံးပြန်လည်လွှတ်ပေးရန်အတွက် ရှမ်းတိုင်းရင်းသားများဒီမိုကရေစီအဖွဲ့ချုပ်၊ လူငယ်ရေးရာကော်မတီက တောင်းဆိုထားသည်။

အဆိုပါဖြစ်စဉ်များနှင့်ပတ်သက်၍ တအာင်းလက်နက်ကိုင်အဖွဲ့ TNLA ဘက်က တစ်စုံတစ်ရာထုတ်ပြန် ပြောဆိုခြင်းမျိုး မတွေ့ရသေးပေ။