ဂျန်ဇက် (NSS) - အောက်တိုဘာ ၂၆

အစ္စရေးသည် အာရပ်နိုင်ငံများက သတိပေးမှုများရှိနေသော်လည်း ဂါဇာဒေသအပေါ် မြေပြင်ထိုးစစ်ဆင်နွှဲမှုများကို အောက်တိုဘာလ ၂၅ ရက်က စတင်လုပ် ဆောင်ခဲ့ကြောင်းသိရသည်။

အစ္စရေးတပ်ဖွဲ့များ ပြန်မရုတ်သိမ်းခင် ဂါဇာဒေသရှိ ဟားမက်စ်အဖွဲ့၏ ပစ်မှတ်များကို အဓိကထားတိုက်ခိုက်သွားမည်ဖြစ်ကြောင်းသိရသည်။ ထွက်ပေါ်လာသော ရုပ်သံဖိုင်များအရ အစ္စရေး မြေပြင်တပ်ဖွဲ့များသည် သံချပ်ကာ ယာဉ်များနှင့်အတူ ဂါဇာနယ်စပ်ဒေသကို ထိုးဖောက်ဝင်ရောက်သွားခဲ့ကြောင်းသိရသည်။ အစ္စရေးစစ်ဘက်က ဟားမက်စ်အဖွဲ့အပေါ်ပြုလုပ်မည့် စစ်ဆင်ရေးဒုတိယအဆင့်အဖြစ် ကြိုတင်ပြင်ဆင်မှုများနှင့် စစ်ဆင်ရေးကို စတင်လုပ်ဆောင်ခဲ့ကြောင်းသတင်းထုတ်ပြန်ထားသည်။ 

အစ္စရေးစစ်ဘက်က "စစ်သားတွေဟာ ဂါဇာဒေသကို မြေပြင်ထိုးစစ်ဆင်နွှဲရမှာကို စိတ်လှုပ်ရှားနေတယ်" ဟု ပြောသည်။

ဟားမက်စ်အဖွဲ့သည်အောက်တိုဘာလ ၇ ရက်က အစ္စရေးနိုင်ငံကို စတင်တိုက်ခိုက်ခဲ့ပြီးနောက် အစ္စရေး နှင့် ပါလက်စတိုင်းလက်နက်ကိုင်အဖွဲ့ ဖြစ်သော ဟားမက်စ်ကြား စစ်ပွဲစတင်ခဲ့ပြီး ဂါဇာဒေသကို အစ္စရေးက လေကြောင်းမှဗုံးကြဲတိုက်ခိုက်မှုများ သီတင်းပတ်နှစ်ပတ်ကျော်ကြာပြုလုပ်ခဲ့ကြောင်းသိရသည်။ အစ္စ ရေးသည် ဂါဇာဒေသကို လေကြောင်းမှ ဗုံးကြဲတိုက်ခိုက်ခဲ့ပြီးနောက် မြေပြင်ထိုးစစ်ဆင်နွှဲရန် စီစဉ်လာခြင်းဖြစ်ကြောင်းသိရသည်။ ဂါဇာဒေသကို အစ္စရေး၏ မြေပြင်ထိုးစစ်ဆင်နွှဲမည့်အစီအစဉ်ကို ဒေသအတွင်းနိုင်ငံများက တားမြစ်မှုများလုပ်ဆောင်ခဲ့ကြောင်းသိရသည်။