Pika (NSS) - အောက်တိုဘာ ၂၅

ဘော်လ်တစ်ပင်လယ်ပြင်ကို ကျော်ဖြတ်ကာ ရုရှားလေပိုင်နက်အနီးသို့ ချဉ်းကပ်လာသော အမေရိကန်၏ B-1B  မဟာဗျူဟာမြောက်ဗုံးကြဲလေယာဉ်နှစ်စင်းကို ရုရှား၏ Su-27 တိုက်လေယာဉ်က ကြားဖြတ်ဟန့်တားခဲ့ကြောင်း ရုရှားကာကွယ်ရေးဝန်ကြီးဌာနကအောက်တိုဘာလ(၂၄) ရက်တွင် ထုတ်ပြန်ပြောကြားခဲ့သည်။

ရုရှား၏လေကြောင်းရန်ကာကွယ်ရေးစနစ်များသည် ဘော်လ်တစ်ပင်လယ်ကို ဖြတ်ကျော်လာသည့် ဝေဟင်ပစ်မှတ်နှစ်ခုကို တွေ့ရှိခဲ့ပြီးနောက် အဆိုပါလေယာဉ်အမျိုးအစားများကို ဖော်ထုတ်ရန် နှင့် ရုရှားလေပိုင်နက်ကို ချိုးဖောက်ဝင်ရောက်ခြင်းမှ ကာကွယ်ရန်အတွက် တိုက်လေယာဉ်တစ်စင်းကို စေလွှတ်ခဲ့ခြင်းဖြစ်ကြောင်း ရုရှားကာကွယ်ရေးဝန်ကြီးဌာနက ပြောကြားခဲ့သည်။အဆိုပါ လေယာဉ်များမှာ နျူကလီးယားထိပ်ဖူးတပ် ဒုံးကျည်များ နှင့် ဗုံးများသယ်ဆောင်ရန်အတွက် ဒီဇိုင်းထုတ်ထားသော B-1B မဟာဗျူဟာမြောက်ဗုံးကြဲလေ ယာဉ်များဖြစ်ကြောင်း ရုရှား၏ Su-27 တိုက်လေယာဉ်မှူးက ကာကွယ်ရေးဝန်ကြီးဌာနကို အကြောင်းကြားခဲ့သည်။ 

ရုရှားတိုက်လေယာဉ်က ချဉ်းကပ်ကာ ကြားဖြတ်ဟန့် တားခဲ့ပြီးနောက် အမေရိကန်၏မဟာဗျူဟာမြောက်ဗုံးကြဲလေယာဉ်နှစ်စင်းသည် လမ်းကြောင်းပြောင်းကာ ရုရှားနယ်စပ်မှ အဝေးကိုထွက်ခွါခဲ့ကြောင်း သိရသည်။ အမေရိကန်၏ ဗုံးကြဲလေယာဉ်များသည် ရုရှားလေပိုင် နက်ကို ချိုးဖောက်ဝင်ရောက်ခဲ့ခြင်းမျိုးမရှိကြောင်းနှင့်  ရုရှားတိုက်လေယာဉ်၏ ကြားဖြတ်ဟန့်တားမှုသည် နိုင်ငံတကာ ဥပဒေများနှင့်အညီ လုပ်ဆောင်ခဲ့ခြင်းမျိုးဖြစ်ကြောင်း ရုရှားကာကွယ်ရေးဝန်ကြီးဌာနက မှတ်ချက်ပြုပြောဆိုခဲ့သည်။ 

B-1B သည် ၁၉၈၀ ခုနှစ်ဝန်းကျင်ကတည်းက စတင်အသုံးပြုခဲ့သော အသံထက်မြန်သည့် မဟာဗျူဟာမြောက် အကြီးစားဗုံးကြဲလေယာဉ်ဖြစ်ပြီး လေကြောင်းရန်ကာကွယ်ရေးစနစ်များကို ထိုးဖောက်ဝင်ရောက်ရန်နှင့် နျူကလီးယားဗုံးများ ကြဲချရန်အတွက် ဒီဇိုင်းထုတ် ထားခြင်းဖြစ်သည်။ ထို့ပြင် ထုတ်လုပ်ထားသော B-1B အစီးရေ(၁၀၀)ခန့်အနက် (၄၅)စီးမှာ အမေရိကန်လေတပ်တွင် အသုံးပြုနေဆဲဖြစ်ကြောင်းသိရသည်။