ဂျန်ဇက် (NSS) - အောက်တိုဘာ ၁၄ 

အစ္စရေး နှင့် ပါလက်စတိုင်းလက်နက်ကိုင်အဖွဲ့ ဟားမက်စ်ကြားဖြစ်ပွားလျက်ရှိနေသည့်စစ်ပွဲကြောင့် အနည်းဆုံး ပါလက်စတိုင်းလူမျိုး ၂၂၆၉ ဦးသေဆုံးခဲ့ပြီး လူပေါင်း ၁ဝဝဝဝ နီးပါးဒဏ်ရာရခဲ့ကြောင်း ပါလက်စတိုင်း ကျန်းမာရေး ဝန်ကြီးက ပြောသည်။ ဟားမက်စ်အဖွဲ့သည် အောက်တိုဘာ ၇ ရက်က ကြိုတင်သတိပေးချက်မရှိဘဲ အစ္စရေး နိုင်ငံကို စတင်တိုက်ခိုက်ခဲ့ရာ နှစ်ဖက်ကြား စစ်ပွဲစတင်ခဲ့ပြီး အစ္စရေးက ဟားမက်စ်အဖွဲ့များ အခြေစိုက်နေသည့် ဂါဇာဒေသ နှင့် အနောက်ဘက်ကမ်းခြေဒေသများကို ဗုံးကြဲတိုက်ခိုက်မှုများ လုပ်ဆောင်ခဲ့ကြောင်း သိရသည်။ 

အစ္စရေး၏ ၇ ရက်ကြာ ဗုံးကြဲတိုက်ခိုက်မှုများကြောင့် ဂါဇာဒေသ နှင့် အနောက်ဘက်ကမ်းခြေဒေသတို့တွင် လူပေါင်း ၂၂၆၉ ဦးသေဆုံးခဲ့ခြင်းဖြစ်ပြီး၊ သေဆုံးသူများထဲမှ ၂၂၁၅ ဦးက ဂါဇာဒေသမှဖြစ်ကြောင်း သိရသည်။ အစ္စရေး ၏ ဗုံးကြဲမှုကြောင့် အနောက်ဘက်ကမ်းခြေဒေသတွင် လူပေါင်း ၅၄ ဦးသေဆုံးကာ ၁ဝဝဝ ကျော် ဒဏ်ရာရခဲ့ကြောင်း သိရသည်။ 

အစ္စရေးသည် ဂါဇာကမ်းမြောင်ဒေသကို ဗုံးကြဲတိုက်ခိုက်မှုများလုပ်ဆောင်ခဲ့ပြီးနောက် အောက်တိုဘာ ၁၃ ရက်တွင် မြေပြင်ထိုးစစ်ဆင်နွှဲမှုစတင်လိုက်ပြီး တိုက်ပွဲအရှိန်ပိုမိုမြင့်တက်လာဖွယ်ရှိနေကြောင်း သိရသည်။ လူဦးရေ ၁ သန်း ကျော်ရှိနေသည့် ဂါဇာဒေသတွင် နေထိုင်သူများကို ဘေးလွတ်ရာကို ရွှေ့ပြောင်းရန် အမိန့်ပေးထားကြောင်း သိရသည်။ 

ဂါဇာဒေသတွင်နေထိုင်သူများကို ၂၄ နာရီအတွင်း ဘေးလွတ်ရာသို့ ရွှေ့ပြောင်းရန်တောင်းဆိုချက်က မဖြစ်နိုင် ကြောင်း၊ အချိန်တိုးပေးသင့်ကြောင်း ဗြိတိန်အစိုးရက တိုက်တွန်းတောင်းဆိုထားသည်။ အစ္စရေး နှင့် ပါလက်စတိုင်းကြားဖြစ်ပွားနေသည့်စစ်ပွဲကြောင့် သေဆုံးသူ၊ဒဏ်ရာရသူနှင့် နေရပ်စွန့်ခွာသူအရေအတွက်သည် တစ်ရက်ထက်တစ်ရက် ပိုမိုမြင့်တက်လာခဲ့ပြီး ဂါဇာဒေသတွင် လူနေအဆောက်အဦးပေါင်း ၁၃ဝဝ ကျော် ထိခိုက်ပျက်စီးခဲ့ကြောင်း သိရသည်။